https://hk.entertainment.appledaily.com/enews/realtime/article/20171117/57470148
第37香港電影金像獎將於明年4月15日舉行，過往金像獎直播，唔係無綫就係亞視，而自從2012年第32屆開始，香港獨家播映權一直落喺無綫手上。
不過，據《蘋果》收到可靠消息，ViuTV嚟緊喺無綫手上搶到第37金像獎香港免費電視獨家播映權，但到時會唔會中間唔加插廣告，一切仲要等開會先決定點做。本報記者致電ViuTV製作部副總裁金廣誠求證，他稱：「有消息嘅話我哋會公佈。」
金像獎播映權每年都會公開投標，除價高者得之外，仲要睇埋標書嘅其他條件，先決定到邊間機構可以中標。因為金像獎係有政府公帑贊助，所以規定要有Free To Air嘅電視台。據知，今年金像獎方便原定邀請本港3間免費電視台ViuTv、無綫同奇妙電視入標。不過奇妙電視仍未開台，所以今年只有兩間免費電視台申請播映權。
ViuTV其實舊年已經想攞金像獎嘅免費電視獨家播映權，但因為佢哋舊年4月先至開台，個台太新，所以直播權最終輸咗俾無綫，直至嚟緊一屆終於爭贏。
另外，本月25號舉行嘅第54屆金馬獎，ViuTV亦攞到香港免費電視播映權，同now TV嘅收費頻道衛視電影台一齊直播。
金像獎尚未公佈入圍名單，不過估計《空手道》、《29+1》、《拆彈專家》、《追龍》同《狂獸》都應該有份角逐。 |  2 02017/11/18, 10:37:42 晚上 |
|
