https://hk.sports.appledaily.com/sports/realtime/article/20190717/59830539
【逆權運動】香港隊長批政府搞分化 陳偉豪：後生仔多點知識係原罪
香港體壇及各體育總會長期受到建制派控制，運動員少有就政治問題發聲，前港足隊長陳偉豪是少數敢言一人，今次修例風波他亦有帶同太太參與遊行，相片曝光後獲市民大讚是真正香港隊長。陳偉豪談到守護香港全靠勇敢站出來的年輕人，直言他們才是香港最出色的後衞。
相關新聞：【逆權運動】藝員怕封殺 體育人憑良心做巿民的事
在這個世代，不是很多公眾人物敢於向政府說不，尤其在左傾的體育界，運動員敢於站出來的更少，陳偉豪是少數。五年前的「雨傘運動」，他親身到金鐘、銅鑼灣及旺角了解年輕人在現場做些甚麼，今年初夏的《逃犯條例》修訂觸起民憤，令他繼2014年後再走上街頭，向政府表達訴求，不同的是，今次上街多了太太在旁。
37歲的偉豪坦言自小愛表達自己看法，或與性格有關，他說：「由細到大基本上係乜都講，當然要睇場合，好怕屈埋自己，鍾意講嘢去表達自己，可能得罪人都唔知，但唔會將啲嘢收埋，屈埋屈埋會屈到病，講咗舒服啲，大前提係唔傷害人就可以講。近年少咗，盡量唔公開表達諗法，但有傳媒約訪問會盡量配合，做訪問係想知事實同我嘅諗法，家陣做訪問會再講深入少少，可能同年紀大咗有關。」
相關新聞：【逆權運動】隊長仗義執言 對港足愛之深責之切
「雨傘運動」期間，偉豪與友人到場原意是了解實況，因不想單靠上網或看新聞，他說：「雨傘運動前，對政治冇乜立場，唔知咩係民主派同建制派，雨傘運動開始後唔想只睇傳媒嘅報道，所以親身到場，現場接觸到呢班人，感覺完全唔同。當時好多人話係90後係廢青，但親身接觸過後對後生仔完全改觀，同我接觸嘅90後球員完全唔同，佢哋好有秩序，有禮貌，三唔識七，走嚟派飯派水畀我，唔亂拋垃圾，唔惹事生非，如果由佢哋決定香港未來應該靠得住，年輕一代有希望，同只接觸足球世界嘅球員有啲唔同。之後幾支持佢哋，佢哋有一種信念，唔講係咪犯法，有人做合法嘅事，但內裏都可以係十惡不赦。」
對比「雨傘運動」，偉豪指今次更大件事，因向來不看新聞，不理政治的太太也主動要求上街表達不滿政府的訴求，可看到事件有多嚴重，因為影響不止這代，還有下一代。「出嚟行只係出一點綿力，行5、6個鐘，真真正正靠一班比較勇敢嘅人，如果唔係佢哋，好多嘢已經過咗，全靠佢哋暫時守住，佢哋係出色守衞，我唔係。太太從來唔提政治，太太叫出去行，當然好，非常好，呢啲情況要出嚟，7.1好少行，呢次關乎下一代嘅事，要盡啲綿力。」
不怕運動員身份而懼怕表態嗎？偉豪強調，因為以一般市民身份參與反修例遊行，如連遊行也懼怕，那就真的沒希望，並指自己只是低調遊行：「唔通下次要帶埋飛虎隊頭套遊行？我覺得唔使，如果咁樣都算有問題，咁就係佢哋嘅問題，所以冇得驚。自己亦從來唔會主動叫人遊行，每個人立場唔同，出嚟行已預咗俾市民認到，見到好多人，有打招呼，我都係香港人啫，正常遊行，唔使戴口罩，唔怕俾人認到，怕咩？又唔係壞事，以遊行表達訴求，香港仲有自由，可表達訴求，影響唔止下一代，成件事對香港冇着數，有人拎公義出嚟講，唔好玩啦，攞啲口術去製造啲藉口推一啲嘢，呢啲係個人利益。」
事件上，像他這樣的中年人，除感無助，還要靠能力其實有限的年輕人「衝」，偉豪自感羞愧。「因為有家人，好多嘢要諗清楚，可做嘅有限。當年讀書留班唔覺得醜，仲同阿媽講又留班，家陣坐喺屋企睇新聞，幫唔到年輕人，有少少無助，亦自責好冇用。網民話我係香港隊長，其實只係前香港隊長。」
對於年輕一代不惜賠上前途也要抗惡法，偉豪的論點是年輕一代不希望香港再變，上一代卻反斥這代「搞搞震」：「明唔明班後生仔幫緊你哋，家陣係邊個加緊啲嘢，改呢啲，又改嗰啲，大家諗吓以前嘅和諧，家陣邊個變緊呀？係個政府變嘛，上一代話唔想變，家陣話班後生仔出嚟反抗係錯。」社會出現嚴重分歧，年輕義工於各區守護遍地開花的連儂牆也遭反對者襲擊，可想像社會對立有多嚴重。
偉豪坦言家人反對上街，已到沒有甚麼討論空間的階段，彼此成長年代不同難免有代溝，但已到沒有討論空間則始料不及：「我哋呢代唔同，有小朋友要供書教學，生活好艱難，社會分裂係邊個搞到咁？係政府。兩代人有代溝，惟有避免講呢啲事，踢波同湊孫，諗法唔同就唔傾呢個問題，以前香港好，在於有自由，家陣係嚟鬧你，冇晒和諧。」他指其實大家沒有仇恨，意見可以不同，應可找到包容點。
對香港人來說，這段時間確實很困擾，偉豪建議大家不開心時應減少上網，希望令情緒冷靜些，自己暫時不看電視，讓給兩個兒子看，如看便看幾個頻台的報道，只看某一個電視台容易「領嘢」。
記者：曾雁平
攝影︰李家皓
--------------------
【每周送10萬】
升級壹會員獨家尊享，立即參加10萬火急大抽獎 !
*推廣生意的競賽牌照號碼：52302-9
--------------------
《體蘋果》陪你睇波講波
https://www.fb.com/appledailysports
運動員少有就政治問題發聲，前港足隊長陳偉豪是少數敢言一人。
37歲的偉豪坦言自小愛表達自己看法，或與性格有關。
陳偉豪認為年輕人不是暴徒：「佢哋好有秩序，有禮貌，三唔識七，走嚟派飯派水畀我，唔亂拋垃圾，唔惹事生非，如果由佢哋決定香港未來應該靠得住，年輕一代有希望。」
上一則
上一則
【逆權運動】香港示威者 登《時代》最具影響力互聯網人物榜
下一則
下一則
【短片】【書展】抗爭時勢好書推介 讀本好書再上街
【逆權運動】藝員怕封殺 體育人憑良心做巿民的事
【逆權運動】隊長仗義執言 對港足愛之深責之切
【逆權運動】炮轟足總鳳凰計劃 青訓應由校園做起
|  0 02019/07/17, 9:10:45 上午 |
|
