https://hk.lifestyle.appledaily.com/lifestyle/columnist/左丁山/daily/article/20190315/20633403
華為反擊 - 左丁山
原圖：電視畫面(互聯網)
左丁山連日收到朋友轉發有關華為嘅文字，一篇係英文，出自德國一份刊物，一份係不知名作者所寫的華為5G真相（標題為左丁山所加）。英文稿指德國調查之後，證實華為5G網絡不會成國家安全危險（即偷取情報），美國佬講大話，以虛構狼來了嚟恐嚇歐洲用家。中文一篇，則詳細敍述華為之5G技術，指美國雖然芯片技術最強，但華為擁有最高5G綜合實力，已明顯跑出，領導群倫。
啱啱有中大聯合書院嘅電子計算系校友向新亞校友講解5G，之後左丁山問呢位電訊專家K：「網上周圍轉發之文字來自何處？」專家K話：「我睇過晒，但不知來源，我相信係有人綜合晒不同資料，用心機寫好，再在網上發放嘅。」左丁山私人意見就係，世界上冇乜免費午餐，內地五毛黨甚多，佢地文字功夫又不錯，為華為大搞微博微信公關，在中文網絡世界，有一定影響力，移民已久的海外愛國華僑尤其深信不疑。
講到公關，華為不知是否已聘請世界級公關公司做顧問，過去兩個月，連珠發炮，將一向神秘低調嘅創辦人任正非推上前綫，連環接受英美媒體發問，主要傳遞嘅信息係反美親英（英國冇5G技術，又缺錢嘛）兼拉攏歐盟，係連消帶打高招，分化美國盟友，為華為爭取同情分。出完公關口術，就使出美國人慣用之硬攻（hardball tactics），首先在加拿大控告加拿大政府拘留孟晚舟，違反加國憲法之人權自由條款，更在美國德州（華為美國公司所在地）控告美國政府違反憲法，不公平對待華為。可以軟硬兼施，搶佔公關與法律陣地，唔係咁容易㗎，冇番一億幾千萬美元做後盾，點可以在國際舞台打公關戰與法律訴訟呀。華為當然有大把錢，雖然不是上市公司，但據報每年營銷額有一千億美元，用0.1%來打仗，濕濕碎，中國國企民企從來冇咁樣做嘅，華為呢次係創中國企業先河。問番專家K，佢話華為不上市，外人不大明白佢嘅營運狀況，以現代管治學睇，華為沒有透明度，在國際間飽受懷疑，並不出奇，純以5G網絡技術而論，仍然倚賴美國供應芯片及一啲美國專利，容易受制於人，華為厲害之處，就是將全世界有用之專利技術與產品，加上自己研發出來之硬件及軟件製成一套華為5G網絡，而且成本比西方公司便宜得多，性價比極高，令西方及落後國家無法抗拒；例如英國BT（英國電訊）就要求政府注資十億英鎊補貼，如果政府禁用華為嘅話！可是，華為受中共背後控制之言論揮之不去，西方國家情報機構對此深信不疑，任正非強打公關戰與法律戰，並不容易改變西方態度。
左丁山
電郵 :[email protected]
上一則
上一則
精英膿瘡爆了 (陶傑)
下一則
下一則
花無百日紅 (李碧華) |  0 02019/03/16, 4:35:45 下午 |
|
