https://video.appledaily.com.hk/mcp/encode/2017/11/14/3483520/20171115_sub434newnewnewAD_w.mp4
29歲嘅俊仔係香港少數嘅職業滑板運動員。
細個見到有人踩滑板，總係唔敢行埋去，覺得佢哋唔係人咁品，其實踩滑板嘅人都好Nice，陸俊彥（俊仔）同阿牛就係其中兩位。
俊仔（右）同阿牛最鍾意玩滑板，更視為生活嘅一部份。
俊仔同阿牛踩左滑板十幾年，29歲嘅俊仔仲係香港少數嘅職業滑板運動員，而且亦係香港現時唯一一位滑板精英運動員，喺體育學院接受訓練。
喺好多人嘅眼中，都會覺得板仔好曳，家長都唔敢畀佢哋嘅小朋友群埋啲滑板仔，好似俊仔咁，細個踩滑板嘅時候，朋友嘅父母會覺得俊仔會帶壞佢哋嘅仔女，就算係親戚朋友都總會認為佢塊滑板好容易會撞親佢哋。雖然係咁，滑板對俊仔同阿牛嚟講係佢哋嘅一種語言，亦都係最喜歡嘅運動，阿牛更加認為滑板係生活嘅一部分，佢哋踩滑板唔着重比賽或者輸贏，只要能夠完成一啲高難度動作就會好開心。
喺香港做運動員非常之唔容易，如果你無辦法取得一點成績或者得到奬項，你唔會得到資助，相反喺其他東南亞地區，只要你踩得好就會獲得裁陪及資助，可以去外國接受更專業嘅訓練，呢個亦都係香港滑板運動發展比其他地方慢嘅原因。
好多人覺得玩滑板好危險好容易受傷，但其實而家嘅情況已經有改善。小朋友會帶頭盔以及其他保護裝備，加上導師會指導你從一啲比較簡單嘅動作開始練習，所以唔會咁容易受傷。
雖然滑板運動係香港發展比較慢，但相比以前已經比較多人接受。俊仔希望可以將佢細個普遍認為唔健康嘅運動變成一種正面嘅運動，因為踩滑板係要反覆練習，從失敗中成長，好多時要練習幾百次以至幾千次先會有一次成功，呢種學習態度可以培養新一代學習面對困難，唔會因為失敗而隨便放棄生命。俊仔最希望係可以用佢所學嘅技術同經驗指導及訓練新一代嘅學生參加奧運比賽。
採訪：Wing@有種運動
攝影：Nile&Karen;@有種運動
source : https://hk.lifestyle.appledaily.com/lifestyle/wellbeing/daily/article/20171115/20214648
+++++++++++++++++++++++++++++++++++++++++++++++++++++++++++++++++
原來香港有人玩  |  0 02017/11/15, 11:21:33 上午 |
|
