顯示圖片
粵語之卷 何堪再刪 (Ben Sir) - 歐陽偉豪
https://hk.news.appledaily.com/local/daily/article/20190824/20754785

粵語之卷 何堪再刪
(Ben Sir) - 歐陽偉豪



保育粵語嘅課題,我一直都唔想喺政治風暴裏討論,因為一沾染到就好麻煩。2014年佔中,我喺群眾裏面只係講語言邏輯,佔中過後,我先同傳媒做撐粵語嘅訪問,政治同粵語分得開。去到而家反送中時代,我極之克制冇喺facebook講保育粵語,最多都係分析時下一啲廣東話嘅特別用法。

直至網上傳出香港中學文憑試(簡稱DSE)嚟緊9月有個諮詢到期,內容係刪除廣東話口語試卷,改為校本評核,而有傳媒早前同我做嘅有關廣東話嘅訪問同一時間刊登,咁啱《蘋果》邀請我寫文講下刪除廣東話說話卷嘅睇法,於是我就喺正政治風暴嘅風眼中,同大家分享我嘅睇法。

太技術性嘅問題我唔打算講,總之,任何考試制度,試卷考啲乜,又或者應該考啲乜,只要唔係毒藥,只要公平,其實冇所謂對錯,冇所謂絕對嘅好與唔好。我只係想講一個關係,就係時下中學生嘅口語特點同社會需要呢個關係,用嚟表達我反對刪除廣東話說話卷。

母語同母語嘅高階訓練係兩個概念。母語唔使喺學校學,喺屋企牙牙學語就自然學識(學術上用習得、獲得)。好多人以呢個原因否決廣東話說話卷喺DSE嘅價值,認為母語人人都識講,使乜考?可能而家嘅題目的確有啲離地,例如:演講辭,試問中學生點樣想像自己係有名望嘅成功人士企喺台上演講?如果題目真係咁樣,咁咪改題目囉,改到貼地一啲,例如:點樣改善學生會嘅運作等等。考核學生講廣東話講得清晰、得體、有條理,呢啲就係母語嘅高階訓練,係要教、要學、要考,而DSE嘅說話卷就應該評估學生有冇呢啲高階說話技巧。

而家年輕人口齒不清有懶音,說話唔大方,莫講話要流暢動聽,第日要做網紅時,說話莊諧並重打動網民,甚至贏取客戶嘅信任,幫佢哋賣廣告;更加唔使講可以用廣東話作為辯論語言,喺議事廳上代表市民雄辯滔滔。呢啲高階口語技巧係建基於母語基礎之上。但係,而家你話要刪除DSE嘅口語試卷,冇錯,係減少學生嘅考試壓力,但同時又少咗一份廣東話高階訓練嘅意識同警惕。

講完上面嘅實際利害關係,而家講下一啲抽象嘅價值問題。

喺今年6月,香港語言學學會設計好一個廣東話基準試,等大眾有個評估廣東話發音標準嘅測試,目的就係有個大家公認嘅標準,就好似教育局嘅普通話基準試。呢個廣東話測試試題係由一班嚟自唔同大學嘅學者共同設計。正當廣東話受到高教界嘅認同時,DSE就剔除廣東話公開考核嘅部份。一邊進步,另一邊就退步。

廣東話好難得先喺DSE考試卷入面出現,獲得到社會各界嘅認同,呢個就係廣東話嘅考試地位同考試價值。我話「難得」,意思係指舊時我嘅年代會考冇,而家DSE有,從冇到有呢個過程好艱辛,教育局課程發展處中文組入嚟中大中文系同我哋開過好多次會,先確立到廣東話口試嘅地位。而家,你唔要廣東話嘅考卷,咁樣做唔叫剝奪廣東話嘅考試地位,我真係唔識形容。


廣東話依附DSE顯國際地位

DSE作為香港嘅公開試,有廣東話元素係體現香港嘅特色。如果刪除後只剩低讀同寫,陰謀論嚟講,可以吸引內地生來港考試,又或者香港學生索性考內地嘅高考仲乾手淨腳,反正高考都係考讀同寫。更重要嘅係,DSE唔係香港公開試咁簡單,佢係一個國際嘅公開考試,有其他國家認可,換句話說,藉住廣東話依附喺DSE,廣東話就有個國際地位,話畀全世界知:香港人考試係要考廣東話。

廣東話黐住DSE算係留低一點血脈,如果將佢從考試剔除出去,個象徵意義就係減少廣東話嘅國際價值。咁你有冇其他嘢做個交換,提升番佢嘅國際地位吖?冇呀。而家,你話畀我聽廣東話說話卷留番喺學校裏面做校內評核,即係本來可以面向世界嘅嘢,好快會變成收收埋埋,廣東話由外向變成內向,最後就會自閉。

廣東話說話卷,要從考試中抹殺;廣東話文字,又話難登大雅之堂唔可以入文,咁廣東話呢個語言剩番幾多生存空間呢?粵語之卷,何堪再刪?壓抑廣東話嘅人,唔係講英文,唔係講普通話,而係講粵語,簡單一句,粵語殺死廣東話。

歐陽偉豪
(Ben Sir)



下一則
下一則
刪卷是政府趁火打劫嗎? (陳仁啟)
Good0Bad02019/08/24, 9:54:49 晚上
本貼文共有 0 個回覆
本貼文共有 0 個回覆
回覆時事臺