https://hk.entertainment.appledaily.com/entertainment/daily/article/20191222/20829483
【娛樂人物】香港人，驅魔！卓韻芝
關於白色恐怖，卓韻芝說：「我覺得𠵱家個白色恐怖，從來都唔係喺外面入嚟，喺呢度裏面（心）。」
由6月至今的逆權運動，卓韻芝都勇於發聲，她坦言自己冇包袱，雖然身處風高浪急娛樂圈，她一直看待自己的身份是自由創作者。
「呢一個夏天，先真正體現到自由係幾咁偉大，我要講嘅說話，我只係對自己嘅抉擇，我對自己事業負責囉！」不用愁因為自己一句說話，而影響工作伙伴或團隊。
但，個人工作損失，當然有影響。她試過出完po之後即刻收到電話，對方說之後的job要取消了，「我未試過日日都要撫心自問，直至去到某一個位就相信係要說話！」
抗爭大半年，年尾結算。香港人加油、反抗、報仇之後，如何走下去？卓韻芝說，她不能代表香港人，但想法還是有的，「香港人，驅魔啦！驅除外來嘅群魔亂舞，最重要就係驅除你內心嘅惡魔，冇咁容易分化、冇咁容易抹黑香港人！」
有想對林鄭說的話？「就係（叫佢）背熟《願榮光歸香港》嘅歌詞囉，哈哈！」
撰文：文嘉龍
攝影：陳慧安
6月至今，卓韻芝一直敢於發聲，與香港人齊上齊落。
中大圍城一夜，卓韻芝深夜寫下千字文向前輩們「求救」。
對於圈中好友當「護旗手」，卓韻芝表示比較體諒，「我唔會好偏激咁一嚟就去怪佢哋！」
唔係勇敢只係特別憤怒
卓韻芝說，因為發聲表態而影響工作，她覺得只需要對自己負責，後果自負，是一種承擔。「我第一個post就開始有（影響），6月，嗰時都未咁火紅火綠，已經即刻嚟喇，兜口兜面睇到，即刻收到電話，跟住，吓，咁大個客冇咗㗎喇，大家即刻唔想掂，但係我覺得OK嘅，我淨係對自己負責任，咁OK，我咪自己去承擔囉！」
不怕被封殺？「我成日都覺得，如果你俾人封殺咗，你根本都唔知俾人封殺咗㗎啦，冇得怕！你係跟住自己個心做，你就唔好擰返轉面喇，你一擰轉面就變石頭㗎喇，我係咁覺得囉，你一路向前行，但係你擰轉一望，你即刻變石頭呀！」
不過亦有內心交戰的一刻，「我覺得呢個運動好犀利就係，每一日我睇住新聞嘅時候，就好似對我心裏面嗰個秘密對質咁，意思係，其實你有幾瀟灑呀？你其實想唔想要錢呀？你其實想唔想要前途先？你其實想唔想去大陸？其實你𠵱家開post你驚唔驚呀？你驚唔驚落樓下呀？其實，我覺得呢個對質真係好犀利，我未試過日日都要撫心自問，直至去到某一個位就相信係要說話！」
更加需要勇氣？「我諗呢個亦都係同和理非點解越嚟越勇一樣啫，有時唔係你有幾勇敢，只係因為你特別憤怒呀！」
中大圍城那一役，她深夜po出一篇千字文，向前輩們「求救」：「明白到你們對這場運動擁有自己的看法，不能單純以黃/ 藍來簡化，這陣子亦感激一些前輩們跟我分享之……然而經過這兩天之後，危急之務已經相當清楚：拯救人命」她還寫下這句：「這是一場屠殺。」
卓韻芝說：「係一個好單純人對人嘅惻隱囉，嗰封畀前輩嘅信，我諗外間最大嘅誤會，覺得我係俾圈中嘅前輩，其實唔係，我係覺得我要畀前輩，前輩就係喺個社會或者人生較有經驗嘅人，影響力比較深遠嘅人。我𠵱家自己呢一刻乜都做唔到，細路仔就係咁，乜都做唔到，不如問爸爸吖，不如問媽媽吖！所以喺嗰個時候，我係手震嘅，其實我寫嗰封信，我自己就喺度震，跟住我亦都好驚訝，原來前輩係會覆㗎！」
卓韻芝（左）13歲已考入商台當兼職，多年來一直深得俞琤（右）力捧。
最好時代亦係最壞時代
向前輩「求救」，卓韻芝亦對年輕人有話要說，「我早前就寫咗封信畀啲小朋友啦，喺facebook都有po出嚟，但係你一聽到喺facebook寫信畀小朋友？你都已經知道呢個完全唔係同一個小朋友對談嘅方法，小朋友係冇facebook㗎！我始終覺得好多時候對小朋友嘅一啲所謂影響，唔係來自我講咩、我喺facebook寫咩，而係你成個人所謂嘅身教，你自己係點樣面對逆流先？小朋友邊度得閒聽你咁多嘢吖，你自己做好自己先啦，你自己作為大人做好自己個身教先囉！」
對年輕人，她百分百信任，「喺電腦面前度睇嘢，你梗係覺得，喂，𠵱家要走喇，𠵱家唔使走喇，你梗係好多意見，邊個會清楚得過企喺條街度嗰個啫！佢企喺個街度，佢所有嘢係收緊訊息，我覺得對小朋友要有返多少少信念。當然啦，好細個嘅時候會有好多情緒嘅驅使，又或者佢未必會去盤算恰當嘅方法，但係佢哋唔係蠢人，都要相信佢哋囉！」
今年40歲的卓韻芝當然年輕過，她當年是不少同輩年輕人羨慕的代表，13歲已考入商台當兼職，中五畢業後正式成為DJ，獲俞琤點名力捧。「嗰陣時係好好彩㗎，都唔使要見證呢個夏天，我從來都覺得自己好彩，真係㗎，即係你細個講嘢有人想聽喎，呢個已經係好幸運啦，跟住你會有一個渠道去同同年紀嘅人溝通，跟住有一個渠道就係同大啲年紀嘅人溝通，啲前輩會打電話嚟，咦，你寫劇本㗎，呢啲我係喺好細個嘅時候已經感受晒所有social network！我本身已經覺得自己係幸運嘅，不過𠵱家去望𠵱家嘅年輕人，我諗每人都真係過唔同嘅命運！」
這個世代的年輕人沒有出路？「所以我覺得Charles Dickens（狄更斯）真係講得好好，佢話呢個係最好嘅時代，亦都係最壞嘅時代；呢個係信仰嘅時代，亦都係懷疑嘅時代；呢個係智慧嘅時代，亦都係愚蠢嘅時代……所有嘢嘅底樁呀，即係底蘊個面目，係一次過全部浮現。我覺得如果喺好細個嘅時候經歷呢樣嘢，當然係辛苦啲啦，但係我覺得呢一堆嘅問題，其實係全香港人一齊經歷，一齊對質緊，冇關年紀事囉！」
2006年卓韻芝因懷念亡母，一時想不開在家服藥自殺，曾親身經歷生死一關，對於生命當然更加珍惜。「我諗我經歷咗生死一關之後，首先梗係會有老土嘅一面出咗嚟，就係唔好死呀，生命真係好好玩㗎，我係一定會有咁樣對其他人嘅勸告；另外我覺得有比較底蘊嘅改變，就係個人好多嘢都冇乜太大所謂，即係最老土嗰句就係，死都試過咯，好多嘢都唔使咁計較，想做咪做囉！」
送一個Project畀香港人
死去活來，卓韻芝說，她不是一個活在過去的人，「其實冇話成日去掛住媽咪囉，因為我唔係好活喺過去嗰啲人，我都係向前望，有時我都會好希望睇吓佢嘅睇法，即係有時遇到一啲大嘅問題，就會諗唔知我媽咪會點睇呢，佢教到我啲乜呢，有時遇到一啲好靚好靚嘅風景，我又會諗，如果媽咪喺度，佢知道我睇過呢啲咁靚嘅風景咁就好喇！」
去年卓韻芝成為人妻，與從事電影美術工作的男友梁子賢結婚，她說：「分別又其實唔大，因為我哋又唔會話特別去管束對方，我做啲咩，佢又會話做吖做吖，佢做啲咩，我又話做吖做吖，硬撐呀！咁又同婆婆嘅關係勁好啦，婆婆錫佢多過錫我囉，婆婆有時自言自語，使唔使煲湯呢，我話唔使，佢話唔係喎，你老公要飲喎！」
「阿婆金句」依然不絕，只是年紀大聽力差，「聽唔到嘢，越嚟越聽唔到嘢，都唔想聽嘢啦！我話得㗎喇，唔使聽㗎喇，唔使理人，我係咁縱容佢囉，唔使理人！」鍾意食就食，「我反而叫佢唔好咁多包袱囉，譬如佢唔敢食雞皮啦，又唔敢食魷魚，但係其實佢係好鍾意食，咁我都有同佢傾過，其實都差唔多時間食得喎！佢同我生活係勁開心，佢鍾意食就食，半盒鳳梨酥俾佢食晒喎，半盒喎，嗰度60斤糖喎，咁佢又食得瞓得，我覺得去到呢個境界，夫復何求吖！」
婚後不打算生B？「我點知呀，快啲光復吖，光復我就生呀！哈哈哈！唔知呀真係，呢一刻我都唔係特別計劃任何嘢！」
去年與男友結婚，婚後依然與阿婆同住，三口子開心生活。互聯網圖片
當前急務進行的，是一個收集夢境（真係發夢）的計劃，「我𠵱家整緊一個邀請大家提供夢境嘅小企劃，真係講緊夜晚發夢嗰啲喎！我從來都唔發夢，即係成日發夢都唔記得啦，我仲要喺朋友群中好引以為榮，好啦，結果𠵱家呢，我成日發噩夢，啲夢好長，好恐怖啦有啲，有啲就好古怪，於是我突然間就好想集合呢啲夢囉！我𠵱家嘗試去集合呢啲夢，睇吓點樣去interpret（表達），我諗我想送一個project畀香港人，即係工作以外，我想寫作以外，都想送一個project畀香港人！」
香港人，好困惑。卓韻芝說：「我收集到嘅夢呢，好奇怪，冇乜憤怒（夢境）喎，當你以為香港人係好憤怒，但係可能更多嘅係困惑……即係同我哋去睇一啲新聞好嬲嘅時候，但係其實最底蘊個感覺係，點解會咁？所以我覺得《願榮光歸香港》頭兩句歌詞真係寫得好好，佢兩句個頭都係咁樣起，『何以……』即係why，即係發生緊乜事呢？係困惑。」
願榮光歸香港。
卓韻芝說香港人要驅魔，「最惡魔咪就係你心入面嘅恐懼囉！」
【後記】爆粗大會
訪問這天，卓韻芝一早有工作在身，參與不了「12.8遊行」，惟有晚上相約在黃店訪問，「我覺得呢個圈有自己一個成功嘅玩法就梗係好啦，我都想你成功，咁黃店就搵我做KOL㗎嘛！哈哈！」
問她如果再搞棟篤笑，香港人仲笑得出？「一定笑得出，因為大家入去爆粗咋嘛，其實我唔關心你講乜嘢大智慧金句呀，唔需要金句㗎喇𠵱家，大家一齊去（爆粗）！我嗰日就係諗，不如整一場完全唔關事，畀大家爆吓粗啦，哈哈！當然做棟篤笑唔係咁片面嘅嘢，不過𠵱家大家好似係要一個爆粗大會囉，你會唔會入場爆粗呀？」
化妝：ShuenKong of WiLL Wong
髮型：Hermes of Muse Hair
場地提供：老二花廳 |  0 02019/12/22, 3:37:35 下午 |
|
