 https://www.facebook.com/hkleague/posts/2197332946943641?__tn__=C-R
雖然已經係35歲，但係女足隊長陳詠詩無論喺球場內、外，仍然係女足陣營裡面，無可替代嘅精神領袖，不斷帶領身邊一班隊友、師妹，攀過一道又一道嘅高山。
多年嚟一直代表香港南征北討嘅呢位女足中場主力，好坦白咁講話，呢次嘅奧運外圍賽第一圈賽事，極有可能係佢踢國際賽咁多年以嚟，球隊首次以不敗姿態晉級。
冷靜、沉穩嘅陳詠詩，雖然喺女足大軍之中，早已屬於「老將」級別，但係喺球場內、外總會以身作則為隊友樹立良好榜樣。就好似縱使喺女足第二場分組賽迎戰伊朗之前，已經知道女足手執晉級次圈資格，不過作為女足隊長，「陳詠」從來都冇諗過就咁就收貨。
「雖然第一場波贏左黎巴嫩，已經攞到出線資格，不過大家都冇放軟手腳，落到場對住伊朗，依然係向住4分呢個目標嚟踢。尤其喺畀伊朗追平之後，我都有同場上嘅隊友大聲講，話反正贏輸都已經係第二，點解唔試下壓返上去，睇下贏唔贏到場波。」的確，女足喺下半場中、後段確實曾經製造幾個入球機會，可惜未能再次把握。
或者對好多球員嚟講，喺國際賽踢到35歲，其實都已經係接近尾聲，不過睇返「陳詠」喺呢兩場波裡面，滿場奔跑，指揮若定嘅勇猛演出，就知道呢位老將似乎一啲都冇喺國際賽退落嚟嘅意思。
「就算係去到比賽尾聲，我都唔想停落嚟，好想繼續踢落去... ...」
想「陳詠」繼續帶領女足前進嘅，相信會係唔少港隊球迷嘅心聲。
#撐自己人 #香港勁揪 #女足加油 |  1 02018/11/15, 12:47:26 凌晨 |
|
