嘉道理買起瑞士私人銀行錢滾錢獨不沾人仔

顯示圖片

嘉道理買起瑞士私人銀行錢滾錢獨不沾人仔

富豪有錢都好煩惱嘅，要思量放去邊度最安全，以防有乜嘢政治風險一鋪清袋。

上個月底公佈業績嘅中電控股（2），宣佈全年每股派息$3.02，咪睇少呢幾蚊雞股息，我宗菁華計過，單是過去15年，每股中電總共派發$40.63股息，嘉道理家族揸住4.75億股，單是過去15年就袋左$193億啦。咁多錢好似年年從天而降咁，如何管理呢？

與其聘私人銀行家去管，嘉道理家族索性喺瑞士買起間私人銀行，直頭當係生意咁樣去「錢揾錢」，2014年嘉道理家族與在中東起家嘅猶太Lawi家族；

以及來自敘利亞的瑞士金融家族Dwek，夾份買起瑞士成間私人銀行Hyposwiss Private Bank，呢三個猶太家族既祖先，都經歷過苦難，大家同聲同氣又大把錢，請專人管不如幫埋其他嘅猶太鄉里管埋啲錢喇，喺瑞士日內瓦私人銀行林立，嘉道理呢間私人銀行好低調，招牌細到不得了，不過幢銀行後面，有座猶太教堂，幾粒「大衛星」係後邊射住射住呢間私人銀行，你都咪話猶太佬唔信邪呀，如果唔係點見得佢哋啲財富越滾越大？

間私人銀行手頭管理嘅資產有46億法郎，差唔多368億港元，不過有一點值得參考，佢哋手頭揸住嘅貨幣，超過50%美元，20%歐羅，英鎊及法郎超過30%，人民幣？冇囉。可想而知呢班猶太金融家幾謹慎呢！

https://hk.lifestyle.appledaily.com/nextplus/magazine/article/20190312/2_658500_0/-%E6%8F%B8%E4%B8%AD%E9%9B%BB15%E5%B9%B4%E6%94%B6%E6%81%AF193%E5%84%84-%E5%98%89%E9%81%93%E7%90%86%E8%B2%B7%E8%B5%B7%E7%91%9E%E5%A3%AB%E7%A7%81%E4%BA%BA%E9%8A%80%E8%A1%8C%E9%8C%A2%E6%BB%BE%E9%8C%A2-%E7%8D%A8%E4%B8%8D%E6%B2%BE%E4%BA%BA%E4%BB%94