【 2025年6月3日 快必開往拔摩島的航程 - 第1731日】
TAMtakchi Fast Beat
https://youtu.be/k6xstzu-z0s
Jun 3, 2025
//收到快必5月26號寫嘅信，六月頭就收到五月尾嘅信，好有效率啊懲教署，抵讚啊！不過之前嘅V以及W都收唔到，兩封分別係五月份嘅第三同第四封回信，仲有俾大黃伯嘅生日卡，都去咗冥王星，蕩失路啊，好慘！睇返呢封信先，內容係咁嘅... //
1)2025年5月20、21兩日，連續收到信！好正！回覆大家五月份第五封信。聽講四月份嘅第六封信又係去咗冥王星，呢四年九個月以來，唔開心嘅嘢，太多，但同時開心嘅都唔少，例如收到大家嘅信啦！
~ 5月20號， 520收到我最愛的妹和兩個外甥女的信。佢哋係5月4號寫嘅， 20號收到， OK啦！大外甥女問我識唔識Coldplay，我梗係識啦，我再介紹返佢聽Radiohead, U2, Cranberries, Pink Floyd, 仲有blur… 唔知大家有冇聽呢？至於細外甥女，初中畢業啦，開始feel到離別之苦，好可愛嘅小妹妹！佢哋將寄咗大甥女大學課程，我一路睇，彷彿自己回到30年前入大學嘅時候呢！黐線，時間過得咁快嘅？莫講話我好快出嚟啦，連BT都好快㗎啦！佢呢排剃光咗個頭呀，好清爽。佢一剃，頭我就諗起……我成日諗，到底剃頭明志好啊，定係留長頭髮好呢？
2）神同茂國5月4號嘅信， 20號收到。茂國話聽咗我復活節講章，寫咗首詩回應我，超like ！仲用AI整咗一首歌，歌詞有句：「這城市用謊言蓋印」我唔係好明AI嘅意思，睇嚟我要同AI多啲溝通了！同一封信，仲收到神同文風寄來嘅，感謝！
～神同之外，仲有人友人力之友阿May 同Ken Ho。阿Ken話我哋呢幾年從未放棄過點燈嘅工作，「點燈」令我諗起小王子，亦都諗起撒母耳，即係Samuel。阿May話收到我嘅回信，真係好，有來有往，連結、同行、同在，同呼吸共命運，過去共同奮鬥的日子，要記得的，我們一定記得。
3）向山舉目4月29同，5月5號嘅信、文章同圖，我都係20號收到。神同茂國同你都回應咗我復活節講章〈在死人之地尋找活人？〉因為基督，我哋百分之百係死人和活人，同死同活，不也是我上面說的同呼吸共命運嗎？每個信徒都是殉道者，10年前人力之友T先生說我有殉道精神，我當時否認，今日成真了。而我不是一個人在殉道，我也未死，就算死了也要活過來。
～生仔5月6號嘅信，收到啦，有啲人喺獄中結婚，有啲人喺獄中離婚，有啲人坐冤獄時，外面年紀老邁嘅父母逝世，又有啲人孩子出生了。信佛嘅阿慢來信話：「是否能斷煩惱、了生死都睇今舖。」我就回佢話：「不必把這六年幾嘅日子，看成一種對人生有啟示式的扭轉，因為它們不配。我哋要被更至善的力量啟示。」
4）Silver嘅Postcard收到啦，老人家令我諗起梁婆婆，之前寄來卡上面有隻king charles，令我諗起忌廉表哥Charlie仔。水桶喺LA嘅Postcard都收到，我冇跑馬拉松，怕傷膝頭哥，我依家日日踢毽，右腳膝頭右邊都有少少赤赤痛，死火啦！
～中同H嘅女喺法國寄Postcard俾我，佢仲係叫我「快必哥哥」認真有家教，超like！佢喺法國南部Provence普羅旺斯參加咗一個wine tour，咦?!一班中同酒鬼，後繼有人喎，好正！
5）沒有署名嘅朋友，寄來香港電影金像獎賽果，如果我喺外面，我都唔會成日去睇港產片，我比較扮嘢，會去睇伊朗片「一念菩提」（唔好撈亂「一念無明」）。我又會睇「I am still here」，講巴西獨裁政府下嘅一位媽媽、妻子嘅抗爭，仲有姬蒂白蘭芝嘅「黑袋行動」我都想睇。Juno嗰套「風林火山」，係近日想睇嘅港產片，因為想睇吓洗咁多錢拍出嚟嘅戲，有幾難睇有幾難明，喔喔。
～居然收到忌廉寄來嘅信，佢一定係知道我之前發咗一個怪夢。中同L問AI個夢點解，佢綜合咗容格、拉岡和弗洛伊德，俾咗個報告我，當小說咁睇，唔錯。仲有大阪世博嘅資料，我睇完，大家都有睇完，大家都好開心，睇咗當去咗，同旅遊書一樣，同食譜一樣。
6）蛇仔明：收到你寄來C叔同大班網上節目嘅討論，關於撐侵抑或反侵，可能因為我喺船上，冇feel，覺得好無謂。但係如果能夠增加hit rate也無不可。但我問我自己，出去之後會唔會變成咁樣呢？如果係，我會好憎自己咁。我會同自己講：好自為之啊，譚得志！「吾日三省吾身」已經太溫柔了，要帶點恐嚇：「好自為之啊，譚得志！！！」咁樣更加好更加like ！
7）快必嘅回信嚟到呢一度。五月份快必收信情況唔錯，因為都係用掛號寄入去，收齊晒，佢好開心！佢寄出嚟嘅信，雖然唔齊，冇回覆到你寄來嘅信，不過大家唔好氣餒，寫開信嘅朋友，唔好停，請繼續寫呀，如果好耐冇寫信嘅呢，就快啲加入返筆友嘅行列。如果你仲未寫過信俾快必嘅話，就唔好怕羞唔好懶，嗱嗱臨拎起紙同筆，寫封信寄張卡俾佢啦，因為收到你哋嘅信同卡，對快必嚟講係好大嘅支持同鼓勵。有時間寫比慢必都好㗎，一樣可以寄去七姊妹郵箱。
~不過提醒一下，寫信、寄卡，記住唔可以有閃粉、唔可以有貼紙，唔可以用訂書釘，亦都唔可以係3D凸出嚟嗰種喎，但係燙金燙銀嗰一啲就OK嘅！
來信請寄去：
香港七姊妹郵政局
郵政信箱60141號
（PO Box 60141
Tsat Tsz Mui Post Office, HK） |  0 02025/06/03, 10:58:19 晚上 |
|
