顯示圖片
達明一派《回憶有罪》登iTunes榜首 明哥念六四30 「願廣場上聲音不會滅」
https://hk.entertainment.appledaily.com/entertainment/daily/article/20190601/20692576

達明一派《回憶有罪》登iTunes榜首
明哥念六四30
「願廣場上聲音不會滅」


黃耀明(右)與劉以達的達明一派,在六四30周年推出新歌《回憶有罪》,以歌聲和影像回憶六四。資料圖片

敢言的達明一派,在六四30周年推出新歌《回憶有罪》,以歌聲悼念,歌曲周一在iTunes甫上架即登冠軍,《蘋果》昨日獨家播放新歌MV,MV以動畫重現六四屠城畫面,令人心酸。黃耀明接受訪問時,提到歌曲最尾寫道:「願廣場上聲音不會滅。」他希望大家繼續發聲,追求民主自由。

相關新聞:【走在最前】撐雨傘運動被內地封殺

今年是六四30周年,30年前的6月3日晚上至6月4日凌晨時分,中共下令軍隊鎮壓民主運動,民運學生血流成河,一幕幕壯烈的畫面,事隔多年仍難以令人釋懷。為紀念六四事件,達明一派在周一推出新歌《回憶有罪》,隨即登上iTunes排行榜第一位,昨日《蘋果》獨家首播《回憶有罪》MV,用歌聲和影像回憶六四。


重現屠城畫面

《回憶有罪》由劉以達作曲、林外填詞,MV以3D wireframe製作,畫面開首是在電腦打出8964檔案名,輸入密碼後,卻出現「ERROR 404」。MV用動畫重現當年六四屠城的畫面,包括學生用血肉之軀擋坦克車、廣場上的萬點燭光,延伸到香港的雨傘運動,黃傘遍地開花。

黃耀明接受《蘋果》電話訪問說:「要唱呢首歌其實好簡單,1989年北京學運,其實啟蒙咗我同香港人對於民主自由嘅追求,30年之後,我覺得喺中國內地或香港,呢個情況係完全冇改變,反而比當時更加敗壞,所以我覺得我哋有呢個責任去記低呢啲歷史故事,唔好畀我哋忘記,因為個政權就係想我哋忘記,所以寫咗呢首歌。」

為香港發聲而受內地打壓的明哥慨嘆:「喺呢個咁極權統治之下,乜嘢事情都好容易變成犯罪,燭光、回憶都會係一種犯罪,創作、唱一首歌都好容易係一種犯罪,所以我哋更加要喺仲可以唱、仲可以創作、仲可以發聲嘅時候,我哋應該繼續去發聲。」

相關新聞:【網民同悼】「六四畫面記憶猶新」


【8964 ERROR】《回憶有罪》MV開首,打入8964的檔案名,卻顯示「ERROR 404」。


【重現坦克人】MV以動畫形式重現六四最著名、學生以肉身擋坦克的「坦克人」畫面。


【單車運傷者】六四槍聲一響,學生以單車運送或乘載受傷同伴奔波求醫。


【燭光悼六四】MV中出現萬點燭光,悼念六四死傷者。


【黃色雨傘陣】香港在14年發生雨傘革命,MV中亦出現多把黃色雨傘,喻意黃傘遍地開花。


六四晚會獻唱

30年前六四,達明唱了《天問》,今年達明唱《回憶有罪》,明哥說:「我諗同30年前唱《天問》有好唔同嘅感覺,覺得30年之後嘅中國社會或香港社會,喺民主同自由項目上係開倒車、退步咗好多,社會係更加敗壞,但我哋要堅持繼續記低呢啲發生過嘅事,無論係天安門事件或雨傘運動,因為好似林夕歌詞裏面所講『烈焰幻滅過總有煙,歷史假使有人定被發現。』所以我哋唔需要咁快就覺得被擊敗;然後喺歌曲最尾,林夕寫『願廣場上聲音不會滅』,我諗我哋繼續創作、繼續寫呢啲歌,大家繼續寫文章,就係希望呢啲聲音不會滅。」


八九民運爆發期間,歌手舉行《民主歌聲獻中華》為民運籌款,黃耀明也有演出。資料圖片


八九民運1989年4月中旬在北京天安門廣場展開,6月4日凌晨時分,解放軍及武裝警察部隊強行清場,釀成死傷無數。資料圖片




明哥又指已經決定出席今年的六四晚會,並會上台獻唱《回憶有罪》:「無論係天安門、金鐘或維多利亞公園,呢幾個地方都係屬於人民嘅廣場,所以我決定喺6月4日晚上,喺維多利亞公園獻唱呢首歌曲,願廣場上聲音不會滅!」

採訪︰皓騫

下一則
下一則
【走在最前】撐雨傘運動被內地封殺

【走在最前】撐雨傘運動被內地封殺
【網民同悼】「六四畫面記憶猶新」
敢言杜汶澤搞團遊馬拉
Good0Bad02019/06/01, 6:36:33 晚上
本貼文共有 0 個回覆
本貼文共有 0 個回覆
回覆娛樂臺