好多人都未信支爆將近，只不過 周潤發 近日向博納影業追數，呢單表面上嘅娛樂新聞，其實有可能揭開支爆另一章，中國影視界造數嘅一幕。如果中國影視界堅好景，係唔會搞到香港影視界個個都咁霉。但實際上，梗係另一回事喇。
周潤發 追數與博納影業篤數
呢次觸發一早淡薄名利 周潤發 入法院追數，係博納影業未有照合約按票房分紅。《賭城風雲》系列有三十億票房，如果分紅堅係億億聲咁計。如果可以咁堅， 周潤發 可以揀戲拍，香港稅局都應該要多謝中國。但實際呢。梗係唔係果回事，啲數係篤出嚟嘅，雖然影視界一向被用作洗黑錢嘅工具，但都要有堅嘅票房用嚟將啲錢漂白，變成實際嘅收入，而依家嘅情況係，啲錢根本無返過嚟，唔知去咗邊個黑洞度，又唔可以用吹大咗嘅票房嚟融資，結果咪出咗事。
大家留意一樣嘢，博納影業2010年去NASDAQ上市，如果可以去美國上市，無理由將自己喺美國退市，因為美國上市某程度係一個信譽保證嚟，你撻美國上市個朵，做好多嘢都容易好多喇。但2016年博納影業私有化，點解博納要私有化，話要回歸中國A股市場，呢個已經好奇怪，好明顯博納影業盤數喺美國嚟講係唔見得光，所以趁未有鑊氣果陣雞咁腳走人。去年開始將公司擺喺新疆(點解要擺新疆，奇怪)，然後搞上市輔導，跟住十一月話要準備IPO A股預披露，但集果十幾億人仔，乜票房成億億聲嘅公司，都係值果十幾億人仔，成件事都唔合邏輯。所以依家香港法院會唔會要博納交盤數出嚟俾大家睇，定諗計賠錢算數就好關鍵。但三十億票房，當中分梗啲都成億億聲，我真係留名食花生，究竟博納應唔應到 周潤發 夫婦嘅要求。
周潤發 夫婦依家淡泊名利，身家都係捐出去，其實都唔係為錢，係為成個市場嘅健康發展，依家合拍片變晒洗腦加洗錢工具，簡直污煙瘴氣，不知所謂，係時候撥亂反正，只不過，如果呢次連中國電影業龍頭博納都搞到一鑊泡，我真係睇會唔會中國甚至香港電影業，又變成另一個支爆觸發點。都係果句，成個中國都無水，呢啲怪事只會陸續有嚟。
https://martinoei.com/article/17206/周潤發-追博納數：支爆另一章 |  5 12018/01/31, 11:02:44 晚上 |
|
