「美味的冷飯始終是冷飯」
喺Marvel Cinematic Universe（MCU）至今20部作品當中，《蟻俠1》依然穩佔我心目中Top3。上星期三《蟻俠2：黃蜂女現身》開畫，作為鐵粉我當然首日即睇，不過入場前亦做晒心理準備：按MCU慣例，一個系列嚟到第二集通常都變得相當計算，總之上集Work嘅今集照辦煮碗。作為兩個鐘頭娛樂片，《蟻俠2》絕對無悶場：飛車追逐，加上兩個主角不斷變大縮細、前掩後攻，睇得出今集明顯更揼本。之不過好多上集創作人膽博膽嘅另類幽默，例如「配音Gag」、「Thomas小火車巨大化」，今集已經變成指定動動，總之觀眾照樣笑得出，你就唔好問點解唔試新嘢嘞。
值得一讚嘅，係今集人物描寫稍為落多咗筆墨。全片以「父女」作為隱藏主題：主角Scott Lang同囡囡Cassie，上一代蟻俠Hank Pym同愛女黃蜂女，仲有新奸角Ghost同佢監護人......不同嘅親子情輪流上演，算係有血有肉。特別係老戲骨米高德格拉斯飾演嘅Hank Pym，今集戲份比上次更重，一方面演呷醋外父，另一方面又扮演面對人生缺失嘅大男人，為部戲提供咗上集稍嫌唔夠嘅戲味。
「《復仇者》黑歷史」
講到大男人，今集最意想不到嘅，係故事竟然輕輕觸及漫畫原著另一個主題：男人自尊。當主角一伙遇到Hank嘅冤家——曾經同佢一齊試驗巨人科技嘅Bill Foster，新一代蟻俠Scott竟然同人哋老人家互相認叻，誇耀邊個變身變得最大。「叻，我至叻」，男人大忌，偏偏好多人樂此不疲。如果一個麻甩佬要變到六十幾呎高至覺得威，可以想像佢個玻璃心其實有幾渺小。Marvel原著就經常借第一代蟻俠Hank Pym，探討男人自卑又自大嘅畸型心理，甚至不惜將劇情推到極黑暗嘅境地，成為《復仇者》漫畫一段揮之不去嘅「黑歷史」……
「打老婆的一拳超人」
未睇過原著嘅朋友或者唔知，Hank Pym喺原著其實係「復仇者聯盟」第一代創始成員。不過呢位只識變大變細嘅二線英雄，身處鐵甲奇俠、雷神呢啲勁到無倫嘅行家當中，原來暗啞底自卑到痹；加上作為頂尖科學家，佢不論名氣定成就都及唔上Tony Stark、Reed Richard（神奇先生）呢啲天才……於是條友整整吓開始諗埋一邊，繼而鑄成大錯。
如果單睇電影《蟻俠2》，眼見蟻俠同拍檔黃蜂女打情罵俏，你一定覺得人哋好Sweet。估唔到喺漫畫入面，Hank Pym曾經化身「一拳超人」——一拳打到老婆黃鋒女瞓喺地下！故事發生喺1981年出版嘅《Avengers》213期：話說當年Hank喺一次行動因為一時衝動，向一個已經投降嘅女壞蛋開咗一槍……咁你知啦，對復仇者呢啲道德L嚟講，呢啲無品嘅行為一定要割席嘛，於是Hank面臨內部聆訊，極可能被踢出group。點知呢隻玻璃蟻平時已經屈住屈住，家陣畀人除名加更發晒癲，於是三日三夜唔食唔瞓，整咗個巨大機械人出嚟同班老友死過！結果機械人畀復仇者擺平咗，Hank Pym老羞成怒，就係眾目睽睽之下，一鎚樁咗埋去自己老婆到……。
「MeToo年代的美漫」
喺美漫所謂「黃金年代」（1930's-1950's），創作人民智未開，大男人嘅超級英雄掌摑女角不時有之。直到81年蟻俠呢一鎚，Marvel終於撥亂反正，對傷害女性正式擺出零容忍嘅姿態。因為打老婆，蟻俠唔止被踢出復仇者，仲成為英雄界嘅過街老鼠，以前班friend見到佢都無晒偈傾。多年嚟Hank想盡辦法彌補，甚至斥資開辦保護受虐女性嘅庇護中心……可惜打女人就係打女人，事件喺所有人心坎都留低陰影。直至三十幾年後最近，Marvel一眾作者依然無忘記呢段黑歷史：喺上年出版嘅《Secret Empire》第4期，情緒唔穩定嘅Hank再次崩潰，變咗同機械人Ultron融合嘅大奸狗；當佢質問成班復仇者巴打，點解咁多年嚟都冷落自己，口直心快嘅Tony Stark都係二話不說，一講就講返打老婆單嘢……。
好嘅作品能夠回應時代。好似《Secret Empire》呢啲作品，能夠回應MeToo#時代嘅兩性議題，正正係美漫厲害之處。其實Marvel等公司出品嘅超級英雄漫畫不乏畀成年人睇嘅深度閱讀，有機會再另文介紹。
撰文：阿雞
《蘋果動新聞》前創作總監，文化雜食者，high嘢cheap嘢都啱，淨係冇中間。現為網台Booom主持cult片節目《百老匯電椅中心》，並負責附屬FB群組《百老匯電椅中心：放棄治療部》（broadwayelectricchair）
source : https://hk.lifestyle.appledaily.com/lifestyle/culture/daily/article/20180707/20442618
+++++++++++++++++++++++++++++++++++++++++++++++++++++++++++++++++
未睇  |  0 02018/07/07, 10:58:32 上午 |
|
