https://hk.appledaily.com/columnist/20210109/7NNLAO4G7RADDDSQJL66IHYCAA/
歷史不止一種寫法 - 左丁山
互聯網
講唔講真話？一位朋友對左丁山講：「愛國學校啲老師會教學生講真話嘅。中國永遠講真話，領導人永遠正確，永遠講真話，1961-1976年，鄧小平講真話咩？江青四人幫講真話吖嘛！1976年有深入批林批孔批鄧運動，香港中文大學都有學生信係真話啦。到咗1977年，鄧小平講嘅就係真話囉！𠵱家當然知係習主席講真話啦，一定要信。」
左丁山想笑又笑唔出，啲老師緊跟中央教導嘅話，係恒常講真話嘅。今時今日，社交媒體有大量「事實」，不知誰真誰假，特朗普加霍士電視，早就有講alternative facts，總統大選邊個贏？官方選票結果係假嘅！法院判決？係做戲嘅，最高法院判決？係操控嘅！選舉人確認拜登贏咗？係無效嘅！係邊個講最真？特朗普話自己大勝。信邊樣？
將來歷史學家寫歷史，唔知點樣評價特朗普，話特朗普精明過人吖？還是笨蛋粗魯漢子一名呢？特朗普講過自己IQ好高，選舉前已知有作弊，何解在任四年，還是冇做嘢，冇監管電腦投票，冇阻止郵寄投票？美國總統咁大權，特朗普何以坐以待斃，眼光光睇住民主黨作弊呃走佢嘅總統寶座？
總之笑話一籮，教人難以認真。中文大學去年出版一本書，叫做「歷史不止一種寫法」，作者毛升，係美國賓夕凡尼亞大學（特朗普母校）歷史系博士，曾於台灣中研院近代史研究所從事博士後研究，現任嶺南大學歷史系講師。毛升博士在北京本來讀北京廣播學院，讀碩士時，從一位教授借到一本內地禁書，就是香港中文大學出版的「紅太陽」，十分震撼，於是後來轉到南京大學追隨作者高華教授讀歷史，繼而留學美國。
毛升博士在序言講在南京大學時聽高華教授演講中共黨史，總是座無虛席，但高教授要求聽眾不要錄音，不要將內容在網上傳播，原因是不想惹上麻煩。高教授父親戰前是地下黨員，在南京活動，1958年被打成右派被迫害，子女受牽連，高教授試圖揭露另一面的中共黨史，與官府黨史神話當然有不同之處，實證了歷史不止一種寫法。至於官府或讀者是否接受，那不應該是歷史學者所要考慮的問題。以往香港嶺南大學歷史系欲編香港地方志，因工程太大，耗費不菲而作罷。大學做唔到，就有財雄勢大的基金上馬，籌款數億元編修香港地方志，正正顯示了歷史不止有一種寫法。
|  0 02021/01/09, 5:58:48 下午 |
|
