https://hk.lifestyle.appledaily.com/lifestyle/columnist/馮睎乾/daily/article/20190118/20593409
買燒味，我上了寶貴一課 - 馮睎乾
《飲食男女》圖片
昨天，我和內子路經一間平平無奇的酒樓，它的燒味部面向行人道，外賣餐牌上寫「乳豬飯$45」。出名慳妹的她立即說：「咁平，不如試吓喇！」我壓低聲音，將嘴唇開闔幅度降至最小：「咁平，唔慌好食啦！」她秒回：「附近嗰間米芝蓮貴廿蚊，咪又係唔好食。」我駁唔到，何況我縱然蠢，也沒蠢到要跟老婆辯論的地步，於是二話不說便走過去：「師傅，有冇乳豬飯？」但師傅的反應，卻是我發夢也想不到的。
「冇呀！」目測約五十多歲，應該未滿羅致光所謂「中年」的燒味師傅，一臉冷淡地說。我心中暗笑：「冇仲好！」但在我轉身想走的moment，師傅爆seed了。他忽然打倒3秒前的自己，向我咆哮：「有呀有呀，你係咪要吖？你買成隻，我即刻燒畀你！」燒畀我又唔使，我未死……
誰知他越說越起勁，青筋暴現，連珠炮發：「喂，乳豬飯點會咁平呀？你自己諗吓啦。係隔夜㗎！你睇住我炸畀你，你仲買唔買呀？嗱，就算你入去坐低叫碟例牌，百幾蚊，都係隔夜㗎！我即刻炸畀你嘅咋！」
語畢，為證明所言非虛，他立即從地上抬出一盤斬成碎塊的乳豬，那個豬頭還狠巴巴盯着我：「嗱，你睇吓，真係有乳豬㗎！但隔夜你要唔要呀？四十五蚊，呢個世界邊有咁着數呀？」
師傅的一番話，令我跪了。若不是前面有玻璃阻礙，我幾乎想九十度鞠躬，只好連忙說：「師傅，你冷靜啲，我唔要喇，我真係唔要喇……」為了證明「師傅，明白了」，我最後說：「唔該畀盒油雞鴨飯我啦，唔該。」
聽了我這句話，師傅終於平靜下來，一邊斬雞，一邊冷笑：「隔夜乳豬，你叫我點賣畀你呀？不過咁，有啲人係鍾意食隔夜嘅！」
同一天，鄭若驊在立法會解釋，為什麼不就梁振英案尋求外間法律意見，不是官腔就是廢話，相比之下，這位寧願倒米也不說假話的燒味師傅，句句醍醐灌頂，簡直是香港一道清泉。仗義每多屠狗輩，斬雞切鴨，必有性情中人。師傅，謝謝你。
馮睎乾
電郵  [email protected]
上一則
上一則
「外判」 (尊子)
下一則
下一則
蛋黃咖啡和椰汁可可 (邁克) |  0 02019/01/18, 7:27:14 晚上 |
|
