https://hk.lifestyle.appledaily.com/lifestyle/columnist/左丁山/daily/article/20190422/20661140
排隊成本 - 左丁山
一位朋友不幸染上危疾，好彩檢查得早，及時發現，醫生叫佢盡快施手術，以佢嘅收入，又無買危疾保險，應該入公立醫院，但一查詢之下，知道香港有好多危疾病人，排隊等候施手術，要經年累月，於是家人叫佢唔好再等，一於咬緊牙根，搵私家醫生，入私家醫院施手術，一切順利，用咗二三十萬元後，算是財散人安樂；名醫叫佢：「你不如以後到瑪麗醫院做跟進工夫如電療，攞藥等等。」呢個世界要講現實，朋友當然遵從意見，到瑪麗醫院求醫，上星期係覆診之期，吃過午飯就去瑪麗睇下午籌，等到三點，醫生還是睇緊上午籌，到左丁山入咗馬場刨馬嘞，收到佢短訊：「等到嘞。」現在入公立醫院，無論邊間，排隊四五個鐘頭係等閒事，公院醫生人數高度不足，無可爭辯。左丁山兒童時代，每逢自己或媽媽有病，就要陪佢去九龍醫院門診部排隊攞籌，門診部在亞皆老街，行車經過可以見得到，現在不知作何用途了。左丁山每次去眼科醫院，的士總會經過九龍醫院舊門診部，勾起童年回憶，嗰陣時天未光就去到門口排隊，要等到九點幾十點先至見到醫生。依家呢，左丁山每次去眼科醫院之中大眼科部（私家症），裏面循例有好多人，總要花上兩個小時或以上先至可以攞藥鬆人，計番輪候之機會成本，實在難以估計。
計算時間之機會成本，大概可用時薪計算，薪水愈高之人，等候時間嘅機會成本愈高。譬如基層工人時薪五十元，在公立醫院睇一次病，要等候平均四小時，機會成本就係二百元；如果一位港鐵公司行政總裁以年薪1200萬元計，時薪難以計算，粗略咁當佢每日日薪係32876元，每日工作12小時（馬雲之996工作模式），每小時時薪係2739元，等四小時就係約11000元，又幾多喎，在此情況下，行政總裁當然選擇立即去中建大廈預約睇病，排隊時間，連埋診金，行政總裁之睇病成本可能係四千幾蚊，實際上慳番唔少，故此收入高之人唔會走去公立醫院排隊。從另一角度睇，長期有成千上萬人，每日在公立醫院排隊，香港社會每日損失之機會成本及生產力大到難以計算，實情會拖低本地生產總值之增長率。解決方案何在？任何一位經濟系學生都識，就係擴容，改革供應面。偏偏就係特首與決策高官不懂不理，奈何！
左丁山
電郵 :[email protected]
上一則
上一則
機艙之向上游動力 (陶傑)
下一則
下一則
剛剛二級地震，很慶幸也很高興 (林夕) |  0 02019/04/22, 2:46:35 下午 |
|
