遊日原來可以行住玩，香港情侶仿照古人行「東海道」，6月大熱天由東京行到京都，超過600公里路。真的好玩？聽過林霖（Lam）和潘德恩（Ikey）故事，你會明白這樣玩可看到不一樣的風景，遇到好人好事。
一切是緣。Lam早兩年台灣環島遊，步行40多天1,200公里路。孤身上路何解沒Ikey？「當時未識，我嗰陣做緊運動雜誌，訪問Lam環台遊，之後拍拖。」拍拖約兩年後，就有這次東海道之旅，我問Lam：「兩個人行好玩啲定煩啲？」他嘰一聲笑出來，之後再看看Ikey，得喇，攝影師不用閃光燈喇。
唔shopping 旅費僅二萬港元
由東京日本橋出發，終點京都三条大橋，超過600公里，他們預了25日。「其實都唔夠，因為途中會有好多突發事，而且真係唔好信Google Maps，我哋成日比地圖顯示嘅行得多，最多試過一日行多咗十幾公里。」Lam是自由身攝影師，Ikey是記者，時間較難遷就，只能在夏天出發，「我出發前仲趕緊稿，如果預多啲時間，每日行到晚飯後就休息會好好多，天黑冇風景睇其實行得辛苦啲。」他們試過趕路行到夜晚接近12點才到酒店。「記得book有洗衫服務嘅酒店，我哋每人都係帶約三套衫，日日要洗衫，自己洗乾唔切，要靠酒店洗衣乾衣。」為盡量輕便，Lam只帶單反、菲林機、GoPro、過相用電腦各一，行李重14kg。怎樣合照？「Set腳架。」Ikey行李輕得多，6kg。旅費呢？「反而唔多，冇特別慳，晚晚住酒店，喺箱根嗰晚仲住溫泉酒店。」全個旅程頭尾25日，當中行足21日共128小時，不計機票只花約兩萬港元，因為沒太多機會花錢，「全程冇shopping，臨走都冇去outlet。」
Lam很喜歡步行，「我喺香港一樣鍾意行，試過喺太子行返將軍澳屋企，約13公里行咗三個幾四個鐘。」打完風返工一定難不到他們，「冇特別訓練，都係平時行山練習。」他們開了專頁「不青春也可熱血」分享這次旅程，39歲的Lam和29歲的Ikey，不算太青春但真的太熱血，此行平均超過攝氏30度，還不夠熱？「行東海道，建議揀秋涼日子，除咗熱到長期成身汗，對腳仲狂起水泡。」Ikey沒後悔此行，只後悔夏天起行。
不只天氣熱，也因夏天多雨，差不多三分一旅程都是冒雨而行，途中Ikey還傷了腳。「第六日去到箱根，要行舊石板路，波鞋同襪因為之前落雨濕晒，逼住着涼鞋，結果一跣腳，腳趾尾便撞到石邊即時爆血，好彩有消毒藥水同膠布頂住。」平均日行30公里，「睇到好多平時搭車睇唔到嘅風景。」除風景還有人和事，就弄傷腳後，患難見好人，「我哋捱到去藥房買嘢包紮，藥房職員畀咗好多資料我哋，包括附近可以去到嘅醫院。」一些小事也見體貼，「落大雨行路時，行人路好窄，所以啲車會駛離你遠少少，因為唔想啲水濺到行人。仲有，喺街啲人見我哋揹住咁多嘢行，會問係咪行東海道，試過喺四日市附近有個大叔搭訕，問我哋今日會行到去邊，我話龜山啦，佢就話：『廿幾公里，三個鐘左右箒。』我話：『三個鐘行廿幾公里？要跑喎。』『No！慢慢行就會到，enjoy your trip！』之後同我哋擊掌加油，不過最後我哋行多咗一倍時間，行到夜晚11點幾先到。」
這就是行了21日的路線圖，他們叮囑大家不要盡信Google Maps。
就是這對涼鞋，令Ikey受傷。
老闆娘送給他們的反光手帶。
大叔暗中埋單 老闆娘送反光手帶
旅程中去得最多是便利店，「補給飲品小食，仲可以去廁所。」其次是餐廳，「試過落雨全身濕晒滴晒水，硬住頭皮入餐廳，點知店長冇怪我哋，仲畀毛巾我哋抹，安排我哋坐低，店長知道我哋行東海道，加咗我哋facebook，喺旅程中仲留言問候我哋，關心我哋行成點，間餐廳叫iitoko cafe，喺橫濱，店長係松野小姐，雖然只見過一面，但好似識多咗個朋友咁。」還有一家好像家庭式經營的大阪燒店，「入到去，見到班大叔同老闆娘傾緊偈，知道我哋行東海道就叫我哋加油。」他們用有限日文加肢體語言溝通，「之後有個大叔入嚟，冇講過嘢，到我哋走時，老闆娘話大叔已經幫我哋埋單，因為知我哋行東海道，想支持我哋；臨走老闆娘突然一嘢拍落嚟我隻手，幫我哋戴咗條反光手帶，話夜晚行冇咁危險。」
有冇驚險事？「有日預計要行33公里，但夜晚7點先行咗27公里，問題係旅館11點關門。」那刻看到Ikey的擔憂，但坐車就是放棄了，於是他們兵分兩路，「叫Lam行快啲去攞房，我就正常咁行，去到會合。」Ikey見到Lam越行越遠，才想起Wi-Fi蛋在他身上，只能盡力行，希望快點再趕上，「最後9點幾去到附近，離遠見到Lam，我忍唔住喊喇。」好閃呀呵？好玩呀呵？拍拖值得試一次，我話嘅。
大阪燒店老闆娘與大叔們替他們打氣。
天雨路滑，體力差一點也不行。
《東海道五十三次》的浮世繪，和現實中靜岡山丁子屋的場景。
由日本橋出發，要行超過600公里。
喜歡動漫的，都知這這相是向《One Piece》致敬吧？
兩人一早買了這紀念品，預備到終點時拍照，但結果太累忘了，現在香港補拍。
facebook : 不青春也可熱血
採訪：陳孝義
攝影：鄧鴻欣（部份圖片由受訪者提供）
source : https://hk.lifestyle.appledaily.com/lifestyle/travel/daily/article/20180922/20505083
+++++++++++++++++++++++++++++++++++++++++++++++++++++++++++++++++
有病  ) |  0 02018/09/22, 11:01:09 上午 |
|
