https://hk.news.appledaily.com/local/daily/article/20190325/20640739
壹週刊：陳志雲×蓋世寶
低落中尋快樂
61歲的陳志雲與40歲的蓋世寶，曾經長期共事同一機構，其間兩人卻從未交談。
40歲的蓋世寶在無綫工作23年，工作量越來越少，今年3月，月薪被要求減至七千元而決定離開。61歲的陳志雲曾經是她的上司，統領無綫多年，曾經長期共事同一機構，兩人卻從未交談。
他們之間的無形聯繫，應該是蓋世寶的前男友、曾是「迷雲黨」成員的鄧健泓。這天，跟人稱「志雲大師」的陳志雲一席話，略有所悟的蓋世寶，坦言兩人若早點認識，事業路可能會比較好走。
撰文：肥A
攝影：黃志明 蕭敬漁
「點解女仔會喜歡鄧健泓」
陳志雲任職無綫時位高至總經理，曾經一人之下，萬人之上，被他賞識而獲演出機會的男藝人，當年娛樂圈稱為「迷雲黨」，王喜、崔建邦、鄧健泓是其中成員。
陳：陳志雲 蓋：蓋世寶
蓋：你會帶領某啲藝人，例如王喜先生。
陳：我冇帶領佢，邊個能夠帶領王喜？
蓋：鄧健泓先生啦，崔建邦先生啦。
陳：為何要稱呼先生？是你的舊愛。
蓋：大家都愛標籤他們是志雲黨。
陳（更正）：迷雲黨。
蓋：你介唔介意？
陳：我唔介意，正如我所講，我不覺得很多人或觀眾、讀者會認真去睇這件事，局中人鄧健泓或會好介意。
蓋：我冇問過佢。
陳：我當然唔介意。只係一個標籤，追蹤源頭，係因為我喺TVB有一個blog，其中一個觀眾幫我改這個名，我跟記者提過，於是出現了迷雲黨，我覺得幾得意。不過對自信心不強，例如鄧健泓這類憂鬱小生並不太好。他會以為，一般人覺得他做出成績，是因為我。他永遠表現似憂鬱小生。點解女仔會鍾意憂鬱小生？
蓋：我當時年紀小，不大記得。
陳：我相信係。你稍為成熟都應該不會，你意思即係話Sukie（太太石詠莉）……
蓋：我祝福他們。
陳：你的祝福好似詛咒，現在給機會你澄清。
蓋：我睇好他倆。
陳：其實我不只給機會幾位，只是沒提過其他人。如果自己有能力給有潛質藝人一個機會，都係一件好事。
「王喜話我老態龍鍾」
陳志雲說活到這把年紀，喜歡朋友坦率直接，不用再浪費時間猜測他們的話中話。蓋世寶絕對同意真正朋友毋須包裝。好友王喜，便是陳志雲心中有話直諫的交心朋友。
蓋：跟王喜是否最老友？
陳：其實我們並非經常見面，92年，他本身是警察，當時兼職商台，主持一個節目叫《妖獸都巿》，有一晚講了出位說話，廣管局接到好多投訴，我要回覆那些投訴而認識。他在TVB也跟我完全無關，是曾勵珍給機會他演出《緝私羣英》，我覺得他當時演戲一般，黎耀祥都有份演，我覺得他演得好好多，之後他也攞了好多獎。
蓋：有沒有跟這位朋友嗌交？他給人感覺好火爆？
陳：冇。如果要跟他嗌交，都有好多機會，他好有自己見解，尤其宗教同政治，大家取向有不同時，我不會跟他講，他會罵我，我會不出聲，無謂浪費氣力，我會採取不應不答。好像我有一輯新廣告，老闆已經決定出街，應該完事，莫諫。王喜係一個好好嘅反面教材，他指我在廣告入面老態龍鍾，又話要加鏡頭，表達我是一個有原則的人。如果不熟悉他這個人，會即時發火，最不鍾意指我老態龍鍾，崩口人忌崩口碗。不過這亦是王喜優點，以往在TVB，他都是直言直諫。不過，如果你因為對方未必接受到而兜彎，當然要潤飾，但坦白是最好，因為我們年紀越來越大，不想浪費時間，猜測當中真正意思。
蓋：其實我都係咁，會叫對方坦白講，因為轉少少彎，我不會明。
陳：不浪費時間嘛，你可以做我的朋友。
蓋：早些認識你，我條路可能會好走少少。
「未拍過拖，男嘅女嘅都冇」
蓋世寶跟前度林景弘拍拖七年，當時自覺未準備好而拒絕男友求婚，未幾，林景弘便找到另一半組織家庭。至今單身的蓋世寶從未後悔。陳志雲笑言可以介紹男友給她，蓋世寶反而對他未拍過拖感興趣。
蓋：你真係未拍過拖？
陳：睇你對拍拖定義係點。
蓋：拍拖定義會拖手、接吻。
陳：冇喎，我真係冇拍過拖，從來都冇覺得有人鍾意我，或者對我有意思，男嘅又冇，女嘅又冇，冇人鍾意過我。
蓋：你會不會考慮拍拖？這一生就咁放棄？
陳：60歲，仲點拍拖？
蓋：媽咪今年70歲，她都想拍拖。
陳：我並唔係你媽咪嘛。
蓋：就是說拍拖無關歲數。
陳：只係唔同人嘅事，如果任何人對陳志雲有興趣，可以試吓向我表示。
蓋：那個就是我。我要跟Patrick講，今次訪問好特別。離開TVB，我成日都搵他問意見。
陳：他是好好嘅聆聽者，會用心給予意見，意見多，不過行唔通。
蓋：我們好似講緊是非，唔係幾好。
陳：應該講的。早前跟他、Sukie做訪問，講起以前他接受查小欣訪問，他用Honey形容我，記掛到今日，咁睇唔開，你還問他攞意見。
蓋：我會問好信任的朋友攞意見，朋友是一世。
陳：其實我想講，他揀Honey來形容我，可以想像他有冇腦？我記得他打電話跟我講做完訪問，仲話「大哥我答得好好」，我問點好法？當時我在內地陪邵（逸夫）先生巡視教育，正在遊湖，聽完差點跌入湖。我當下聽完就知大件事，最難頂他竟然講答得好，自省能力咁低，我冇即時講出口，不過咁多年應該有進步。
「唔可以容許自己情緒低落」
2010年開始，陳志雲被官司足足纏擾了七年，一度在電視台舉足輕重的他，自此地位身份突變。不過他坦言人生最低谷不是那七年，而是媽媽離世。
蓋：你話每一段時間都搵到快樂？
陳：我覺得人生最緊要快樂，就算最低落時，都會在低落中尋找快樂。
蓋：講緊那個七年？
陳：其實最低落唔係嗰件事，是媽媽離世，我都是箇中尋求快樂，點解咁講？因為當我好思念她，又或者難過時，我會回憶好多關於她在世、疼錫我的片段，重溫過去的快樂和溫馨，助我度過這個傷心期。七年廉署調查期間亦一樣，因為不知為何會有這事發生，無助、不知如何是好，好似命運就在別人手裏。而能夠在當中搵到快樂，就係那段時間，其他人對我的支持，我因為這件事認識好多朋友，全部都好似兄弟姊妹。
蓋：所以心靈上可以度過？
陳：冇錯。你有冇試過情緒低落？
蓋：都巿人一定會有。
陳：你一定唔可以容許自己低落，一定要如常過活，令自己快樂。你竧𣉢正係殺自己細胞，自己過得唔開心，那些要你唔開心的人，就正中下懷，所以唔好咁蠢。
蓋世寶化妝、髮型：波兒（嫁妝）
上一則
上一則
車主慢駛反領展加租
下一則
下一則
蘋人誌︰ 演員的自我修養 潘燦良—方俊傑 |  0 02019/03/25, 11:45:47 晚上 |
|
