顯示圖片
[賓週刊 - 壹盤生意 ] 大碼女生設計大碼衫一條褲 8個 size


Makayla面對鏡頭時從容自如,她坦言是透過拍攝產品上身照「訓練」出來。而她穿起大碼女生較抗拒的格仔褲同樣自信心十足:「其實著出街唔會真係好多人望你,反而佢哋唔敢著係因為自己無安全感。」

大碼女生設計大碼衫一條褲 8個 size

「以前有同學會叫我肥婆、肥妹,但其實身邊其他人可能偏瘦啲、造型出眾啲都會俾人笑,即係點都有嘢俾人講,哈哈!」今年廿五歲的吳詩雅( Makayla),青春期開始就跟「細碼」絕緣, XXXL(三加大碼)成為其穿衣尺碼起跳,但開朗的她卻沒因此與自信一詞斷絕來往;由三年前起於個人平台以分享日常穿搭開始,至現時設計過百款衣服、開店售賣 XL(加大碼)至 XXXXXXL(六加大碼)的大碼時裝。「我認為專賣大碼衫喺香港係小眾行業,一直都少人專注呢瓣,但隨住社交網絡興起,多咗大碼女仔唔再收收埋埋,肯走出嚟展示自己。」小眾的一群不等於沒需求沒要求,大碼女生要的從不是光環,而是跟別人擁有平等機會,買衫如是創業也如是。

位於荔枝角傳統工業區內的 Fashion Corner Plus,該工廈仍是採用手動門升降機,由「揸叔叔」負責控制上落。莫說街客,熟客上來也需要花點心神,在這裡開鋪實在需要勇氣。「開鋪頭兩年以網店為主,後來有客鼓勵我開實體店,話想上嚟試衫。唔係一兩個客咁講!而係不停都有,所以我至開始有開鋪念頭。」由上至下身也穿上自家設計、化着韓妝的 Makayla坐在二百呎的小小空間內,說起創業的勇氣源頭。

一條褲八個 size 賣六百條起家

「我本身鍾意修身牛仔褲,但出面根本搵唔到,就算搵到著上身後小腿位都會起褶,唔好睇。」愛美乃人之天性,但 Makayla認為大碼女生卻好像失去打扮的權利。「好多鋪頭一係會有款無尺寸,一係啱著但無款,買到嘅都唔係真心鍾意又或會衣不稱身。」不甘屈就自己身心的她,決意自己的褲自己做,開始挑選最有彈性及舒適的布料,設計好後再交由家人的製衣廠生產,一做就做了多個碼數,希望把成果分享出去,結果出乎意料地受歡迎。「嗰條褲總共賣咗五至六百條,毛利都可觀。」定價一百九十九元的超彈力修身長褲更多設了中碼及大碼,總共有八個尺寸,未計褲子彈性,已包攬擁有三十三至四十四吋臀圍的女生。

客人 Money及 Sylvia坦言買褲是她們一直的煩惱,指已尋覓合適的韓式闊腳褲多時。「出面嘅闊腳褲,大碼人著上身後會令成個剪裁變怪。喺度終於搵到條啱嘅,大髀位唔會太窄又有闊腳效果。」 Sylvia更指十分欣賞 Makayla本人:「佢好樂觀,就算自己身形較豐滿,都會好注重風格,覺得肥嘅女仔都可以著得好好睇。」而在外面同樣難買的牛仔外套, Makayla亦有設計,以三百九十九元出售。





修身彈力牛仔褲可算是整盤生意的起點,定價為二百四十九元,成為不少大碼女生的恩物。



現鋪只有二百多呎及一個試身室, Makayla指未來搬鋪希望把試身室加至三個,也希望擴充室內空間。「始終客人都比較大份,希望佢哋試衫時唔使太擠逼。」



六加大碼的超彈力修身長褲臀圍最盡可拉至五十吋。

Sell貼心 谷人氣

以拍片作宣傳的 Makayla,除了性格能打動客人,更會分享生活小知識以增加人氣。「大碼女仔著裙時,大髀兩側會磨擦至出紅疹同痛,我就曾經分享預防心得,比如著打底褲、搽爽身粉或凡士林令磨擦時皮膚唔會太乾。」雖說鋪頭位於極舊的工廠大廈內,但訪問當天仍有不少客人持續上來,爆場情況也維持了數小時。同一時間, Makayla也忙於與經紀尋找新的鋪位,希望把鋪面擴展至五百多呎。「現時線下同線上客人比例分別係六比四,呢間鋪只整到一個試身室,試過有五至六個客人喺度排,搬鋪係希望整多幾個試身室,縮減佢哋等待時間。

「最多人買嘅係 XXL(兩加大碼)至 XXXXL(四加大碼),同我差唔多身形嘅朋友其實有好多。」店鋪最大尺寸雖是六加大碼,但 Makayla指只要在她能力範圍內的,也會幫忙訂製,最大試過有八加大碼。「我希望佢哋上到嚟,唔會失望而回。」

有一種肥叫身不由己

有網民批評藝人欣宜的「高調肥」如同「鼓吹脂肪」,某程度漠視了癡肥導致的健康問題;有定期做身體檢查的 Makayla認同應要關注肥胖所帶來的影響,但指非所有「大碼」也是由暴飲暴食引致。「我本身都係正常三餐飲食,有時食吓零食咁,同一般女仔一樣,但由中學時就開始肥。十五、六歲時大約有一百六十幾磅,試過節食同做運動想減至一百二十磅,最後成功瘦咗廿磅。」達到目標,卻多了無形壓力。「追到目標後卻唔係好開心,因為無預期中好睇好多。反而對磅數好敏感,一上磅發現重咗一兩磅就會心慌,諗係咪因為今日未去廁所。」最後選擇回復平常生活的她,現在閒時也會做運動,目的卻變了減壓。「依家好忙,有時出身汗個人會開心啲,我認為磅數維持住水平唔好大起大落就可以。」

「之前有遇過個客同我講佢本身好瘦,得百幾磅,但因為病要食類固醇藥,因此變到二百幾磅,佢有因為再著唔番以前嘅衫而好唔開心。」 Makayla指希望透過建議客人如何穿搭,而令絕望的她能重拾穿衣的樂趣。一家也屬偏肥體形的她,指對設計男裝也很有興趣。「我細佬都係肥嘅,有時見佢著得好唔型就想出手幫吓佢,哈哈!」看來大碼男生將會有福了。



對時裝設計零認識的 Makayla透過自學及自身穿衣的感受,逐步由選布料至設計紙樣「起家」。





超彈力修身長褲另設有鮮艷的紅色, Makayla認為:「成日話深色顯瘦,但其實大碼人著衫同普通人一樣唔應該受任何局限。」



「買恤衫的話,我哋比較大份,出面會無碼數但喺呢度會搵到。」客人杜杜最後更選購了其身上的仿皮褸,定價為五百九十九元。

創業貼士

「之前搜尋『肥妹、大碼女生如何穿搭』時,結果都係啲纖瘦女仔教你點再顯瘦,或係只教著深色衫。」認為不應只有單一方法穿搭的 Makayla,因此自設頻道分享心得,目前 YouTube上的訂閱者大概有四千多人,貴精不貴多,她成功引起大碼女生的注意。「如少著間條,可以先試幼身嘅條子,自己接受程度同安全感都會較高。另外都可以選擇斜膊嘅款式,令間條斜落去,減低視覺上太橫嘅感覺。」她指間條非肥人死敵,而自己的配搭也成功有助促銷自家設計。「自己分享時會配搭成一套一套,或係一條褲點樣有幾種著法,有好多客認為建議實用都會成套買,或一款要晒幾隻色。」

撰文:黃綺敏

攝影:梁正平

[email protected]

來源 source: http://hk.next.nextmedia.com

+++++++++++++++++++++++++++++++++++++++++++++++++++++++++++++++++

咁係搵到食
Good0Bad02017/11/09, 12:54:56 下午
本貼文共有 0 個回覆
此貼文已鎖,將不接受回覆
本貼文共有 0 個回覆
回覆財經臺