http://hk.apple.nextmedia.com/realtime/news/20160330/54927405
青衣長發邨街市商戶日前收到外判商建華（街市）管理有限公司的律師信，指建華以「改善優化工程」、「進行資產提升工程」為由，將於10月1日收回店舖。建華表示商戶可聯絡他們商討往後承租情況，惟無交代租金、合約條款等細節。長發邨商戶聯會主席李錦源指，建華此舉是報復2月的街市商販罷市行動，但礙於合約條款所限，商戶被逼「無奈接受」。
李錦源又指，「而家全個街市都係做到9月尾，唔理啲商戶租約到幾時，佢（建華）哋俾咗6個月通知就可以合法收番間舖」。李表示情況無奈，「但可以點？其實輸就一早都預咗會輸，好老實講我吔都做唔到啲咩，唯一可以做嘅係等全港市民都知道個情況」。
青衣長發街市2月曾發起罷市7天，抗議領展將街市管理權外判給建華（街市）管理有限公司。事隔不足兩個月，建華即發律師信給長發街市全線商戶，指將於10月1日收回街市商戶。
開店27年的文具店東主李先生指，領展及建華不理會小商店情況，「佢哋又點會理我哋啊？有得賺就只會賺到盡」，質疑領展「6個月通知後即可中止租約」的條款不合理，「其他大商場都唔會有啦，人哋話租兩年就租兩年，佢哋（領展及建華）就6個月通知就可以叫你走」。
開檔8年的服裝店老闆楊女士亦指「領展同建華係大騙子」，「佢哋根本有心想逼走我哋，一早就安排好，想賺多啲；我希望其他人唔好做老襯、唔好入來租舖」，呼籲商戶小心領展租約中的魔鬼條文。 |  0 102016/03/30, 4:44:50 下午 |
|
