顯示圖片
戰勝毒品 做戒毒中心舍監支持「同路人」



https://video.appledaily.com.hk/mcp/encode/2018/04/22/3596016/20180423_sub689newAD_w.mp4


馮貫中前半生浮沉毒海與監獄,現職為舍監,與戒毒者同行。

「浪子回頭金不換」,更生人士阿偉(化名)及馮貫中,前者出獄後,幾經辛苦在Kim Robinson的髮廊找到容身之處;後者則花十年戰勝毒品,意外得到千載難逢機會,投身舍監行業,拯救沉淪毒海的邊緣人。

馮貫中的前半生,只與「毒品」和「坐監」掛鈎。今天的他是運動健將,跑得跳得踢波得,更不時代表社區中心足球隊出賽,但數年前他只是一名癮君子,幾乎所有毒品都食過。他自小與家人關係很差,與父親幾乎零溝通,不時被兄長欺負,於是他選擇流連街頭。「每日喺屋企樓下流連做邨童,接觸到江湖人士,發現跟大佬賺錢好易,仲好過做餐廳、運輸,當正自己陳浩南咁。」16歲他加入黑社會,抱着「玩毒品」心態開始食毒品,亦是與父親鬥氣,「佢同我講,識講粗口等同入黑社會,食一啖煙代表食白粉,咁我就真係吸毒畀佢睇!」後來犯事入獄,出出入入囚房,對毒品倚賴日益嚴重。「喺入面同班手足稱兄道弟,賣私煙入貨唔夠錢會借畀你,但牽涉利益上嚟都唔會幫,我覺得毒品先係至親,陪我走到最後。」


貫中大半生浮沉毒海,最後全靠社工支持才得以闖過。


戒毒後貫中與家人重修舊好,還不時會一同外出遊玩。

友人一言「點醒」 主動找社工戒毒
吸毒成癮,令他忘卻世事。為吸毒傾家蕩產,甚至搶朋友錢或打人,「瞓醒、去廁所、半夜扎醒都食兩啖。嗰陣我無人性㗎,諗返都覺羞家。」數年後,後遺症逐漸浮現。25歲時因膀胱組織開始壞死,尿頻程度令他不能離開所住的邨,「吸毒耐咗,已經係記憶,好似你拎筷子會伸起右手一樣。傷到身體機能好差,頻密到有時坐喺廁所一晚。」直至有次回家中途遇到女性朋友,對方劈頭一句問他為何變得那麼樣衰?回家照鏡,才醒覺自己與骷髏骨無異。「自尊心受創,本來都覺得自己靚仔嘛!」他笑說。旁人一句,燃點起他戒毒的鬥志。

他主動找社工戒毒,但斷斷續續沉淪毒海,社工問他喜歡甚麼,他想起多年前的興趣──足球。對方邀請他參加足球隊練習,第一次見隊友,踢了數分鐘便尿急,最後「借尿遁」,「一去廁所屙鮮血,好辛苦好痛,覺得自己係球隊負累。」後來社工再約他,還陪他一齊踢,令他好感動,「她曾經同我講,要相信潛能一定比想像中大。」這番激勵令27歲的他決心到「日出山莊」接受住院戒毒。之後因膀胱組織壞死,需進行切除大腸手術,並植入人造膀胱,但他沒有氣餒,戒毒後重返足球隊,隊員不但沒責怪,還給他無比鼓勵,令他決心成為一分子。

展開工作之後令他感到氣餒,「老闆借意攻擊你。唔見咗錢,老闆一定問你先。」之後透過社工應徵「日出山莊」舍監,決定以同路人身份支持戒毒者。「呢家甚至輔導吸毒嘅媽媽,幫手湊兩、三歲的小朋友,朋友笑我湊仔公,但內心好滿足。望住佢哋經歷高低起伏,為戒毒而堅持覺得好開心。」他嘗試與家人重修舊好,主動與父母破冰,「社工問我係咪真係唔愛佢哋,我諗咗好耐,其實內心緊張佢哋,只係無表露。出返嚟之後,約咗老竇,罕有地同枱食飯。屋企人有次同我講,唔使畀很多家用,只要我活得開心,佢哋就開心。」這句說話,令他既感動亦悔疚,下定決心要對得住關心和幫過自己的人,並努力協助邊緣人士。「大家都有根深柢固的觀念,坐過監都不是好人。即使你唔畀機會,亦唔好踐踏或傷害我哋。」阿偉與貫中,縱使走過歧途,但他們都身體力行證明只要得到僅有的機會,毛蟲亦能化成蝶,得以重生。


貫中把熱情投放足球,參加不同比賽推廣足球文化。


戒毒後社工邀請貫中與家人參加工作坊體驗。

採訪:鍾藹寧
攝影:許先煜、張志孟、鄭明川(部份圖片由受訪者提供)
編輯:彭錦明

source : https://hk.lifestyle.appledaily.com/lifestyle/special/daily/article/20180423/20367853
+++++++++++++++++++++++++++++++++++++++++++++++++++++++++++++++++
做乜又吹捧
Good0Bad02018/04/23, 1:06:40 下午
本貼文共有 0 個回覆
此貼文已鎖,將不接受回覆
本貼文共有 0 個回覆
回覆感情臺