https://hk.appledaily.com/columnist/20210110/4S2TSBOSUZCALLGWYZPLEFX73E/
節錄
蛋治下架十步曲 - 畢明
《History of Swear Words》劇照
蛋治下咗架……就係人都知啦。唔好現在才扮恍然大悟：親，I didn’t notice好不？
不過有啲人，你要同佢分手至少兩次，佢先會明白收到；有啲球員好似拿度咁強韌，你要打死佢幾次，佢先會輸波。蛋治收線，可能要表演下架幾次，世人先肯面對現實。
其實蛋治收檔已不止一次，執笠了一鑊又一鑊，certified得一單比一單肉酸詭奇，只是有時大家不以為意，又可能以為是暫時性的事。佢真真正正咁走咗，有些人現在才肯承認如夢初醒。
始終，蛋治吃了幾十年，吃開有感情，實在未必想輕易相信，佢就咁唔見咗。
又咁講，正宗蛋治從菜單被搣走，又沒有正式風光宣布的，而且為了掩飾蛋治不再，世上又出現咗很多變味走樣的滾蛋治、渾蛋治、完蛋治、茅蛋治、鳥不生蛋治，亂入登場，令人誤以為原裝蛋治仍在。你諗真啲，其實蛋治的dead body，已經從遠處同大家講咗over over很多次了，。。。。。。。。。。
首先，曾經有一間茶餐廳，經過幾代人嘅努力，從冇到有打出名堂，做到國際知名、全球肯定，啲蛋治亦都係世界級的。不過，好多年前，轉咗字頭，新財團入主，產權移交，新人事新作風，就開始走下坡了。
又咁講，新財團起初接手時，雖然收樓樣有啲嘴臉但沒有如今的巴閉，都算知道國際漿糊規矩，大家簽晒約畫晒龜，講明菜單用料招牌蛋治，跟足正統煮法50年唔變，蛋照炒，包照切，點估到佢會咁衰，做做吓唔賣蛋治嘅啫。
不過換咗管理層，公司文化唔同、視野唔同、識見唔同、程度唔同，上一手下一手，上下其手，好出奇咩？
最先害蛋治的，好似係：織髮。
大嗱嗱飲食行業，你跌條織髮落碟乾淨企理嘅餸度，yuck，出事㗎嘛，又唔衛生！仲要唔係細路仔嘅幼小短髮，不易察覺，係成人、人咁大嘅織髮，來個硬着陸。一碟雪白純潔，黃金金嘅無瑕蛋治，撻條黑麻麻嘅核突嘢落去，從此就咁就污染咗，contaminated，食壞人㗎嘛。唔係話唔俾你織，有頭髮邊個想織髮啫，但唔好亂織、硬織囉。
仲有，織髮呢啲技術性污染，一次污唔夠仲要兩件穢，餘此類推，問你一件慣咗喺衛生環境長大嘅蛋治情何以堪？Recipe話井水做嘅麵包不可過界用河水做，吹水啦。
然後，是撻Q。堂堂一間茶餐廳，打開門做生意，啲嘢落咗單，又話取消咗、cancelled、撻晒Q。之前落咗單，明明跟足晒規矩，有單有據，佢唔理：硬取消，咗，撻Qed。咁都得？！好多人落咗單，電腦確認咗㗎喎，佢話，彈弓手呀，依家唔做你生意。由上埋菜都可以攞走返，到後來，直情連落單都叫個唔關事嘅伙記提早cut 你單，menu上仲有蛋治咩，點食啫？
都唔知第幾步曲了。
去過日本、南韓、歐美啲diners，都知整蛋好多時有汁醬，加紅汁、白汁、gravy，好正路。不過汁醬要三盤分開，不能混醬是常識吧，但茶餐廳負責人，會忽然彈出嚟，話蛋治汁醬嘅嘢，從來冇「三盤分辣」呢回事的。。。。。。。。。。。
咁就奇喇，你識煮的人，好心提佢，食嘢，前設係「無淚假定」喎。起步要用原味，。。。。。。。。。。。
。。。。。。。。。。。，其實我話下架嘅，都不過係尼古拉斯蛋治嘅Netflix新節目《History of Swear Words》啫。佢一開場，就用力拔山兮的氣勢，大喝一聲：Fxck!!!!!!
你知啦，依家茶餐廳興靜音，大聲嗌fxck唔犯法，但你嗌到人哋冇生意做，顛覆咗佢嘅營運安全，就要拉啦。所以尼古拉斯蛋治，隨時中午就俾人下架，咪話唔通知。點解係中午？我今日學的，事關壞事一定要中午做，因為早晚是有報應的。
IG：budmingbudming
FB專頁：https://www.facebook.com/BudmingBudming |  0 02021/01/10, 8:55:23 晚上 |
|
