【 2025年5月23日 快必開往拔摩島的航程 - 第1720日】
TAMtakchi Fast Beat
https://m.youtube.com/watch?v=WWRlrEGCsQE
May 23
2025
1）5月9號快必寫給大家嘅信:
~五月頭收到黃鶯媽343至347，一次過五封信、圖同文章。我老師邢福增對龍應台嘅回應，我最like。佢文章最後四隻字——好自為之，有一種自我省察，警惕自己的自省，好正，係真正的公共知識分子、歷史學者的修養。
~四月尾五月頭收到醫生護士前後十幾張Postcard，已經keep咗三張做書簽，正呀。5月6號收到中同Shirley嘅日本Postcard，係一張摺起可以成為坐枱模型嗰種postcard，好鍾意，用嚟點綴牢房囚室，帶嚟一點可愛、一點創意，苦中作樂。又收到眾樂教會卜牧師嘅信，冇錯，我仲有兩個復活節就復活了。
2)Patti: 睇新聞見到侵侵扮教宗同星球大戰，好好笑，佢係唔係俾人整蠱呀？但又好符合佢嘅style喎，使我想起寫「撒但的詩篇」嗰個作者，比回教徒追殺，天主教徒應該冇咁癲嘅。當聽到侵侵要馬斯克減少參與政治時，我個心離一離，咁我咪再見唔到馬斯克同佢個仔喺權力最高嘅辦公室騎膊馬？又見唔到個仔撩鼻屎揩落寫字枱？
~袁區博：嚟咗石壁半年了，呢度比荔枝角好，乾淨啲，冇乜小強同蟻。不過最近聽講有米奇，但我未見過，只聽到聲，諗起卡繆嘅「鼠疫」，收音機有單新聞，有個人扭親，去針灸，染上甲型鏈球菌要將左下肢切除，扭親針灸要鋸腳？同「鼠疫」有乜關係呢？都係好存在主義吧?!正如我每次上庭，都會想起卡夫卡「審判」的。無常無理唔知做乜嘅荒謬！
4)妹和兩個外甥女寄信給我，我問妹侵侵上場後，生活有乜實質影響？首先係，嗰度嘅任食火鍋加咗價啊！細外甥女說學緊蕭邦一首好難嘅樂曲，說我出去之後要彈給我聽，期待中！大外甥女正準備升大學了，很快便會邁向人生另一階段，他們一家永遠有我的守望與陪伴以及支援，你哋有冇咁好的兄弟姊妹情呢？英國利物浦好友一家也寄信過來給我，仲話俾我知母親同兒子對話嘅笑話，令我笑咗兩日呢！笑話在冤獄是朱古力一樣令人愉快。
5)J &J：要同你哋兩個分享船上睇戲影評。五月頭更新職員帶我哋去睇以英傑經歷為藍本的微電影，古明華做佢老竇，有個妹有阿嫲，全部都係演員，好有「警訊」feel。我同同學哼哼一路睇一路開心一路投入，尤其主角真人現身懺悔講見證，特別感人，但係又遮面就變得有喜劇感了，like爆。我問職員咁奇怪，大陸嗰啲懺悔片明明都唔使遮住個樣嘅。
~職員問我「如果比三分之一我，（即係坐監本來可以扣減三分之一假期，咁就可以早啲落船）我會唔會拍片？」我話：「乜你睇到我份人咁市儈咁功利嘅咩？冇三份一都拍啦，真心覺得能夠做呢類戲嘅男主角係光榮啊！」我以前拍親啲戲，都係茄喱啡嚟之嘛。搵我做主角嘅話，唔使遮我個樣吖。
6)巴拿馬：你喺信入面問我夏天呢度會唔會好熱呢？唔會，我覺得比起市區，呢度可能低兩三度，我估係郊外同城市嘅分別啦。五月頭啱啱最近又搬咗房，本來向東向山向樹海，依家變咗睇園景，左中右三幢building包圍，但我仍然頂得順嘅，諗起赤柱嘅兄弟，佢哋聽講更加熱啦。
~小小：收到你寄來松重豐幾張唔同造型嘅照片，白頭髮圓眼鏡，我覺得有一張相好似同馬德鐘撞樣添。有個職員話我好多白頭髮，佢唔知我鍾意多啲白頭髮，坂本龍一、松重豐嗰啲又型又靚，但村上春樹就唔得，太過阿伯咁。我依家副眼鏡係黑框長方形，我都想整返副少少圓形嘅，坂本龍一嘅眼鏡唔係黑框，係玳瑁色，邊款型啲呢？
~你話嗰套韓劇「苦盡柑來遇見你」，寫男主角好為個老婆，有啲人話係拍比女人睇嘅AV，比女觀眾FF，呢個說法，我覺得仍然停留喺「舊邏輯」之內，即係老婆問老公，「我同你阿媽一齊跌落海，你救邊個先？」呢個仍然係一個「舊有嘅框架」之內，反主流價值仍然係一種主流價值，它沒有re-frame那個問題。我唔會用「拍比女人睇嘅AV」呢個角度去睇，而係套劇嘅女性想像，仍然停留在「老公站在他父母一邊vs老公為我敢於反抗父母一邊」嘅框架內。
7)快必嘅回信嚟到呢一度。呢個星期嘅郵箱收到以下朋友寄來嘅信同卡，包括Rebecca, 加路比快慢嘅信，澳洲Helen Postcard，英國Michelle信同Postcard，手巾仔四張postcard，阿生、Teresa、向山舉目、Ronnie俾快必同其他船員嘅信，多謝晒咁多位嘅掛住快必。
～寫開信嘅朋友，唔好停，請繼續寫呀，如果好耐冇寫信嘅呢，就快啲加入返筆友嘅行列。因為收到你哋嘅信同卡，對快必嚟講係好大嘅支持同鼓勵。
～如果你冇寫過信俾快必嘅話，嗱嗱臨拎張紙同攞支筆，唔好怕羞，唔好懶啦，寫封信同佢say hi啦，或者去書局買張靚靚嘅卡寄俾佢啦，佢仲有兩年捱啊！有時間寫比慢必都OK 㗎，一樣可以寄去七姊妹郵箱。
~不過提醒一下，寫信、寄卡，記住唔可以有閃粉、唔可以有貼紙，唔可以用訂書釘，亦都唔可以係3D凸出嚟嗰種喎，但係燙金燙銀嗰一啲就OK嘅！
來信請寄去：
香港七姊妹郵政局
郵政信箱60141號
（PO Box 60141
Tsat Tsz Mui Post Office, HK） |  0 02025/05/24, 11:35:16 中午 |
|
