【Now.com娛樂】活喺呢個時勢嘅香港，做歌手真係唔容易。歌手係靠把口搵飯食，但就往往由把口出事，開口就瀨嘢，咁好難做喎。
瀨嘢都分好多種，一係好似譚詠麟咁，胸有成竹，睇準差佬呢啲高尚職業被人踩到變地底泥，佢呢啲老叔父，曾經嘅香港第一男歌手，點可以唔出嚟幫差佬講幾句好話，點醒啲無大無細嘅𡃁仔？
佢錯喇，而家佢都好後悔，後悔到要人安慰，幾乎可以形容為千年道行一朝喪。佢衰乜？衰戇居，離地，完全錯判形勢。唔係講緊邊一方強定弱嘅形勢，而係take side要背負幾多後果嘅形勢。
中立嘅，都未必有好下場。周柏豪就表演畀大家睇，咩叫真正嘅無辜。佢一直以來，應該話咁多年來，都係擺出個避戰嘅態度，非必要都唔主動講自己意見，佢係聰明人，知道多一事不如少一事。咁無壞㗎，咪等人哋解讀囉，反正佢唔開口，你都好難搵位入佢。
但佢開咗口，不過只係講啲好中立嘅嘢，叫人登記做選民之嘛！就被啲盲毛叫佢唔好上大陸搵食，仲幫佢改咗個名，叫「港獨豪」。
登記做選民同叫人唔好周圍掉垃圾、唔好醉駕、同埋得閒去捐血無乜分別，都係想人做個好公民。民主派要票，建制都要票㗎！唔通政府畀錢落廣告叫人登記做選民，係政府資助港獨咩？呢啲係咩邏輯？
唔講道理仲要勁激烈，上綱上線就梗㗎啦，仲要一嚟就話佢港獨，無得一步步嚟，完全二分法非黑即白。所以柏豪同校長唔同，佢無錯判形勢，佢衰乜？係衰做乜都錯！畀著你，係咪都會瀨嘢㗎喇，你寧願自己衰戇居，定係衰無辜？
文：魯連 |  0 02019/07/05, 2:00:17 下午 |
|
