https://hk.lifestyle.appledaily.com/lifestyle/tech/daily/article/20191008/20782672
【黑鏡線索】點解搞到去Starbucks齋坐唔飲？ - 宋漢生
政治怨氣流竄去埋消費，可以揀唔去唔食，又可以揀坐低唔食。
【黑鏡線索】
民怨累積，本來上街爆。但吓吓咁唔係辦法，於是發明議會呢樣嘢，等大家搵代表，喺指定時間，指定地點，按指定程序，去宣洩。因為喺其他因素不變下，民怨唔會無端端自己消散，可以叫做民怨守恒定律。
即係好似，你嘅配偶，因某事嬲咗你。你聞到味，可以懶醒，避來避去，佢一入房你就去沖涼，佢一沖涼你就即刻熄燈扮瞓着，但其實最終都係會爆，火藥引可能係又放隻襪喺路中心，或者係又冇放低廁所板等等，總之都係走唔甩，心存僥倖只係自欺欺人。
換言之，議會係為政權維穩有益，但就係有當權者，好似唔明，覺得電掣個fuse好無謂，走去拆咗佢，覺得咁樣方便啲。見個洗衣機有個位漏水，夾硬塞住佢就當冇事。佢以為議會阻頭阻勢，又係英國佬陰濕埋下嘅炸彈，以圖推翻鄧總設計師成日講嘅「英國人做到的，中國人必定做得更好」。莫講話冇系統設計嘅頭腦，連死跟本說明書，都做唔到，不斷懶醒嘅結果，係幾好嘅嘢，都俾佢用到爆炸。
議會被閹無助疏導民怨
議會嘅功能，係處理政治問題。「政治問題政治解決」，即係「政治問題議會解決」。原本個議會已經係半個閹人，有人為咗貪快貪方便，懶醒咁閹埋剩返嗰半，走去DQ以十萬票計選出嚟嘅民意代表。咁估都估到，啲民怨唔會大家骨一聲吞落肚屙出嚟當冇事發生，至多係時辰未到有啲lag time。
議會閹咗，民怨不滅，實會四出流竄。流去邊？好明顯，會流去街頭，因為本身議會就係發明嚟將政治帶離街頭，呢點今次唔再細述。但仲會流竄去邊？可以係三權裏面，另外嗰兩權。流竄去行政，執法機關，就瞓身做政治打手，剩係拉一邊，另一邊就搭晒膊頭。一邊就開槍打心口，另一邊就護送離開。聲譽一鋪清袋，全部變過街老鼠。法院呢，本來唔係用嚟處理政治問題，但當議會閹咗，咁好多判案，喺大家眼中，就變得好政治。法官係個法律技術人員，你叫佢用惡法審暴動，咁佢就惟有專業咁跟惡法判，好多市民就會覺得，嘩，判得咁政治，隨時就去圍法院，因為議會閹咗，惡法再冇機制檢討。
即係話，你逼政治走去行政，走去司法，政治問題唔會解決到，因為根本佢冇咁嘅功能。不特止，仲隨時逼死埋另外兩權，威信蕩然無存，連佢哋原本嘅功能都廢埋。即係當權者為求自保，不惜三權攬炒，一齊陪葬。
日常生活政治化
除此之外，學利世民兄話齋，政治仲可以流竄去商場。既然議會代表都冇埋，惟有捲起衫袖自己代表自己。本來大家買嘢，幫襯邊間，大概係考慮質素價錢，但當政治問題不能政治解決，就連買嘢都政治化。同朋友傾嘢，避開Starbucks，去Pacific Coffee，點知原來屬於華潤，除咗齋坐唔買，都係時候發掘一下獨立小店。有朋友攞個美心系清單一睇，先發覺自己張AE卡，好多優惠，都係屬於美心系，而家放棄呢啲優惠，年費都唔值，當堂連張卡都廢埋。有朋友無端端text嚟，問點樣唔搭黨鐵由金鐘入將軍澳，呢個時候，就會發覺，政府多年黨鐵優先政策既惡果，係今時今日有啲區，真係最好唔使去，亦有朋友因此考慮買車。自己頂唔順個user experience屬垃圾級嘅巴士app，裝番個citymapper app即刻心曠神怡。
本來溫水煮蛙，點知777走去開大個火，將個系統亂咁舞，推到極限爆炸。好喇，隊爆咗，竟然都繼續用同一思維，變本加厲，以圖不停用警暴壓住，甚至「唔緊急」咁用緊急法，去繞過埋全閹嘅議會，連全閹嘅議會都嫌阻頭阻勢，鋪定路之後隨時連區議會選舉都廢埋，真係@#xyz。所以話，咁多件事，由頭到尾每一步，其實都係同一件事，都係同一個作俑者，邊個係實質真攬炒、真焦土、真暴力，將淘寶版一國兩制，進一步推向一國一制，清清楚楚，永遠冇得洗白。
撰文：宋漢生 |  0 02019/10/08, 10:46:18 晚上 |
|
