https://hk.finance.appledaily.com/finance/20191016/2XLHFBJJ43WGBHDE7NDH4QJE6Y/
【冰說聰明】在賭城起一個交易所 - 青冰
今年是澳門回歸20周年，阿爺送咗份厚禮畀澳門，就係在澳門成立證券交易所的方案已呈報中央。資料圖片
author
專欄作家 :
青冰
幾個月前，青冰想起今年是澳門回歸20周年，斷估中央都會送份厚禮畀澳門，不過思前想後都諗唔到係乜。剛剛的周末，廣東省金融監督管理局長何曉軍話，在澳門成立證券交易所的方案已呈報中央，希望發展澳門成為人民幣離岸市場的納斯達克，這份厚禮勁過出奇蛋啊。
點解會在一個賭城起一個交易所，相信要咁上下慧根先睇得通，不過強如美國亦辦不到，拉斯維加斯除了搞賭及旅遊業，其他都唔掂，如果澳門能夠成功，山姆大叔都要俯首稱臣。青冰個腦海忽然想起了食神的一幕，當火雞姐同鵝頭爭奪瀨尿蝦及牛丸的擁有權時，史提芬周爆咗一句：溝埋嚟做瀨尿牛丸吖笨，食神亦因瀨尿牛丸成功而翻身，所以溝得埋拉斯維加斯及納斯達克，真係不得了。
講返股票，青冰本以為澳門要大搞金融，在本港上市公司中，搵持有澳門金融機構的，應該冇死喇啩，閩信（222）手持澳門銀行業務，應該相關吧，點知一睇，隻股完全冇成交的，講乜都冇用啦。而周一開市時，炒澳門納斯達克概念，市場認為是利好濠賭股，全部大升，至於點解會有關，未必有人答到，反而持有澳門住宅物業及商場的信德（242），看似較受惠，但周一只升1%，所以整件事的結論係，認真便輸了。
局長提了另外一點，值得細嚼，話現時廣東省有600家上市公司，但卻有四萬幾間國家級新興企業，反映滬深交易所不能滿足需求，但青冰用逆向思維諗諗，究竟係滬深做得唔好，中證監把關不力，還是企業根本未達上市要求，所以得咁少呢？講講吓就開始明白納斯達克的重要性，將未夠班的企業搬去納斯達克，讓投資者可以玩高風險股賭一手，賭錢亦正是澳門的專長，相輔相成，一個字：掂呀！
青冰
http://fb.com/chingbing888
本欄逢周四刊出 |  0 02019/10/17, 9:26:30 晚上 |
|
