 https://hk.entertainment.appledaily.com/enews/realtime/article/20180915/58684930
有線寬頻旗下嘅免費電視奇妙電視，喺去年5月14日開台，不過開台一年多，不但未見有乜嘢成績，反而不停出現裁員情況。
早排《蘋果》都報道過，為奇妙提供節目製作嘅有線電視兩度裁員，上個月將娛樂新聞組全組炒咗12人只剩一人，到今個月初又裁咗 on air promotion (形象宣傳)、體育組、工程部同行政部合共逾30名員，由於佢哋將啲節目外判，傳聞今年底仲會有進一步裁員行動㖭。與此同時，奇妙電視將會改名及改台徽，實行成個台大改革㖭。
《蘋果》收到獨家消息，奇妙電視將改名為「香港開電視」Open TV，好明顯係想大家開電視睇。但一聽呢個名，似乎有啲問題，如果用國語嚟講，「開」字發音係「kai」，「kai」嘅意思，係無聊、可笑....，唔單止咁，個「開」字，諧音同粗口近似，好肯定呢個名，會引嚟網民無限聯想。《蘋果》聽聞個新台徽，係搵出面廣告公司專人設計，下個月11日奇妙電視會舉行大型發布會宣佈呢件事，以及成個台嘅大改革。
對於改名做香港開電視，奇妙電視外事部回應：「集團未來將有不同業務發展，希望大眾繼續留意集團最新發展動向。香港開電視係其中一個選擇，我哋仲有幾個名㨂緊。」
《蘋果》取得一張介紹「開電視」嘅圖片，原來奇妙電視改名做開電視，除咗想大家開電視睇之外，仲想話「開創、開心、開放、開拓」，而圖片中跟住又話「香港精神‧香港希望」，唔知大家又點睇呢？ |  0 22018/09/16, 6:35:28 晚上 |
|
