【 快必文字獄：還押日誌 ～ 1 / 22 / 22 ～ 第501日】
https://m.youtube.com/watch?v=Wxuxqc6cP_s
TAMtakchi Fast Beat
1.37K subscribers
//重要：寄信俾快必，請寄去七姊妹郵政局郵政信箱60141號，請唔好再寄去九龍灣喇🙏🏾
快必提醒家人，支持黃店外賣野餐
牛丸冇牛肉？溝埋變做瀨尿牛丸吖笨！//
1）今日係快必家人同電台舊同事JC探訪，佢哋10點到逹登記，可能有少少雨，人唔算爆多，佢哋立即可以入探訪等候室，半個鐘左右已經聽到Number；今日冚莊，快必又係喺26號窗；
2）入到去，快必企起窗前，同隔離咖啡船員傾計，都唔記得咗照鏡同撥頭髮添，一見到佢哋兩個，快必好醒目埋位，職員亦都好快咁開計時器，拎起電話，快必就問候JC 隻狗狗阿寶，阿寶比忌廉細少少，忌廉細個嘅時候喺JC 屋企住過，得到佢照顧同訓練，所以而家先至咁乖咋；
3）大家愛狗愛動物，佢哋自然聽到倉鼠啦，真係好慘，啲主人黐Q線，點解會將倉鼠親手送死？倉鼠嘅壽命一般都係三年或更短，所以同貓狗唔一樣，貓狗同人嘅感情往往都十年八載，不過就算三兩年嘅感情都唔會忍心咁做啦， 所以有小朋友會傷心欲絕，亦都好純潔，識得話就算爸爸再買另一隻倉鼠，代替被棄養被滅殺嗰隻，都已經唔係同一隻啦，建立嘅感情係唔可以替代㗎嘛；
4）由於今朝落雨，探佢嘅時候，快必都仲未放風，可能要12點先放啦，佢話自己好勤力做運動㗎，有揭高個衫袖俾佢哋兩個睇，好滿意咁嘅樣，話自己有老鼠仔喎，幾大隻，大過倉鼠呀！至於佢嗰對幼長而俾人懷疑「肌肉萎縮」嘅雙腳呢，快必就冇show比佢哋睇喇，不過JC 就同快必講佢一向都係頭大頸粗肚腩凸啫，雙腳一啲都唔肥㗎啦，放心！快必反晒眼，真係激死呀，咁即係讚佢定係彈佢呢？(放心放心，你依家有頸有面冇肚腩，靚仔好fit!) OK OK，照單全收！
5）JC 係素食青年，快必話俾佢知，今日嘅早餐，好抱歉，食咗燒鴨湯米，不過聽日佢會「找素」，係芫荽皮蛋湯米呀！講開食，佢哋就提到快必老友SB因為去打邊爐要隔離，仲要去咗糟糕灣幾日，認真慘，所以快必都提家人同JC ，支持黃店，外賣野餐就算喇，又可以喺Facebook度join一個叫做「香港安心野餐」群組喎https://www.facebook.com/groups/pktan...
6）佢哋又傾到消委會嘅報告，話龍蝦丸冇龍蝦喎，有乜出奇啫，佢哋於是玩貨不對辦接龍遊戲：老婆餅冇老婆、菠蘿包冇菠蘿、珍珠雞冇珍珠、一腳兩掣冇兩個掣，咁，牛丸原來冇牛肉…爭咩呀？兩樣溝埋變做瀨尿牛丸吖笨！JC 同快必都係星星粉絲，所以傾吓傾吓，就係咁互拋金句，呢句瀨尿牛丸，相信大家都估到係乜嘢戲啦，係咪？
7）講到一腳兩掣，其實得一腳，點可能有兩個掣呢？啱啱放學嘅天琦要接受監管令，再次証明「三腳扁形插蘇掣」香港唔適合用，都係要用返有大陸特色嗰種，呢，有兩腳扁型又有八字三腳扁型，名副其實嘅一腳兩掣啊；
8）快必同家人講已經收到生日卡喇，佢話細妹都有寄生日卡俾佢，佢用詩篇聖詠第一篇畫咗幅畫比佢，好sweet，又有喺牆外經常飲紅毛泥水嘅自己友，寄咗豬仔錢甖生日卡俾佢，家人問乜嘢紅毛泥水？哦，即係麥皮早餐囉，佢以前做節目成日食㗎，d100嘅自己友就會明㗎啦。總之，佢話好多謝大家寄生日卡俾佢，其實自己一向唔係好慶祝生日，不過自己生日就諗起最辛苦係阿媽，以前佢就會親手下廚整一餐俾阿媽食，依家，唯有托家人同阿媽食返餐好㗎啦；
9）今年農曆年初二就係撞正快必西曆生日，以前年尾呢個時間佢會做街站寫揮春派福字，又會包利是，仲會整忌廉利是封送俾人、又會整上海年糕同埋蘿蔔糕送俾人；年初一佢就會去行山兼拜山，初二就有朋友嚟佢屋企拜年，初三四日又會周圍去，好忙㗎，不過，一切都係「舊事已過，都變成新的了」，快必話我哋嘅今日同將來，將會完全唔一樣，花市又冇、戲院又唔開，天災～被人禍加倍傷害，講吓講吓，咁就夠鐘啦，今日有冇時間唱歌，真係慘喇！
10）聽日星期日，大家都會瞓得晏啲，瞓醒就有精神，唔出街得閒嘅話，就拎起紙筆，寫封信寫張卡寄俾快必，同佢傾吓計啦，收到大家嘅來信佢會好開心㗎；
提醒一下，農曆年如果想寄賀卡又或者生日卡比快必嘅話，（佢係2月2號生日，今年撞正年初二啊）記得唔好買有貼紙、閃粉、立體，即係3D凸出嚟嗰種呀！
來信請寄去：
香港七姊妹郵政局
郵政信箱60141號
（PO Box 60141
Tsat Tsz Mui Post Office, HK）
寄信比斯叔，都可以寄來呢個地址㗎！
11）最後，繼續宣傳一下快必嘅Patreon ，希望得到大家點點滴滴嘅支持，應付漫長嘅訴訟。仲有，你哋訂閱subscribe 咗快必嘅YouTube Channel未啊？https://www.youtube.com/c/takchiTamFa...
記得C L S呀！即係comment留言、like點讚同埋分享share，拜託晒！
唔好唔記得仲有赤柱嘅斯叔，佢嘅Patreon 都需要你哋支持㗎，多謝晒。 |  0 02022/01/23, 9:07:18 上午 |
|
