https://hk.entertainment.appledaily.com/enews/realtime/article/20180911/58668434
「多謝大家對《全民造星》嘅支持，我們正積極籌備總決賽詳情，請密切留意ViuTV官方平台的最新公佈。」夾埋標點都只係46字。用寥寥46字就可以化解一場牽涉港中嘅公關災難？係ViuTV天真，定係出呢個Post嘅fb小編天真？
事源因為近日有網民發現ViuTV節目《全民造星》喺微博開咗群組同大陸網民溝通，本來大家各有各玩係冇問題，但係弊就弊在，節目組竟然喺微博發放獨家消息畀中國網民，而喺香港嘅網民就乜都冇，仲要上返大陸睇先知有咁嘅事，網民當然好嬲啦，仲話：「明明話要為香港造星，重現八九十年代港人追星嘅光景，但係就放啲獨家料同focus畀中國人，要做香港明星但又當香港觀眾次要，咁算點？我唔求你優先對待香港觀眾，但至少做到兩邊一視同仁可以啩？」
所以，如果有留意開ViuTV《全民造星》，噚晚應該都不斷按F5，等嘅就係ViuTV官方回應，結果，等到嘅只係46字。亦有網民去咗節目監製花姐ig，發現咗一個新post，內容如下：「我好想好想交代下，我的確有啲低能，上星期四睇到游大東Facebook內容提及造星總決賽日期，然後我誤以為公司已經公開咗，於是有人問我有關事宜，我都毫不猶豫回答。」
花姐續寫道：「其實我只係一個單純嘅電視監製，只係想做好個節目，對有收看節目嘅觀眾亦都一視同仁，根本冇諗其他嘢。後來發現我呢個糊塗令部分嘅觀眾唔舒服，唉，真係唔好意思！其實呢個純屬係我嘅錯失，與公司立場同造星仔仔無關⋯⋯請見諒（我可能呢番說話會繼續令大家不滿，但仍然想真實講我心聲俾大家知）」
的確，花姐喺微博《全民造星》私人群組公佈咗喇，總決賽日期係下月14日，九展見，要抽飛。歡迎大陸人來港觀戰。令港人氣結尚不止此，《全民造星》參賽者如Lokman、Jer(柳應廷)同花姐一齊回答微博fans問題，仲率先透露埋總決賽時地，香港嘅fb？「小編」遲遲不回應，不公佈，不化解。
ViuTV個fb，由噚日洗版到今日，以下回應已概括晒所有：「微博個私人group係咩料呀？有總決賽消息居然第一時間通知微博個私人group，都唔係update hk人用最多的fb/ig，又話做咩香港偶像明星，咪再扮啦偽本土！」、「喺微博公佈得啦，香港觀眾二等公民嚟姐，唔使理佢啦，係咪？」
就連旁白文卓森亦被牽扯進去，因為《全民造星》仲做埋微博live，且被香港觀眾批評只讀微博comment。結果旁白都要回應：「其實喺後台用微博開直播唔係我嘅主意，而公司Facebook團隊喺知道我會喺後台開直播之後，就話想拍攝埋一份。兼顧唔到兩邊係太廢，會反省下。」
晚上近7時，ViuTV製作部副總裁金廣誠就此事回覆《蘋果》稱：「今次漏咗消息出去係人為上失誤，引起大家誤會，好抱歉。我哋對所有支持嘅觀眾、fans都係一視同仁，而有關《全民造星》決賽嘅安排，目前仍有啲細節傾緊，所以有進一步消息，我哋稍後會喺官網統一發放嘅。
也有網民留言：「我明白ViuTV fb小編同微博組放消息係唔同人，責備小編都冇用，但係希望微博組嘅人自重自覺啲，尤其是一些高級及有豐富經驗的製作人及其團隊，明知不是私人group，有大量外人（甚至外國人），有一些消息是不能胡亂發放。試問《Avengers》導演私下向中國fans透露下一集結局，美國fans會有咩反應？你唔當呢fb留言嘅人係支持者冇所謂，但敬請該位製作人可以回歸祖國懷抱，交中國稅，真正擁抱各下的微信之友。」 |  0 12018/09/12, 12:21:32 凌晨 |
|
