【 2025年5月20日 快必開往拔摩島的航程 - 第1717日】
TAMtakchi Fast Beat
https://m.youtube.com/watch?v=6ZWoou3Ho8E
May 20
2025
//有唔使攤凍嘅凍水飲，風扇都係開一度；但搬咗屋，依家向西內園景，熱過之前少少；
石壁陽光太猛烈，又黑咗又瘦咗，做運動曬到背脊甩皮；
4月28號收到一疊信，快必好開心，又回一回大家嘅信//
1)唔經唔覺上船半年，到咗初夏季節，快必話飲水都多咗。唔知係石壁特別體貼，定係新措施啦，以前由B仔派水，係熱水嚟嘅，想飲凍嘅，要自己裝好一個杯，攤凍咗，先至有凍水飲！快必今日同家人講，話依家有凍水飲喎，認真正啦！做完運動，依家沖凍水涼，好爽！依家風扇仍然開一度，石壁唔會熱過荔枝角，又有冰巾用，快必話：頂得順。
2)石壁雖然冇咁熱，但太陽依然係猛烈，家人覺得快必又黑咗啲，而且繼續瘦，加上又啱啱剪完頭髮，覺得佢瘦到塊面起角喎，但係都係好精神嘅！只係佢話陽光猛烈，又冇太陽油，曬到背脊甩皮，雖然每次沖完涼都有用梨牌潤膚露搽身，可能唔夠滋潤啦，都仲係甩皮。
3)自從四月底有一個踢毽隊友落船之後，剩低幾個，又一次搬屋了！每次搬屋都係勞師動眾，書呀、雜物呀，搬呀搬之外，又要喺新屋清潔一番，快必話最憎搬屋好麻煩。依家掉咗房，係喺後面一條走廊，本來向東向山向樹海，轉為向西向內園，比較熱咗一啲。不過內園偶然會見到喺大棚嘅教授喺內園做運動，可以隔空同佢打招呼，快必話每一句問候雖然微小、輕但重要嘅。
4)今日收到快必五月第一封嘅回信，呢封信係5月5號寫嘅，信嘅內容係咁嘅：
～Fion：收到你嘅復活節咭，你都有石壁探人，對嗎？頂住呀，繼續關注需要關注嘅嘢，代我問候蛇仔。
～向山舉目： 4月8號、10號兩封信同文章以及圖，都一一收到。記住悔改唔等於信教，我12月嘅講章會再講到「終末與悔改」的，到時再討論啦。冇錯，而家係五月，我已經寫到今年年底嘅講章了，係唔係好期待呢！我唔介意食榴槤，但唔會主動想食。暴雨驕陽呢套戲，我中學時候睇嘅，影響咗我嗰幾年！嗰陣時Robin Williams最當打，好多好戲。
5)中同積奇陳的卡同Postcard都收到，啱啱提到Dead Poet Society，我當然識你嘅行家膠樽同虹虹，虹虹曾經仲係我嘅鄰居，喺外面嘅真鄰居啊！你提到嘅雪糕車，我出去之後都想揸喎，不過可能要考過一個牌，一路可以揸架車周圍去又可以賣雪糕，去邊度買雪糕好呢？
～神同文風：收到你嘅信，等我出嚟，兩年後我哋由筲箕灣東大街行頭食到街尾，嗰度而家係唔係都仲係咁旺呢？係唔係都一樣咁多美食？定係執一間開六間，仲更加多美食？
～神同茂國：我4月28號收到你嘅信，「未來AI，會係一個國與國，人民與政府的新戰場」，我的台灣中同係AI fans，寄咗一啲關於AI嘅書俾我睇，你有何高見呢？
6)手巾仔：你寄來嘅台灣笑話圖，收到晒！我都唔介意人忘記我生日，但愛我嘅人會記得我所有生日，我亦都記得所愛嘅人嘅生日。我嘅生日，我會特別記住我老媽，咁辛苦生我，仲要我咁曳咁難教。
～28號收到嘅一疊信，好多，好開心，除咗有台灣嘅手巾仔，仲有澳洲Helen ！多謝你同嗰邊嘅香港人，沒有忘記我哋所有嘅政治犯。
7)Rebecca： 3月31號嘅信同Postcard都收到，我依家睇書嘅時間都係唔夠，畫畫少咗，計劃下半年會畫返多啲畫，大家拭目以待啦。添布頓嘅電影，我like「無頭谷」，感謝您去到每一站都紀念我！
～生仔： 4月2號嘅信我28號收到，多謝你回應我「坐監是否人生低潮？」嗰個講法，更加多謝你話我50歲唔算老，呢四年幾嘅船上生活，令到我個樣，好多人都話後生好多，不過我怕石壁曬到黑鼆鼆，會顯得老啲喎！
～Teresa：收到你4月3號、9號同10號嘅信。嗰首老餅之歌真係笑死我！
8)蛇仔明：點解我頂得順？有三件事喺呢度好重要嘅，第一係保持慾望、有滿足嘅目標，所以我睇雜誌睇靚衫讀好書，仲有購物慾同貪靚𠻹；第二係至尊自重自己嘅日常生活與節奏，可以有Say no嘅權利和自由，即使係微小；第三，係最重要，外面有一個支持和支援的群體，有大家寫信、寄卡給我，去到世界各地都買張Postcard寄俾我。
～小言：多謝你寄來詩篇鼓勵我，我最近睇咗韓國詩人尹東柱嘅詩集，佢嘅詩令我諗起創世記，亦都諗起終末，諗起愛情來臨嗰一刻，大概就係啟示吧！我好喜歡讀詩，尹東柱嘅詩好值得欣賞，佢係韓國抗日政治犯，廿幾歲就死喺冤獄，有機會搵佢嘅作品睇吓啦。
9)快必嘅回信嚟到呢一度，如果未到你嘅話，請大家俾啲耐性。最近，快必收信都順利嘅，只係有一封佢未收到定收唔到，當蕩失路啩。
～你有冇寫過信同快必say hi啊？冇嘅話，嗱嗱臨拎張紙同攞支筆，唔好怕羞，唔好懶啦，寫封信，或者去書局買張靚靚嘅卡寄俾快必啦，佢仲有兩年捱啊！有時間寫比慢必都OK 㗎，一樣可以寄去七姊妹郵箱。
～寫開信嘅朋友，唔好停，請繼續寫呀，如果好耐冇寫信嘅呢，就快啲加入返筆友嘅行列。因為收到你哋嘅信同卡，對快必嚟講係好大嘅支持同鼓勵。
~不過提醒一下，寫信、寄卡，記住唔可以有閃粉、唔可以有貼紙，唔可以用訂書釘，亦都唔可以係3D凸出嚟嗰種喎，但係燙金燙銀嗰一啲就OK嘅！
來信請寄去：
香港七姊妹郵政局
郵政信箱60141號
（PO Box 60141
Tsat Tsz Mui Post Office, HK） |  0 02025/05/23, 8:37:15 早上 |
|
