今次iPhone X炒價，真係考起好多老行尊！基本就連場內大莊，好多人都估錯晒價格走勢！11月3號首日開賣，原本好多人諗住會大炒，點知先達場內開市後，都只是以$11,200（256GB/黑）價位為最高，同預想的炒上5萬、10萬天差地別。
11月4日周六，好多人都以為是出口「水貨」的最後死線，一定會因為搶貨「交數」而炒起！誰知由於貨量太多（同日Apple開了8次iReserve，而且長開長有！），就連最當炒的256GB黑機，都只是低報$10,100。11月5號周日，正所謂水貨佬都要休息，加上銀行放假回唔切錢，令收機倍加困難，所以好多人都諗住價錢會下滑，不過又對唔住喇！誰想該日下午3、4點過後，大批自由行襯放假落嚟掃貨，256GB黑機拉高上$10,700、256GB銀機亦高報$10,500，不過一樣有價而冇貨，令不少收機舖飲恨！
11月6日周一，其實一致是看淡的，事關日版水貨今日到港應市，加上Apple又開始派貨，所以源於機多的原因，機價一定會下滑；不過現實是機價不跌反升！
其實當中不無原因，首先是先達早上11點一開門，已經有不少拉水貨的大陸人在先達守候，據稱每拉一部上大陸，都有近千元的賺錢水位，再來是今早第一輪Apple的iReserve，竟然在3分鐘內完結，須知上周六的8次iReserve，都開成十多分鐘或以上，所以令人估計今日的放機量較少，不過更重要的是香港果農的團結，近幾日的放機人的確見少了，所以在貨少的前提下，機價不斷上升。
截至11月6日下午2時為止，最新的放機價機為256GB黑機/$11,050、256GB白機/$10,950、64GB黑機/$9,100、64GB白機/$9,100，如果放機人數一直維持低水，機價有望繼續上升！不過亦老實講句，放機價好受放機數量影響，所以亦不太建議大家胡亂入市。
記者、攝影：朱崇德
source : https://hk.lifestyle.appledaily.com/lifestyle/tech/daily/article/20171107/20206413
+++++++++++++++++++++++++++++++++++++++++++++++++++++++++++++++++
說十萬個位係咪有病  ) |  0 02017/11/07, 1:22:17 下午 |
|
