https://video.appledaily.com.hk/mcp/encode/2018/11/09/3728030/20181112_sub361NEWNEW_clean_w.mp4
如果大家係PC Origin Access會員或Xbox One EA Access會員，好可能已經有得試玩EA射擊遊戲大作《Battlefield V》10個鐘頭，若果唔係的話就要等多幾日等到11月15日豪華版或11月20日標準版推出日先至有得玩！但當然話晒《Battlefield V》係EA今年年度大作，所以在11月初已經在瑞典斯德哥爾摩搞了一次全球傳媒及KOL試玩會，試玩完全版《Battlefield V》，試晒所有多人戰地圖，而記者亦係少數受邀的亞洲傳媒。點解會在斯德哥爾摩搞？因為開發遊戲的EA DICE總部就是在斯德哥爾摩。
之前記者都有試玩過遊戲的單人模式，當中講述鮮被人提及的二戰時期故事，感覺都幾新鮮，到多人戰模式又點？新加入的Grand Operations就唔止係一幅多人戰地圖，而係一個連跨幾日的多人戰故事任務，還要是32人對32人的大規模戰鬥，正如開發小組所講係一個全新的「Battlefield」戰場。
今次試玩共玩了三個Grand Operations，分別是結合了「Narvik」及「Fjell 652」地圖的挪威Grand Operations；結合了「Rotterdam」及「Devastation」地圖的荷蘭Grand Operations；以及結合了「Arras」及「Twisted Steel」的法國Grand Operations。每個Grand Operations都以歷史事件為題材，組成了歷時三日的戰役，玩家要聽從指令攻下據點或守住陣營，而每一天的戰績都會影響下一日的佈陣同回報，如第一天勝出的一隊會得到支援，落敗的一方就沒有；不過遊戲又唔會太過傾斜於前一日獲勝的一方，令雙方實力拉得比較平均，如果到打完第三日仍未分勝負，就會進入第四日最後一日戰役。第四日戰役最有趣的地方是每名玩家都只得一條命，不能翻生，更加會好似大逃殺一樣會隨時間縮圈，想避都無得避，隨時有機會打到最後一兵一卒先定到輸贏，好似挪威戰役第四日更超大風雪，能見度可能不過5米，亦大大提升緊張性。
Grand Operations模式既刺激亦有故事性，而且雙方的戰力平衡做到唔錯，令到雙方實力拉得較接近，好難先會一面倒勝利或落敗，打得更緊湊。這種設計頗有深度亦耐玩，相信這種連玩數日的任務模式，亦好有機會會成為其他同類型遊戲的仿效對象。
試玩了暫時已公開的9幅多人戰地圖，記者覺得法國的「Twisted Steel」最多變化及最具挑戰性。地圖中間有一段塌落的鐵橋，據開發小組所講，這條斷橋是Battlefield系列有史以來最龐大的建築物，而特點是既難攻亦難守，兩旁都無制高點可以利用，除了循地下水路迂迴前進，就唯有正面在橋上駁火。不過現場外國傳媒大多覺得最正是比利時的「Panzerstorm」地圖，這幅地圖主要進行坦克車大戰，但由於這幅地圖要等12月初連同單人模式「The Last Tiger」先會正式推出，今次試玩會上都唔可以擷取影片及圖片。
32人對32人大混戰其實多多少少都有啲混亂，今集《Battlefield V》就引入了Squad Play玩法，最多可由4人組成一隊小隊加入32人大軍作戰。組成Squad Play有乜好？如在隊友旁邊翻生時可得到獎勵，而且亦可守望相助互相補給及互相拯救，以往要成為救援兵（Medic）先能夠拯救他人，但小隊內成員就無兵種上的限制，玩法比之前差不多單打獨鬥多了另一重玩法。另外今集亦多了建造功能，如可在指定地方興建哨站或障礙物，都算有趣但就未見得是太實際。
仲記得最初EA公開第一段《Battlefield V》預告片時，唔少玩家都批評片段中的女兵有違史實，開發小組之後都曾解話。記者覺得從遊戲性來講，其實更加有趣，《Battlefield V》更加入大量個人化設計，如換裝、畫花面、更換男女角色，當然一切都要靠在遊戲賺取經驗解鎖或升級先用得，這個設計亦可留住玩家。不過計我話與其執個靚樣（戰場上其實睇唔到自己），不如升級武器更實際，在試玩後期EA更開啟所有道具、武器給傳媒試用，有一支勁槍在手真係差好遠。
暫時所玩到的，記者都覺得滿意，只是地圖未算太多，都值得畀90分。開發小組其實都會在遊戲推出後，透過免費下載方式推出新地圖及新遊戲玩法「Tides of War」。暫時已公佈的「Tides of War」會有三個章節，分別會在12月初、明年1月及明年3月推出，每個章節都有新地圖、新遊戲模式同新Grand Operations，每個章節會維持4至12星期。不過好多玩家同記者諗法都一樣，就是二戰遊戲點會無太平洋同亞洲戰場？如果開發小組可以在之後的「Tides of War」加入的話，就值得再畀多5分。
記者、攝影：布偉倫
《Battlefield V》將會在11月20日正式推出，如購入豪華版將可在11月15日有得玩。
EA日前在斯德哥爾摩舉行《Battlefield V》完全版試玩會，邀請了全球不同地方的傳媒及KOL出席。
「Twisted Steel」中的塌落鋼橋既難攻亦難守。
遊戲設有大量的個人化設計，不過要儲齊各項裝備及道具就絕非易事。
「Tides of Wars」玩法將會在12月初開始陸續免費推出，對玩家絕對是好事。
記者是少數獲邀出席是次試玩活動的亞洲傳媒。
source : https://hk.lifestyle.appledaily.com/lifestyle/realtime/article/20181111/58894218
+++++++++++++++++++++++++++++++++++++++++++++++++++++++++++++++++
睇落好靚  |  0 12018/11/11, 12:40:35 下午 |
|
