https://hk.news.appledaily.com/local/daily/article/20181212/20566683
2018年12月12日
蘋人誌：土炮道具師 諗得出做得到
劉黑Dark Lau
無論廣告創作抑或電視電影，想拍出別出心裁的影像，往往需要度身訂製的道具。劉黑（Dark）是一位特殊道具師。超人皮套、怪獸戲服、中世紀盔甲，只要想得到、畫得出，他就能夠做成實物。
三年多前半途出家入行，Dark靠一對手打天下，擅長「土炮」改造現有材料節省時間成本，「美術先行，呢樣係一個信念」，漸漸闖出名堂，更曾參與荷李活製作，從公仔箱到網上社交平台，越來越多地方見到他的作品。本地市場有限，又要面對內地競爭，One-man band的他坦承收入不穩，難以預料日後發展，但眼前目標依然清晰，希望製作高原創性作品，「話畀人聽香港都可以有咁上下質素嘅作品。」
撰文：佘錦洪
攝影：夏家朗 張志華
Dark以小本製作起家，一個人一對手，成為著名道具師。
從關公與外星人開始
一身藍色衣裝的超人，單腳着地再橫空踢腿，怪獸應聲飛起。最近播出的香港寬頻廣告，充滿日本特攝片集味道，鏡頭運用、後期製作等固然重要，但重點還要數由Dark負責的幾套皮套服裝，方能令作品形神俱備。近年舉凡有類似題材的創作，從衞生巾廣告到遊戲宣傳片，幾乎都會見到Dark的身影，除了因其本地少數專攻科幻、特攝題材的道具師身份外，皆因他由設計圖紙到落手製作一手包辦，「我去做設計嘅好處，就係我畫得出，我就做得到」，又會到拍攝場地為道具執漏，一人身兼數職，套用他自己的說話，算是「相當抵請」。
今年34歲的Dark，與不少男士一樣，從小對模型玩具產生興趣，按說明書砌高達只是入門玩意，「當你鍾意一個角色，市面冇出模型喎，咁你點啊，咪自己整囉，係咁單純㗎啦。」動手能力高，他中七畢業後就在模型店找到第一份工作，「本來係坐reception，後來負責埋整啲客拎嚟嘅模型」。抱住「咩都試吓」的心態，他做過展覽業，跟師傅學木工知識，又修讀設計文憑，坐過寫字樓做平面設計，誤打誤撞為道具製作奠下紮實根基，「好多時都話係過去嘅經歷造就咗𠵱家嘅我。」
七年前兼職幫人製首辦原型的Dark，無償為《鮮浪潮》學生參賽影片《關公大戰外星人》任美術顧問，協助設計關公、外星人等造型，首次接觸這種專為影像創作而製的特殊道具及戲服，開始在網上尋找教學嘗試DIY，「見YouTube上面好多外國道具師又係做平面設計，又係做原型，我就諗，我得唔得呢？」這群學生最後成立G.V.A. Creative工作室，拍攝各種天馬行空短片，他亦成為道具組固定班底，「儲咗啲portfolio，三年幾前有人正式問我接唔接商業製作，一做就做到𠵱家。」
小成本改造 完美遮瑕
由小本甚至無本製作起家，Dark自稱「土炮」流派，「就係如何去用最少budget、最短時間、最少人力，簡單啲講就係一個人，去完成你想要嘅道具。」他尤其擅長改造原有物件，如製作頭盔時，他常以玩具頭盔作為基礎，以模型常用的原子灰重塑外觀及上色噴油，「因為佢本身就有個形喺度，又有呢啲現成嘅入榫結構，我加番條帶已經好穩陣。」他稱若要由零開始其實不難，常見的如以玻璃纖維倒模亦是行內常用做法，但成本較高，「例如我整個手套要有裝甲，我可以買個手套返嚟黐裝甲就得，唔通我要買塊布返嚟車個手套出嚟咩？」
趕工無可避免有失誤，「好似寬頻隻怪獸咁，後面其實係拉唔埋，不過無辦法，你趕住要拍都只能夠交咗貨先。」去到拍攝現場他再為服裝加工，靠鏡頭藝術完美迴避瑕疵，「最低限度，美術先行。件衫可動性可能好差嘅，着到演員好慘嘅，物料應用係唔得嘅，但美術OK喎，前面係呃到人，呢樣嘢係一個信念。鏡後面可能好多說話畀我聽，亦都提自己下次要努力。」
見識荷李活財大氣粗
如果時間及預算許可，由原型階段開始製作效果絕對更為驚艷。去年Dark為電子遊戲《榮譽戰魂》（For Honor）香港真人宣傳片製作中世紀騎士、日本武士及維京鬥士三套服裝，利用EVA棉及熱塑板造出盔甲的不同部份逐塊組裝，再以原子灰作細節加工，最後用上色技巧模擬出金屬、木材等質感。播出後獲不少機迷好評，「我覺得For Honor都算係一件自豪嘅作品。」
充滿Cyperpunk元素的日本漫畫改編電影《攻殼機動隊》兩年前來港取景拍攝，Dark及另一位本地道具師Aya，獲荷李活製作公司Weta Workshop邀請加入本地劇組。他說第一次見識到荷李活製作的「財大氣粗」，大部份工作人員都兩手空空到場，需要用到的工具全部不計成本即時採購，「但亦都係咁先會請我哋去幫手啦。」他們本來僅負責臨時演員的小配件、路邊地攤的裝飾等道具，但有一日拍攝期間忽然有特別任務，「你幻想吓好似深水埗賣二手電器感覺，有隻二手機械臂放喺地下，本來佢係一件咁嘅道具嚟，唔知點解上司話要改裝到戴得上身，喺現場突然就要去加工去做嘢」。忙碌一場，他笑言不少有份參與的畫面在最終版本都被刪走，但總算是難得的經驗。
訪問於新蒲崗一個工廈工場進行，Dark租用了部份地方開工，逐日計算租金，比較符合成本效益，「以前都試過自己租成個工廈單位嚟做，但有時job唔多租金都蝕埋。」他稱道具師收入不穩定，因未必每一個製作都會額外預留道具費請道具師，「（收入）多嘅時候，未計材料成本試過去到10萬。少嘅時候咪冇囉，喺6月尾7月頭完咗個job，下一單8月尾先傾得成，中間有個幾月時間係冇工開」。
最近香港寬頻廣告中的超人皮套就是Dark的製作。
演員穿上皮套拍攝，製作充滿日本特攝片集味道。
特攝創作不比外國差
內地競爭激烈亦是另一個影響收入的因素。Dark說，內地人工及材料成本始終比香港低，不少公司寧願將工作交由內地廠負責，「不過佢哋啲質素我係有保留嘅，同埋有時啲嘢大件，計埋運費個成本其實同喺香港做差唔多。同埋你喺香港搞，我個人喺度，有咩就搵我傾，可以即刻改，呢度都慳番唔少時間。」猶幸多年來認識到不少朋友，間中都會轉介工作，「以前做落咁多作品大家睇到，對我都係有信心。」
留着山羊鬍，開工時穿上黑衣黑牛，配上一對拖鞋，被一堆機器與材料包圍，Dark「佬味」十足，他卻拒絕人家以「道具佬」相稱。他指上一代道具師多數予人的印像是文化水平較低，只會依照圖紙做事，因而被稱為「佬」；但這一代的道具師，如他與其他行家都有自己一套堅持，有各自的風格與特色，做出來的是一件件藝術作品，「只要有同等嘅條件，我敢講無論係我定係我啲行家，一定唔會比外國嘅道具師差。」
問到未來發展，Dark坦言難以估計，「你如果幾年前問我，我都唔知自己會做道具師呢行」，皆因市場及科技一直在變，「可能遲吓3D Print已經搞掂晒所有工夫」，目前會繼續專注做好每一個工作，嘗試爭取機會做自己原創作品，「過往一大堆電視廣告呀，都係base on人哋品牌去設計，總有一定程度限制，但到你冇限制啦，你又做得啲咩出嚟呢？」他不諱言自己都想show quali（獻技），「你大膽啲咪當係代表香港囉，話畀人聽香港都可以做到有咁上下質素嘅特攝或者科幻形式創作。」
服裝主要材料是EVA棉及熱塑板，加工上色後可模擬金屬、木材等質感。
電子遊戲《榮譽戰魂》香港宣傳片中，達哥的日本武士服由Dark製作。
上一則
上一則
西九戲曲中心派飛混亂
下一則
下一則
兩岸專題：被囚1,200集中營虐待 200萬維人生不如死 |  0 02018/12/12, 8:57:44 晚上 |
|
