顯示圖片
【「最關鍵」拼圖】
https://www.facebook.com/a12hkmo/photos/a.189501317739005/2282625988426517/?type=3&theater

高普入主利記三季有大半,球隊成長咗唔少,雲迪克及艾利臣加盟後成功提升利記到另一個層次,沙拿兩季以黎亦多次以一己之力將勝利硬生生拉到手,但要數最佳「無名英雄」,可能係怕醜仔文尼。

高普上任之時,利記千瘡百孔,利迷固然希望高普能夠帶領利記重上顛峰爭名逐利,但短期較為實際目標仍然係穩定地重返歐聯,至少正如高普所言,大家要由Doubters變成Believers,佢亦需要時間撥亂反正,畢竟羅馬非一天建造。

萬事起頭難,高普入主頭大半季係摸索期,縱使成功打入兩個決賽,但聯賽成績其實未有太大起息,嚴格黎講蜜月期都唔多長久。而接下兩個球季,利記經歷蛻變期,普遍球評家都認為利記頂盡係爭四份子,甚至只得第五、第六,而事實上利記對上兩個球季都係排除萬難,煞科戰先能夠鎖定第四,趕上歐聯尾班車。

沙拿高調地華麗轉身再戰英超、艾利臣突然成為利記N年最強門神、雲迪克被譽為世界最佳中堅,一切都成為焦點,甚至費明奴轉型為假九號位殺出新血路或雙閘掘起都係利迷或球壇熱話,反而文尼嘅光芒漸漸被蓋過。

文尼係高普年代第一塊貴價拼圖,起初其實利迷對文尼加盟亦未必有太大期望或興奮,但文尼加盟第一季已經火速融入球隊,成為利迷寵兒,順理成章成為當季利記最佳球員及隊友間投票嘅最佳球員,絕對係高普重建利記嘅第一批戰將。猶記得當年文尼出席非洲國家盃期間,利記及利迷嘅「慘痛」經歷,往事簡直不堪回首。縱使第二季鋒頭被沙拿完全搶過,但文尼仍然為利記默默付出,成為前線三尖刀嘅必然主力,近兩季都穩定地貢獻超過廿個入球。

文尼身先士卒成為高普利記第一代弟子兵,肩起復興之路嘅重任,三年過後,利記算係站穩陣腳,完成「穩定地重返歐聯」呢個最基本目標,經過幾年磨合與及陣容強化,利記亦成為功打入爭標組,被大眾公認最有力打破曼城壟斷嘅主要對手。歐聯係吸引球星加盟嘅籌碼,如果無歐聯參賽資格,配上利市無五光十色嘅奢華生活,單單以高普個人魅力,或只剩下球會輝煌嘅過去,足唔足夠令沙拿投奔晏菲路、令艾利臣拒絕車路士加盟利記、令雲迪克棄列強只想投利呢?相信大家心中有數。沒有文尼「協助」,愛華士點樣神操作,都未必能夠打動人心,收購上得心應手。歐聯效應亦確保利記財源廣進,單單歐聯豐厚獎金已經吸引,連帶其他贊助叫價力提高,FSG真係多謝你。

文尼效忠利記,信又好唔信又好,但無可否認呢三年文尼已經成為利記不可或缺嘅一份子,以上種種並非文尼一個人嘅功勞,但文尼絕對功不可沒,應記一功。如果今季能夠有一個美滿結局,文尼甚至陣中每一位都可以躍升為利迷心中嘅傳奇。

文尼,salute!
Good1Bad02019/04/17, 1:10:30 下午
本貼文共有 3 個回覆
#2019/04/17, 1:10:53 下午
#2019/04/17, 1:10:57 下午
#2019/04/17, 2:46:32 下午
本貼文共有 3 個回覆
回覆體育臺