「聲音法西斯」
講到睇戲，我認我係「聲音法西斯」。
唔好誤會:對邊間戲院音響好，我完全冇興趣。我關心嘅係「非禮勿言」。曾經有操普通話嘅「即時評述員」喺戲院不停講嘢，散場後被我指住個鼻媽足兩分鐘。放映期間談話已經係重罪，地點仲係油麻地嗰間arthouse theater，應該皇天擊殺。好羨慕美國有專為film geeks而設嘅「Alamo Drafthouse」:呢條院線唔止專攻新舊恐怖、科幻、動作片，場內仲嚴禁玩手機同講嘢——一旦有人違規，隔籬位可以即時舉牌，戲院會派「專業睇場」的佢出去﹗
「對住銀幕大嗌『Rambo好嘢!』」
我真係聲音希特拉嚟：一方面憎人睇戲講嘢，但鴉雀無聲嘅觀眾又令我冇癮。三、四十年前，一般香港觀眾依然相當有水準:中一嗰年，去普慶戲院睇《第一滴血》第三集，高潮位係Rambo揸坦克車硬撼蘇聯武裝直昇機；鏡頭不斷對cut，史泰龍同蘇聯佬越嚟越肉緊，觀眾情緒亦越推越高……最後兩架嘢正面抄埋一碟，爆到散晒﹗嗰一刻全場掌聲雷動，歡呼、口哨此起彼落，有麻甩佬甚至企起身，對住銀幕大嗌「Rambo好嘢」!只見佢完全唔面懵，亦冇人覺得滋擾。一部好嘅娛樂片應該牽動觀眾情緒，而大家睇得投入理應適當時候畀反應，呢啲先叫識睇戲丫嘛。唔知係現代人睇戲太多，對官能刺激冷感，還是大家生活壓力大，搞到「情感中風」……總之依家啲人睇戲往往木無表情，甚少大笑大叫，我睇林鄭讀施政報告都興奮過佢。(想感受當年《第一滴血》嘅現場氣氛，可以睇返呢段再自行腦補: https://youtu.be/MRC1UwGGXNg
「用音效嚇人就好似『交稅』」
當然唔怪得晒觀眾。大家睇戲冇反應，電影人亦要負好大責任。好記得當年睇恐怖片王《午夜凶鈴》，我喺戲院真係驚到walk out咁滯——驚，唔係因為貞子由電視機躝出嚟，而係套戲不斷濫用尖刺音效，幾乎隊到我「耳朵流產」。喂大佬，我睇恐怖片係想你兇我個腦，唔係叫你SM我耳膜喎。要挑戰聽覺，我聽蔣議員議事得啦，使乜睇你箒?呢啲同部戲唔啦更嘅「音效味精」已經成為荷里活常態，難怪觀眾對恐怖片冇晒反應。好似如今被外國影迷疚病嘅「jump scare」，根本就係「喺唔太恐怖嘅畫面硬加失經無神嘅音效」；感覺就好似一邊睇戲，一邊有稅局職員坐喺隔籬不停派稅單……咁實驚架喎，但我驚得好唔gur囉。
「《無聲絕境》:冇聲，先最驚」
所以，睇完近期上畫嘅恐怖怪物片《無聲絕境》(A Quiet Place)，我開心到好似下半世唔駛交稅。(《無聲絕境》預告片: https://youtu.be/f5yEfqyyyno
部戲講不明異形侵襲地球，主角一家四口被圍困喺紐約近郊嘅住所，歷時一年有多。最攞膽係呢啲異形靠聲音覓食——稍為大啲嘅人為聲浪都會觸發佢地聽覺，即時撲出嚟將你生吞。為生存，一家人唯有改晒所有生活習慣:平日出入唔着鞋，用手語代替說話，煮飯要匿入地牢，食飯亦唔可以用刀叉碗碟……就連小朋友玩大富翁都要用布做嘅棋。大人細路長期活喺「禁聲」嘅恐懼當中，而呢份恐懼亦100%過晒畀觀眾。
有人數過，全片對白加埋得兩分半鐘，可想而知觀影期間有幾靜。但係靜，唔等於完全冇聲。男主角兼導演John Krasinski聰明之處，係佢喺電影加入各種環境聲效，反襯一家人死寂嘅日常生活。而畫面上偶然出現嘅物件，就成為令人不安嘅炸彈——一個響鬧計時器，或者女主角肚裏面未出世嘅BB，都係爆鑊嘅保證。嗰種「唔知幾時嚟料」嘅等待，簡直令觀眾睇到焦慮症。最重要係，套戲配樂盡量克制，音效設計更加完全配合畫面，唔會出現唔屬於故仔裏頭嘅聲音。觀眾因此真正親歷其境，忘卻自己只係睇緊電影。
睇戲當日因為未食飯，我帶咗份三文治入場，好衰唔衰仲要有紙袋，真係後悔到不得了——唔食，又餓；食，就全戲院聽到你「時思索索」，又驚又老尷。隨着劇情發展，我直頭好似細個睇《殭屍先生》，一路睇一路忍唔住閉氣。
令人意外嘅係，Krasinski先前只拍過兩部文戲，而且平日甚至唔睇恐怖片。為咗開呢部戲佢做足功課，不斷研究《異形》、《魔鬼怪嬰》等經典。佢嚇人手法亦明顯有向希治閣偷師——一場大肚婆踩鐵釘嘅戲份，盡顯「緊張大師」風範。不過我最buy嘅，係佢利用寧靜炮製戲味。無論男主角同失聰囡囡嘅父女矛盾，還是兩夫妻係絕望當中相濡以沬，全部唔靠對白，一切眉目傳情。結果部戲由有血有肉嘅人物帶動故事，而且文戲不比驚慄場面遜色，拍出荷里活恐怖片久違嘅真實感。《無》片令我諗起六、七十年代、兼顧寫實同娛樂性嘅「New Hollywood」電影；事後做資料搜集，發現Krasinski果然有向當中經典《大白鯊》取經。想知人稱「美國新浪潮」嘅New Hollywood作品係咩味，不防嗒下《大白鯊》呢場文戲: https://youtu.be/dLjNzwEULG8
撰文：阿雞
前《蘋果動新聞》創作總監，文化雜食者，high嘢cheap嘢都啱，淨係冇中間。現為網台Booom主持cult片節目《百老匯電椅中心》，並負責附屬FB群組《百老匯電椅中心:放棄治療部》: broadwayelectricchair@ facebook
source : https://hk.lifestyle.appledaily.com/lifestyle/culture/daily/article/20180414/20360914
+++++++++++++++++++++++++++++++++++++++++++++++++++++++++++++++++
未睇  |  0 02018/04/14, 11:06:59 上午 |
|
