https://hk.news.appledaily.com/local/daily/article/20181028/20532461
2018年10月28日
【攝影人物】大自然的情人 馮漢城
攝製港版Discovery Channel
馮漢城的鏡頭記下了不同物種的生存狀態，也讓他反思人與大自然的關係。朱家駿攝
最近，漁農自然護理署邀請了「生態情人」鄭子誠聲音導航香港的大自然，兩分鐘的短片裏，有些是23歲的年輕生態攝影師馮漢城拍攝的畫面。
阿城有個名為「FHS Wildlife」的專頁，裏面記錄了香港自然生態的影片，也有一些剪輯製作成人稱「港版Discovery Channel」的生態紀錄片，主角有灰尾鷸、大濱鷸、短指和尚蟹、蜉蝣、香港湍蛙等，記載着屬於香港的獨特面貌。
在自然世界裏，物種各自有不同的生存狀態，隨着人類執意發展逐一受到破壞，阿城記錄這些，某程度也是想喚起觀眾對於自然及保育的關注，如鄭子誠所說，「只要你願意，你也可以做大自然的情人」。
撰文︰李雨夢
「呢隻就係灰尾鷸，即係第一集入面嗰隻雀，你望吓個泥灘，呢啲叫做角眼拜佛蟹，佢哋好似拜緊佛咁」，跟隨着阿城到馬鞍山的泥灘，對於飛過的鳥類及灘上的蟹類，他都能一一說出牠們的所屬品種；辨認物種的技能，源於小時候就開始與大自然接觸，
「好細個就有一種對於生物嘅好奇，中小學會成日同屋企人一齊出去郊外，例如去大尾篤燒嘢食會去旁邊個石灘睇蟹仔，翻開石頭就會見到好多唔同嘅生物；然後我就覺得，呢個世界好似好多嘢睇，就接觸越嚟越多唔同嘅物種」。
《Wild Hong Kong》系列的生態紀錄片，拍攝情況難以預計，馮漢城笑言「食白果」是常態。
馮漢城開設了「FHS Wildlife」的fb專頁，除了生態紀錄短片外，也有雀鳥相片。
我唔係由攝影角度看待大自然，係由一個好欣賞嘅角度出發。
打開了對於生物世界的好奇後，2007年他就讀中三，父親買了一部單反相機，從此兩父子開始踏上了鳥類攝影的道路，「我同爸爸會一齊出去觀鳥，買咗相機之後就開始踏足鳥類攝影」。
阿城的父親Ken說，最初是購買望遠鏡觀鳥，後來覺得單單觀鳥並不足夠，「所以最後都係買咗部相機，影完相放上網，同其他人溝通交流吓」。阿城說，自己是從對生物的好奇而開始攝影之旅，「所以好多時我唔係由攝影嘅角度去看待大自然同生物，可能會係由一個好欣賞大自然嘅角度出發」。
拍攝雀鳥近十年，兩父子開始走向不同的方向，Ken繼續拍攝雀鳥與同好分享，而阿城開始反思為何要繼續攝下去，最後逐步轉向更多元化的生態攝影，「喺影雀嘅過程入面都會諗吓其實自己做緊啲乜，又覺得影相無乜用，之後發現都可以喺拍片度做到少少嘢，剪到條片出嚟好似有啲古仔講到吓，就開始越影越多」。
約一年前，阿城開始推出名為《Wild Hong Kong》系列的生態紀錄片，第一集以灰尾鷸、大濱鷸及短指和尚蟹為主角，畫面細緻配上有趣的旁白，講述大自然正在發生的幕幕情景，「有一日，我無意中去咗泥灘，遇到一個好難遇到嘅情景，就係成50至60隻波子蟹（即短指和尚蟹）空群而出，遇上咗一啲遷徙而嚟嘅雀仔捕食佢哋，包括灰尾鷸同埋大濱鷸，見到一個食物鏈嘅運作。」
這次意外，讓阿城萌生起製作短片的想法，「之前未有太多剪好一條片嘅經驗，就膽粗粗試吓剪條好粗略嘅片，出嚟又好似幾精采，之後就畀心機去影多啲唔同畫面，去整返條相對完整啲嘅片，誤打誤撞之下就製作咗第一條片」。
要尊重每一個物種，每個物種都有佢哋嘅故事。
阿城說，平日喜歡觀看BBC和國家地理頻道，故製作第一集《Wild Hong Kong》時亦自然參考了該頻道的風格，「以呢個為藍本」，短短5分鐘影片便須耗上大量心力及時間，「每次出去影嘢都唔知會影到乜，事前好多嘢都估唔到，可能大自然都係充滿意外，就算機關算盡，都係唔及你出到去望到嗰一刻」。
他又笑言，多次外出想拍攝野生生物，能夠獲取多少畫面全賴運氣，「食白果係正常」。
在阿城的鏡頭下，各種生物以水平方式來拍攝，大多時候，他都會「瞓身貼地」，只求拍到最貼近生物視角的畫面，「會希望以比較貼近自然嘅角度，如果用人嘅眼睛去睇生物，通常都係高到低嘅視線，但好多時生物係無咁高，佢哋好多都係貼近地下，由水平角度去記錄，先係佢哋眼中嘅世界」。
最近，阿城正構思新一集《Wild Hong Kong》，希望能夠回到人類身上，反思人與自然的關係，「其實我哋都係大自然嘅一部份，但?家有好多發展都破壞緊自然，希望人類唔好咁自大覺得可以掌控大自然同埋主宰地球」。
阿城覺得，若人類在大自然裏頭生活，便應好好對待，「如果唔係佢會隨時反咬你一啖」。記錄不同的物種，也因他認為每個存活於地球的物種都應被平等對待，「我嘅諗法係要尊重每一個物種，每個物種都有佢哋嘅故事，而每個物種都有存在嘅價值」。
上一則
上一則
昨晚六合彩開獎結果
下一則
下一則
四萬元器材 拍攝出無價水準 |  0 02018/10/28, 1:44:46 下午 |
|
