事先聲明，我並唔反對人哋上莊，籌辦活動組織團體為同學服務。佢哋呢一種主動嘅行為係值得我哋去尊敬。我要屌嘅，係佢哋所謂嘅上莊文化。
呢種文化，其實就只係一代傳一代，由所謂嘅老鬼傳承同開創，實際嘅起源已不可考，而我亦到冇興趣去考究，故此就唔係今次嘅討論範圍之內。早前有文章指，dem beat宣傳嘅意義何在，並對此行為有反對之意。我認為dem beat一行也並非不可取，能讓同學看見幹事們上上下下嘅一心一意嘅團結之心，有令同學產生信任幹事的作用。故此，此乃正面的宣傳。
我今日要大大力屌嘅，係佢哋嘅所謂諮詢。諮詢本為好事一椿，能讓同學有機會發聲，並對未來嘅政活動提出意見，有一個聆聽民意，互相學習嘅機會。但係，呢個諮詢反而成為下莊莊員嘅壓力來源，到底通宵達旦的諮詢有何用意？假若真正有心發表意見嘅，幾個鐘都搞得掂啦？有邊個會半夜三更凌晨三四點走去問問題呀？姑勿論發問者本人是否清醒，連莊員都已經睡眼惺忪，又如何答到你嘅問題呀？
反而發問嘅好多時都係上莊（上音尚，指上一任），問埋一啲無的放矢，雞蛋裡挑骨頭嘅問題，加上通宵達旦，對莊員實為疲勞轟炸。加上上莊（意思同上）提出一些無理嘅批評，對莊員嘅否定，使他們心理上更不好過，又何談有良好嘅心理質素嚟籌備呢？
我認為，所謂嘅上莊文化同傳統，尤其是諮詢，根本就係一個讓上莊（意思同上）欺凌下莊，建立所謂威嚴，恃老賣老，作威作福，揸住雞毛當令箭嘅機會，根本就係一種喺大學發生嘅校園欺凌行為，更無恥嘅係，用傳統將之合理化。逼使下莊下莊下下莊都要屈服在上莊上莊上上莊嘅淫威之下，將受害者變成施虐者，把這不良傳統傳承開創下去。 |  3 02013/11/02, 12:47:44 下午 |
|
