「宇宙最強」甄子丹與太太汪詩詩及女兒於星期一晚現身尖沙嘴出席amfAR慈善舞會，子丹是大會副主席（新聞連結： https://bit.ly/2HTdHyp ），當日卻發生不愉快事件，令子丹一家三口嬲爆離場，詩詩在IG發文宣洩不滿，指自己如電影《綠簿旅友》情節中，受到種族歧視，最後tag「中國人不是東亞病夫」，而她接受《蘋果》訪問時提到對方態度差，感覺不被尊重及侮辱，希望講出事件，望在場的女兒看到不公平事不可啞忍。
《蘋果》收到當晚有份出席嘉賓報料，目擊當時情況，子丹一家三口入場時已未有受大會「星級」禮待，之後入到場內發現座位位置不佳，加上之前詩詩提及受到amfAR所委托的海外製作單位Mr. Boose團隊惡劣對待，覺得歧視中國人，故不滿離場。
《蘋果》今日就致電當日負責這個活動贊助、賣枱、籌款及傳媒管理的天機公關負責人鄭詩韻了解，她表示amfAR當晚是交給國際知名製作單位Andy Boose做製作，她說：
「嗰晚見到詩詩準備走，佢仲同我打招呼，好nice仲讚我條裙好靚，我問佢點解走？佢就講句『唔好意思』，之後我入到場問何超瓊（Pansy），點解子丹佢哋會走，有人同我哋講，佢枱位置好唔靚。」
作為活動的榮譽主席Pansy即幫手補鑊，將自己位於台中央位置的枱讓出兩個位給子丹夫婦，鄭詩韻表示：「Pansy話唔緊要，叫佢哋同我坐，我只得詩詩WeChat，Pansy終於搵到Donnie，但嗰時已入咗場，Donnie同Pansy講『多謝你，大家姐，你好客氣，不過唔好啦，因為我對於今日嘅安排係唔高興，我多謝你嘅好意。』」之後，鄭詩韻稱今次製作單位安排不周：
「當時冇人知道佢哋係星，當咗佢係一個普通賓客，當然我唔知點解發生咁嘅事，但係聽嘉玲姐咁講，去呢啲活動係要自己照顧自己喇，後尾冇人帶佢哋入去，可能座位唔靚，冇人幫佢哋協調，詩詩就聽到Mr. Boose講咗一句『求其畀個位佢』。」
問到當晚子丹所坐的位置是否不佳，鄭詩韻表示安排座位由大會處理：「我睇番子丹係坐頭15張枱嘅其中一圍，喺場內前排比較側嘅位，大會開60圍，其實有半間房嘅位唔靚過佢，但係可以好啲，畀我編排會編得更加理想，會喺中間。」對於詩詩指歧視中國人一事，鄭詩韻覺得amfAR沒對華人不尊重：
我哋合作咗五年，佢對我哋都好nice，好似我嗰日有個大陸太太問可唔可以安排佢同邊個坐，佢哋都即刻安排咗，可能佢哋嗰日唔係搵到amfAR高層，甚至搵到我或Pansy都會搞掂，但問題係我冇份排位。」
事情發生後，鄭詩韻已聯絡詩詩及amfAR做「和事佬」，而amfAR甚覺詫異：「我哋已經叫咗佢要為呢件事道歉，佢哋都好緊張，會給子丹佢哋一個交代。
我相信真係溝通不足，唔熟悉本地嘉賓。」鄭詩韻表示同一個地方，她們公關公司早前舉辦酒店開幕活動，也沒發生類似問題，會同amfAR反映下次由她們去處理接待本地嘉賓。
《蘋果》就聯絡過汪詩詩問到座位不佳問題，她以英語訊息回覆：「I already gave my feelings and comments. Any more regarding details I will not comment. Thank you! 」
此外，據匿名讀者向《蘋果》爆料，他當時身在現場，看到宴會廳大門未開，子丹與約20人走入會場要求公關接待，當時工作人員忙於準備開場，未能抽空協助，有人開始不停鬧人，稱「要見經理」、「點解冇人接待」、「點解待遇會咁」、「點解冇人帶位」等，讀者聲稱有人態度差、不滿大會安排座位的位置，但讀者不知道子丹何時離場。
https://hk.entertainment.appledaily.com/enews/realtime/article/20190327/59417914?utm_campaign=hkad_article_share&utm_medium=social&utm_source=twitter&utm_content=share_link&fbclid=IwAR0uN-XVnIRuEHHMuaJh1J353JiRRkwJNJGTDU_pWkn_M9D-gOW1Gk8SkRA |  0 12019/03/28, 12:42:45 凌晨 |
|
