https://hk.news.appledaily.com/local/daily/article/20190422/20661436
【佔中九子罪成】
「圍牆內找個角落 靜思兩小時」
李永達：六四夜心連維園
李永達早前相約葵青地區好友攻打四方城，笑談未來獄中生活。梁志永攝
嚴肅如爭取民主的佔中運動，抑或旨在放鬆的麻雀耍樂，民主黨李永達敢做敢找數，無畏又無懼。4.24前相約葵青地區好友攻打四方城，碰與上之間，話題離不開「冇酒飲點算？」、「夏天入面（監倉）好熱」。看李永達笑盈盈，實難想像他半個身已在獄中：「香港又唔係黑獄，基本例如飯食少啲、冇得飲酒，我受到嘅。」六四那一夜，縱然沒燭光，他打算面壁靜思兩小時，與維園的人共同度過。太太陳樹英未來一段日子沒有他在旁，李永達臨別贈愛言：「佢（陳）要好好照顧自己喇！」
記者：許偉賢
相關新聞：陳樹英：等佢出獄去北極慶生
「食！坐監前食到最後一鋪糊，呢次叻番次喇啩！」於佔中案被判煽惑他人犯公眾妨擾罪成立的李永達直言判刑前的兩周保釋期是意外收穫，「多咗兩個禮拜自由，多咗八個飯局」，朋友再度把握最後機會，邀約他食飯飲酒打牌。
黨友兼雀友單仲偕已預留紅酒，待李永達出獄後共酌。
臨別約葵青友單仲偕竹戰
這天於戰友暨雀友的黨友單仲偕家中，舉行約兩個月一次的「葵青之友」麻雀戰。「魚腩」告別賽，雀友未鬆章，大家照舊一切如常。「其實由第一日到𠵱家，我都係咁講，唔想個審訊或者判決，太多影響日常生活」，李永達直言朋友近日無不「糾正」法官判詞：「佢哋話『喂！李永達，你邊有咁勁呀，你邊有煽惑到我呀，我哋好獨立㗎！』」
出得嚟行，預咗要還，李永達曾經指組織佔中是人生最大光榮；與李永達並肩多年的單仲偕也指沒有對李罪成感覺不值，換轉任何民主派老鬼，如果身處李當時位置，肯定人人都會做同樣的事，「都會承擔自己做嘢嘅後果」，關鍵是大部份人不認同因九子「煽惑」而佔中，「（律政司）告佢呢條罪名太騎呢」。
單仲偕曾經向懲教處打探，囚犯冬天可取多達七張氈，李永達卻更怕熱，早前已熟習晚上睡覺沒有冷氣的滋味，「瞓醒啲頭髮真係濕晒」；更難捱可能是被迫戒酒。聽罷單仲偕說「留咗一支08年Pichon畀你，寫咗你個名，等你出嚟飲」，李當堂又喜上眉梢。單續說：「祝佢一路順坐，出冊嗰日我會接佢。」白鴿黨葵青老孖寶，一貫談笑中兵來將擋。
相關新聞：佔中標誌設計師：好人冇好報
叮囑妻子：好好照顧自己
這天陳樹英沒現身，名字卻不時出現，雀友左一句「會叫阿Tree（陳樹英）多啲上嚟飲湯」、右一句「佢真係好放心你入去（坐監）？」李永達堅稱太太對他入獄做足心理準備，「冇乜點嚴肅傾，冇乜特別交帶」，但只要留意陳樹英的溫馨提示：「坐監都要整齊啲，咖啡杯毛巾咪亂丟！」甚至製作日曆卡給他每天劃一劃，好讓獄中也知道時日，一種孤寂，卻上心頭。
李永達說︰「我做嘢粗枝大葉，佢（太太）提我，我咪照做囉」，沒有自己在身邊，「我提咗佢喇，星期日盡量唔好一個人喺屋企，搵多啲人傾吓偈、生活豐富啲……佢要好好照顧自己喇！」
還有一點，不。能。忘。這一年的六四夜，望天未必見到星，圍牆內一顆心依舊與牆外的人相連，「冇蠟燭、冇手機（亮燈），我咪搵個靜啲嘅corner，自己喺間房入面，黃昏開始靜思，呢兩粒鐘唔做嘢、唔食嘢、唔睇書，就好似同大家一齊喺維園度過」。一如佔中案可上訴，李永達對平反六四仍有期盼，這刻拋開顧慮，漆黑可會不再面對？
上一則
上一則
六四館遭踩場 親共示威者稱屠城恰當
下一則
下一則
陳樹英：等佢出獄去北極慶生
陳樹英：等佢出獄去北極慶生
佔中標誌設計師：好人冇好報 |  0 02019/04/22, 11:13:11 上午 |
|
