https://hk.entertainment.appledaily.com/enews/realtime/article/20180917/58693036
強颱風「山竹」蹂躪香港，摧毀各區設施，亦帶嚟多不勝數嘅垃圾，自己地方自己救，好多居民都幫忙清理自己屋苑附近嘅廢物，不過更加有好心人四圍去幫手執垃圾，其中一個就係賭王千金何超蓮，佢知道今日路面情況實在太混亂，先係落order叫員工唔使返工，再召集員工、朋友同smilewithushk義工總動員幫手，分3批人分別到杏花邨、將軍澳、沙田3個地方清理垃圾，而超蓮就同王灝兒（JW）去到重災區嘅杏花邨。
辛勞一天後嘅超蓮接受訪問話：「11點開始召集義工，叫大家一齊執垃圾，知道會好阻街，晏畫3點鐘時，我就見到JW like我啲相，跟住我就問佢去唔去，JW都話嚟，我哋就沿海咁樣執。」
超蓮話剛開始時只係得10幾人：「見我哋執緊，途人問我哋有冇勞工手套，可唔可以加入我哋，幫手一齊做，好多居民好幫手，有啲知道我哋唔夠膠袋，畀咗洗衣房好巨型嘅白色膠袋畀我哋用，覺得香港人非常之團結，好感人。」超蓮補充話3批義工加埋有70幾人，再加上路途有好多人都加入，所以有成100人：「好多年青人加入我哋，香港有好多有心嘅年青人。」
另外，JW就話：「其實我覺得最恐佈係發泡膠，好似雪山咁多，好多層，仲要係我哋諗唔到點解啲發泡膠會喺度，之後我哋諗喺海底積咗好多，啲海浪撥翻上嚟，其實係我哋種嘅恩，跟住我哋結咗咁多果，執咗30幾包全滿，好開心見到好多義工幫手執，杏花邨嘅居民落嚟話畀我哋知，喺邊度需要人幫手執垃圾。」 |  1 02018/09/18, 12:49:00 下午 |
|
