https://www.facebook.com/Leesimon.hk/photos/a.547054975347888/2340445202675514/?type=3&theater
二，曾幾何時，香港人返大陸消費，返大陸買樓。我記得千禧前後香港經濟曾幾差到一個點，就連政府都話要開陸路離境稅[1]。雖然當時政府話目的係要擴闊稅基，彌補財赤，而唔係話要「鼓勵」留港消費。但好明顯，當時香港人返大陸消費係一個幾咁普遍嘅現象 [2]。當其時，冇乜話政治正確不正確，更加冇話一定要「顧存大陸」。
三，「當時香港人窮，不過大陸更窮，咁香港人咪返去消費囉。今時唔同往日啦⋯⋯」牛頭角順嫂或者會咁諗，但我希望呢個版嘅讀者會有興趣從另一個角度了解發生過咩事。
四，一切都要由 1997 年亞洲金融風暴講起。話說呢幾日有唔少人講返打大鱷，其實嗰一幕亦只係成件事其中一個高潮。甚至乎可以講，呢一幕精彩還精彩，但對救市同救人來講，意義不大。如果大家記得，政府掃貨之後，成個市乾晒塘，跟住成個月大市好似食咗大麻 stone 咗。一直到 LTCM 爆鑊美國聯儲局救市，先至出現起色。
五，睇返匯率問題。1997年7月中國外匯儲備 1259 億美元，全界排第二；而當其時香港嘅外匯儲備大概 850 億美元，全界排第四。不過，其實就算將兩筆錢加埋，都唔係好襟燒。
六，外匯儲備同金融系統穩定，嗰係就咁規模大小。即係你起條可以抵受百年一遇洪水嘅防波堤，都可以遇上二百年一遇嘅大洪水。香港係開放形經濟，所謂外匯儲備水平係可加可減。
七，當年中國大陸嘅金融制度，仍然處於一個封閉狀態，其實至今大陸仍然係資金同貿易盈餘易入難出，所以先至引起美國終於唔忍你嘅局面。
八，話說香港 68 個月漫長嘅通縮期裡面，大陸嘅外匯儲備其實不斷上升。再強調一次，當時冇發生過大陸用外匯儲備「幫」香港。我見到有大陸網站「知乎」有人話，當時人民幣冇貶值，算係幫咗香港人㗎啦；又係知就笑死系列。
九，香港由於聯匯，所以匯率相對一籃子貨幣，睇美匯指數就差唔多。由 1995 到 2002 年，美元一直強勢，尤其係 1999 年 年到 2001 年，亦即係科網股泡沫個一期，美匯強到不得了。
十，普遍來講，當一隻貨幣購買力當對強，物價同資產價格就會受厘。香港 68 個月嘅通縮期，其實就係呢一段美元超強嘅日子。
十一，經歷過亞洲金融風暴到2004年嘅朋友，一定知道何謂「賤物鬥窮人」。亦都係呢個原因，我個人非常關注匯率對香港經濟周期嘅影響。
十二，話說回頭，當年都曾經有唔少人提出過要放棄聯匯，話代價太大。根據 Mundell Fleming Model，匯率穩定、資金自由流動同物價同資產價格穩定，三大宏觀經濟政策目標，必須放棄其中之一（放棄晒都冇話唔得嘅，邏輯上）。香港放棄嘅，就係對價格水平嘅控制。
十三，好多人講聯匯不是之處，但好少意識到佢嘅好處：由於港元變相等於美元，借港紙等於借美元，借美元等於借港元，匯兌風險極低，呢個亦都係香港國際金融中心地位嘅其中一個關鍵因素。唔好唔記得，六、七零年代，香港經濟活動仍然係工業貿易主導。反而進入八零年代，明明有前途談判咁大個陰影面積，香港反而發展出金融服務業，食正亞洲世紀條水，聯匯功不可歿。
十四，亞洲金融風暴，你可以話成也聯匯，敗也聯匯，亦都可以話成也亞洲，敗也亞洲。但正當亞洲小龍喘息轉營，中國大陸 2002 年底加入世貿。
十五，千祈唔好睇少貿易保護主義同政策嘅威力。當年中國加入世貿之後，出口工業好似食咗偉哥咁勁；由 2002 到 2007 年，可以話係中國近代經濟最風光嘅幾年。
十六，由 1997 年到 2007 年，香港真係來回地獄又折返人間；亦都係呢十年，香港變得更加受大陸經濟周期影響。2009 年美國金融海嘯，香港叫做安然渡過，某程度上都係因為經濟周期嘅相互牽動更加受大陸影響。話說回頭，2007 年嘅股市泡沫，相信大家都記憶猶新；港股直通車嘅一幕，震撼程度實在不下於 1998 年港府入市。當然，從更長嘅時間軸睇返，兩件事都冇長久嘅影響。
十七，另外，由 2005 年到 2015 年，無論香港同大陸都經歷非常明顯嘅角色轉變。2005 年後，雖然繼續有香港人返大陸消費投資，但事實係越來越多大陸人來香港消費投資；其中最主要嘅系統性轉變，係 2005 年嘅匯改。呢個轉變，亦令到有更多累積落嘅人民幣有出路。
十八，點解人民幣要有出路？累積更多資本唔好咩？資本其實唔單止講規模，亦都要講分配得有冇效率。資本困籠大陸裡面，結果係令到好多不合理嘅分配，亦都係所謂嘅「產能過剩」。第一次聽呢個講法，就係 2008 年左右。另外，2007 年港股直通車，都係一個排洪嘅構想。
十九，所以，如果唔從牛頭角順嫂嘅水平睇中港經濟關係，香港扮演嘅角色就係一個封閉國度嘅金融緩衝區。緩衝區，就一定受世界同中國嘅影響。
二十，2005 年到 2015 年，唔單止人民幣匯率相對強，其間美元亦都曾經弱過。呢段日子，亦都係香港物價同資產價格急升嘅日子；資產供應，股票由於可以任印，所以表面上冇升咁多。但如果睇香港股市嘅總額，就知道影響有幾大。至於磚頭，由於供應彈性相對低，所以價格升幅更加明顯。
廿一，所以返到最初嘅問題，人民幣轉勢，對香港資產價格一定有影響；但同時美元作為資金避險最後一站（就算 2008 年金融海嘯，美元一樣經歷急升），呢個打擊好易令香港出現世紀級嘅「資產價格調整」。我知，呢個論點我都講過，好多人都會話：「次次你都咁講㗎啦。」
廿二，話說諾亞起方舟，都比人笑傻仔。我只會話，持有現金係有代價，但你咪當係買將「低位入市」嘅期權要畀嘅期權金囉。重點係，到時記得 exercise 呢張 option，如果唔係期權金就白白蝕咗。
廿三，至於聯匯脫唔脫勾，我只會話，脫勾對借落美元借嘅企業係致命一擊，正路來講，唔可能響目前嘅情況發生。都係嗰句，香港國際金融中心地位，成也聯匯，傷也聯匯。任何制度都有一定副作用；但假如有朝一日香港棄守聯匯，削港元購買力，以後都冇人再信呢個城市嘅貨幣，香港亦唔再係國際金融中心。 |  1 02019/08/27, 7:16:25 晚上 |
|
