日清食品上市文件上線啦！近期新股熱到爆晒錶，唔通隻隻新股，隻隻都有得炒咩？日清呢個家傳戶曉嘅品牌，理應伏極有個譜，但以下綜合咗10件關於日清而你未必知嘅事，睇完再諗抽唔抽之餘，長知識都好。
1）只包中港業務上市 盈利一路跌
出前一丁全港最多人食毋須多講，即食麵銷量勁穩定，幾乎保持零增長，但越嚟越唔好賺，2015年盈利跌32%至1.01億；嚿年盈利再跌10%，至9,076萬；今年上半年盈利跌14%至9,162萬。由於近兩年都有唔少廠房減值虧損，年尾先入賬，所以下半年盤數零舍差。
2）香港人平均每年食56個即食麵
2016年香港即食麵銷量18.2億元，鯨吞4.146億個即食麵（包括杯、碗麵），即平均每名香港人每年食247蚊即食麵，或56個，其中42.6包係袋裝即食麵。大陸人2016年消費喺372億包即食麵，即平均每名大陸人一年只食27個。
3）節日仲多人食即食麵
以為過節大家唔食即食麵？日清上市文件講到，喺假日季節，通常會錄得較高產品收入。究竟係咪因為放假更多人宅在家，被逼食即食麵過節？
4）董事一個大陸、香港人都冇
或許係日本公司嘅關係，即使做中港業務，5位執董都清一色係日本人，只有非執董董烱熙係台灣人，連同獨立非執董，一個內地人或香港人都冇。就算係保薦人都要揀埋日本公司旗下野村國際（香港）。莫非日本企業真係咁唔信得過香港人？
5）大陸每賣100個即食麵 得1.4個係日清
2016年，以銷量計，康師傅同統一嘅內地即食麵市佔率分別係33.7%同11%，日清只得1.4%。以銷售額計，康師傅同統一嘅內地即食麵市佔率分別係46.5%同17.8%，日清只得2.8%咁慘豬。即係話日清產品喺大陸貴，所以少人食。
6）1984年開首個香港據點 90年收購公仔麵
香港人一直稱呼即食麵為「公仔麵」，原因當初有「公仔」品牌即食麵於香港產銷，於1990年，日清收購「公仔」品牌生產商永南食品，吞併最大競爭對手。
7）合味道原來有「叮叮飯」
日清旗下合味道原來喺2012年，推出叮叮飯，3款都係海鮮味，分別只在於咖喱、香辣同原味，不過唔知仲有冇得賣。創辦人安藤百福於1948年創立日清，1958年推出第一款即食麵係「雞湯拉麵」，1968年先有出前一丁。
8）即食麵製作13個工序 又浸浴又蒸又炸
包括原材料、計量、攪拌、成型、壓制、切麵條、蒸煮、浸浴、分割、煎炸、冷卻、包裝、最後檢驗。香港生產員工超過500個。
9）日清五名大客 香港上市公司賖數期最長
日清有五個大客，信貸期介乎15日至75日，其中有一家香港上市公司附屬，港澳經營逾300間超市、大賣場及便利店，賖數期75日係最長……唔係759，因為759冇300間分店，估計係百佳。
10）一直物色收購機會 但搵唔到
文件又講到，日清一直想喺大陸物色收購機會，但一直搵唔到目標。莫非中國即食麵企業全部「唔食得」，買唔過？
https://hk.finance.appledaily.com/finance/realtime/article/20171116/57460707 |  2 22017/11/16, 7:37:35 晚上 |
|
