【 2025年6月27日 快必開往拔摩島的航程 - 第1755日】
TAMtakchi Fast Beat
https://m.youtube.com/watch?v=7wevkFItIC0
Jun 27
2025
//快必知道搵到「羅馬書釋義」，超開心，感謝贈書嘅朋友！
雖然又瘦又黑，但好精神眼仔碌碌，只係條腰生咗熱痱，仲有少少坐骨神經痛。
今日早飯，快必話第一次食節瓜，梅菜汁煮牛肉，好似執到寶咁！//
1）今日星期五嘅早上天氣炎熱，有時落雨，瞬間又陽光普照，快必家人去探訪，好彩落大雨嘅時候，都係車上，冇受影響。因為做咗網上登記，家人11點到達，過完安全檢查，入等候室門口嘅時候，職員已經話～等緊啦。原來快必已經喺6號窗嗰度等緊，望到門口嘅家人，已經急不及待，非常雀躍咁揮手！
2）入去探訪之前，職員循例都會問有啲乜嘢要入俾探訪人，今日家人就入咗一本快必好想睇嘅宗教書「羅馬書釋義」俾佢。呢本書真係要講吓，世界有好多好人，香港仍然有好多好人好事！因為之前快必話想睇呢本書，但係一路幫佢搵唔到，有心人見到有post，就幫手張羅，非常感恩！快必知道搵到呢本書俾佢，鬼咁開心，亦都非常感謝有心人！
3）家人仲未行到去窗口位，快必已經急不及待打開晒件衫， show下自己而家嘅腹肌，雖然唔係six-pack，但係睇得出真係冇乜脂肪嘅！家人攞起電話同佢傾偈，第一句就話佢真係瘦咗好多喎，又係黑咗好多添！不過好精神，眼仔碌碌好精靈咁。快必都話家人好似瘦咗喎，快媽話醫生要佢減磅，做運動行多啲，瘦返少少。家人話呢個年頭，個個都話減肥㗎啦，瘦啲係好事嚟嘅！快必話自己落船之後，兩個禮拜就會肥返㗎啦，所以而家瘦啲都冇所謂。
4）快必話今朝好開心，平時星期五嘅早飯有牛肉，喺石壁咁多個月，通常牛肉都係配青瓜、白蘿蔔或者佛手瓜，今朝居然係「節瓜」，第一次食，簡直開心到爆，仲有係梅菜汁，雖然唔健康，但好好味，好開心！家人就笑佢，有節瓜食已經好似執到寶咁！係㗎係㗎，雖然出去之後，可能覺得不外如是。快媽就話，節瓜以前成日食㗎啦，節瓜粉絲煮蝦米，好好送飯㗎嘛！係呀，呢度啲節瓜冇粉絲㗎。
5）天氣熱，家人都關心快必瞓覺狀況。佢話依家係好OK嘅，都係九點瞓， 10點左右瞓着，五點起身，不過夏天真係「夏日綿綿正好眠」，佢呢排有瞓晏覺嘅習慣喎， 通常30分鐘至45分鐘左右啦，家人就話呢個咁嘅睡眠狀態好好，所以佢先至keep到咁精神眼仔碌碌！不過，快必都散嬌咁話，天氣熱生咗熱痱啊！原來係條腰嗰度，佢仲show俾家人睇，可能條孖煙通嘅橡筋褲頭太緊，出咗汗之後摩擦，搞到又紅又痕，真係幾慘慘豬嘅！另外，又話有少少坐骨神經痛喎，相信要拉筋先至可以舒緩一下。
6）天氣有時放晴，有時落雨，做運動嘅時間，都好難掌握。不過懲教署嘅職員，都好人性化，快必話本來12:00左右做運動，但因為有時落雨，職員見冇落雨嘅時候，會先比佢哋做運動，呢啲真係好抵讚！咁抵讚，要俾五個like啦！由於做運動嘅時間，通常都係中午，烈日當空，所以背脊同膊頭經常曬到甩皮，快必話依家會用牙膏擦吓背脊，比較清涼啲！雖然唔能夠有防曬作用，都有清涼鎮痛幫助嘅！
7）快必話自從有同學畢業之後，依家放風做運動嘅時候，剩低四個一齊踢毽，就好似雙打羽毛球咁，二對二，都幾happy嘅，每局輸咗嗰隊，就要做掌上壓，平均每日都要做5/60下㗎。不過，佢就比較想注重多啲收腹，以及操練大小腿肌肉，膝頭哥，佢就唔想太多勞損喎，畢竟年紀大，要好好保重。
8）佢話有一晚唔小心聽到新城997 ，8點至10點嘅節目，係梁兆輝做嘅，叫做「一角樂」，快必話覺得幾爽幾有趣，又crunchy ，唔似一般訪問拖泥帶水，好like ！而且Brian嘅言詞好精準，當今電台，佢咁講，冇第二個。佢話聽過有一集，係梁兆輝同Edward Chan傾，講Nat King Cole, 方大同，Bill Evans ,好正！近年都冇乜邊啲電台節目，佢會特別like。雖然成日聽嗰啲無無聊聊嘅鬼故事，只係kill time ！聽住Brian嘅節目，一路畫畫， 10點過後都不知時間過得咁快，實在enjoy ！
9）不過，喺船上4年10個月嘅時間，其實佢最鍾意係交通消息，真係百聽不厭喎，因為交通消息令佢感到同外界連結着，一路聽，會一路幻想外面、路面情況。佢知道有啲囚徒，就比較鍾意聽點唱節目，個個禮拜Mon住聽，睇吓有冇朋友點唱俾佢，佢哋鍾意903星期六晚六點至八點嘅「橙BB」，或者RTHK星期日晚嘅「萬千寵愛」，佢同屋企人講唔使點唱俾佢啦！
～咁樣傾吓傾吓， 30分鐘好快結束嘅，七月份細妹同外甥女一家返香港探佢，快必話期待中！
10）呢個星期寄信俾快必嘅朋友，包括：Hong konger一set四張Postcard，鳳凰幽靈三信共四疊彩圖新聞, San Jose 嘅Jacqueline, 阿生、向山舉目、Silver、古仔、蛇仔明，冇署名嘅朋友一疊彩圖資料、Rebecca同Teresa前後兩封信，兩送飯、畫咗好似一個啤梨嘅冇署名嘅朋友，多謝晒咁多位記掛住快必，寫信同快必傾吓偈。因為收到你哋嘅信同卡，對快必嚟講係好大嘅支持同鼓勵。
～寫開信嘅朋友，唔好停，請繼續寫呀，如果好耐冇寫信嘅呢，就快啲加入返筆友嘅行列。如果你仲未寫過信俾快必嘅話，就唔好怕羞唔好懶，嗱嗱臨拎起紙同筆，寫封信寄張卡俾佢啦。有時間寫比慢必都好㗎，一樣可以寄去七姊妹郵箱。
~不過提醒一下，寫信、寄卡，記住唔可以有閃粉、唔可以有貼紙，唔可以用訂書釘，亦都唔可以係3D凸出嚟嗰種喎，但係燙金燙銀嗰一啲就OK嘅！
來信請寄去：
香港七姊妹郵政局
郵政信箱60141號
（PO Box 60141
Tsat Tsz Mui Post Office, HK） |  0 02025/06/28, 11:32:30 中午 |
|
