顯示圖片
[我見過霍金，我真係見過] 淺談霍金
[center]
(credits: x-ray_delta_one/flickr, https://www.flickr.com/photos/x-ray_delta_one/8487220179)[/size=2][/b] [/center]

追咗小弟嘅blog咁耐，次次都係講啲深奧嘅物理理論，小弟又經常解釋到一嚿嚿（好似係） ，大家或者成日都睇到一頭霧水⋯ 有見及此，今次轉一轉主題，等小弟「獻出第一次」，輕鬆一啲，講吓小弟聽過/遇過一啲有關霍金嘅有關生活逸事啦！

[blue]小弟與霍金「師兄」嘅「交集」- 「我真係見過霍金！」 [/blue][/size=5][/b]

小弟雖然不才，但讀物理嘅成績都算過得去，有幸喺碩士嘅時候去著名嘅劍橋大學深造物理，做霍金嘅「師弟」，有幸一睹霍金真人嘅風采。不過小弟雖然當時與霍金身處同一學系大樓，親眼（喺遠距離）見過霍金真人唔少次，但其實都只係好似某某局長嘅程度之流，連同霍金對話，甚至聽佢演說都冇試過 所以好老實講，小弟識霍金嘅學術研究理論多過佢本人，並唔太清楚霍金真人係點。不過小弟都可以講一下小弟睇到、由人哋口中聽番嚟有關霍金嘅所見所聞。

[center]
（圖擷取自《852郵報》）https://www.post852.com/141558/「見過steve-jobs」好巴閉%E3%80%80楊偉雄僅5年it經驗有眼睇/[/size=2][/center]

小弟喺劍橋修讀碩士嗰一年霍金咁啱67歲，啱啱係佢達到劍橋大學官方規定要由學術界聲望最高學術職位之一嘅盧卡斯數學教授席位（Lucasian Chair of Mathematics）退落嚟嗰年，學系當時都有搞唔少活動賀霍金「榮休」。雖然話「退休」，不過其實喺學術界好多時只係名義上嘅「退休」，唔少教授退休後一樣會繼續做研究，始終對唔少教授嚟講研究係佢哋嘅終身職業同興趣，霍金當然亦唔例外。

咁啱嗰一年又係金融海嘯發生後冇幾耐，英國經濟蕭條嘅一年。為咗解決危機，英國政府開始搵大學、學術界「開刀」，而冇「任何經濟貢獻」好似理論物理學、數學系哩啲學系首當其衝被大幅削減經費同資源。霍金雖然已經名成利就，自己又已經半退落嚟，但佢冇好似某城市「上晒岸」嘅老一輩咁活喺過去，淨係識話年青一代唔上進，佢依然肯企出嚟抗議為學界爭取，甚至要挾話要離開英國去加拿大做研究 [1]。佢當時甚至已經計劃付諸行動，小弟嗰陣時親眼睇到佢嘅助手、秘書幫佢執辦公室、搬嘢搬咗成年，好似係。不過結果最後佢都選擇接受挽留，留番喺劍橋繼續研究同渡過餘生。
Good0Bad02018/12/08, 12:57:47 凌晨
本貼文共有 6 個回覆
另外當然唔可以唔講小弟對霍金嘅敬佩之情。相信大家或多或少都聽過霍金喺理論物理學界嘅學術成就，發表咗無數劃時代嘅物理理論，好似霍金輻射（Hawking radiation）[3] 等，小弟之前亦（不負責任咁）簡單講解過一下[2]。不過最令小弟佩服嘅係霍金除左自己勁之外，佢仲桃李滿門，教授同指導出唔少喺學界舉足輕重、獨當一面嘅著名物理學家，包括基邦斯（Gary Gibbons）同佩利（Malcolm Perry）等等，當年差唔多超過一半劍橋應用數學系理論宇宙學中心入面研究重力同黑洞嘅教授都曾經係佢嘅學生嚟 （雖然佢貴係中心主管應該都係部分原因）。所以佢對理論物理學界嘅貢獻絕對唔係一兩段說話、一兩篇文章可以概括得晒，時至今日仲深深咁影響住物理學界。PS：不過小弟最最佩服霍金嘅係佢研究時竟然可以唔用紙筆，喺腦入面進行咁多複雜冗長嘅運算

[blue]霍金幾玩得同幾有正義感，好似係 [/blue][/size=5][/b]

雖然患有罕見嘅ALS怪病，甚至確診初期被斷言唔會淨番好耐命，但霍金一直冇放棄過，抱住堅強嘅意志樂觀咁面對。霍金哩啲勵志故仔相信大家都聽唔少，但你又知唔知霍金其實仲係一個幾玩得、風趣幽默嘅人呢？例如佢試過唔少次同其他物理學家打賭實驗結果、理論啱定錯[4]，又成日客串出演唔少電影同劇集好似《星際奇遇記》（Star Trek） 同《囧男大爆炸》（the Big Bang Theory），仲試過體驗零重力飛行。霍金亦好識享受人生，同其他典型英國人一樣，佢一樣鍾意飲茶同對茶有要求，好似係。霍金同時都係一個意志非常堅定，甚至極端到有啲固執嘅人，不過哩個可能就係點解佢能夠「戰勝」怪病不特止仲咁成功嘅原因啩！有興趣可以睇吓小弟讀博士時嘅「老闆」佢對霍金嘅一啲個人回憶（英文）

https://youtu.be/EsNjHaKwN5E


(Credits: Latuff, https://latuffcartoons.wordpress.com/2013/05/11/cartoon-stephen-hawking-boycotts-israel-academic-conference-bds/)[/size=2]


除左之外，唔似某強國、城市嘅科學家甘於封閉自己喺象牙塔入面，不過問世事，甚至係趨炎附勢、為強權撐腰，霍金時不時都會對重要嘅社會議題發表意見同利用自己嘅影響力幫啲弱勢社群發聲。好似早幾年為咗表達對巴勒斯坦嘅支持同對以色列政府嘅不滿，佢公開表示杯葛喺以色列舉行嘅學術會議，喺社會同學術界做成一定嘅迴響[5]。

最後當然唔可以唔提佢活用自己獨特嘅形象大力推動科學普及，寫咗一系列科普作品，將艱深沉悶嘅宇宙學同理論物理學用通俗嘅言語形象化咁講解畀普羅大眾認識，引起佢哋嘅興趣，感染同啟蒙咗一代又一代嘅有志投身科研嘅人。#

# 雖然大部分平常人都未必睇得明佢講乜，而且佢又將佢部分未經驗證嘅假說理論當成證實咗咁講（不過唔少科學家其實都有哩個通病，佢已經唔算過分嗰啲）

今次講住咁多，喺完之前送上電影《The Theory of Everything》嘅結尾配樂再次緬懷一下哩位傳奇嘅物理學巨匠，希望佢喺另一個世界搵到能夠描述宇宙物理世界一切現象嘅萬有理論 （相信哩個先係佢最大嘅心願）。

https://youtu.be/pZ3b1a2OnhQ

#2018/12/08, 1:00:36 凌晨
延伸閱讀：

[1] Ferguson, Kitty (2011). Stephen Hawking: His Life and Work. Transworld. ISBN 978-1-4481-1047-6.
[2] 《 [我見過霍金，我真係見過*] 淺談霍金學術成就（一）》
https://godfreyleungcosmo.wordpress.com/2018/03/18/%e6%88%91%e8%a6%8b%e9%81%8e%e9%9c%8d%e9%87%91%ef%bc%8c%e6%88%91%e7%9c%9f%e4%bf%82%e8%a6%8b%e9%81%8e-%e6%b7%ba%e8%ab%87%e9%9c%8d%e9%87%91%e5%ad%b8%e8%a1%93%e6%88%90%e5%b0%b1%ef%bc%88%e4%b8%80/
[3] 《叮噹法寶物理原理大解構 [三] 》
https://godfreyleungcosmo.wordpress.com/2017/06/20/%e5%8f%ae%e5%99%b9%e6%b3%95%e5%af%b6%e7%89%a9%e7%90%86%e5%8e%9f%e7%90%86%e5%a4%a7%e8%a7%a3%e6%a7%8b-%e4%b8%89-the-physics-behind-doraemon-gadgets-iii/
[4] 《Stephen Hawking, betting man》，Daniel Clery著，Science 23 Mar 2018: Vol. 359, Issue 6382, pp. 1317
[5] https://www.theguardian.com/world/2013/may/08/stephen-hawking-israel-academic-boycott
[6] https://www.theatlantic.com/science/archive/2018/03/stephen-hawking-sean-carroll-physics-airport/555764/
#2018/12/08, 1:01:41 凌晨
原文link：
https://godfreyleungcosmo.wordpress.com/2018/11/27/我見過霍金，我真係見過-淺談霍金/
#2018/12/08, 1:02:28 凌晨
好叻!
#2018/12/08, 1:19:06 凌晨
高汁
#2018/12/08, 3:00:59 凌晨
高汁
不過最好唔好用 format tag，膠登爛了
#2018/12/08, 3:09:39 凌晨
本貼文共有 6 個回覆
回覆學術臺