顯示圖片
睇結衣BB正面抽擊 乒乓熱潮返嚟嘞!



https://video.appledaily.com.hk/mcp/encode/2017/10/31/3473880/20171101_sub318NEWNEWAD_w.mp4


做訪問期間,看到很多年紀很輕的學員,打得專業,已經絕非當年我們的街場級數。

要數以打乒乓波為主題的電影,記憶中是2002年7月在日本上映的《乒乓》,由窪塚洋介主演,還有「潮人」ARATA,香港的李璨琛也有份參演。事隔15年,11月9日香港又有乒乓波題材的電影上映,今次主角是人見人愛的新垣結衣和瑛太,這有否掀起你童年時打乒乓波的回憶?

可能因為打乒乓波只需要一張枱、兩塊板、一個波,而且舊式屋邨公園總有乒乓波枱,所以童年時你接觸籃球、足球前,大概已經打過乒乓球。以前自學打石枱,現在呢?在大量興趣班當中,乒乓球也算是熱門,有正規波枱、優質波板之外,還有專業教練,而且隨時是前港隊好手,例如香港前「乒乓孖寶」之一的高禮澤,「?家的確好少小朋友會在『街場』打乒乓波,有興趣嘅,都會嚟呢類訓練班打,唔會打壞手勢,而且我哋都更容易發掘到有潛質嘅小朋友。」應該說現在的小朋友很幸福,還是當年我們「柴娃娃」打街場更開心?

放學打兩鋪 猜枱滴滴仔
先講舊時,如果你現在30、40或者50歲,又如果你學校或屋企附近有乒乓波枱,你放學又唔願返屋企成日會去打兩鋪先,那我們應該有共同回憶。「滴滴仔、猜枱、滴死、新舊例、留波留板、離枱三呎」這些術語,可能你都聽過。未聽過的,現在講少少,當中「猜枱」就因為乒乓波枱不多,如果你到達時已經被別人「霸枱」(佔用),你可以挑機,打贏就可以擁有那張枱的優先使用權,其實這個很武俠,乒乓波的恩怨情仇,就在乒乓波枱上解決!「留波留板」是猜枱的附屬動作,即是賭魔大你三百萬,賭神拎張瑞士銀行本票出來一樣,猜枱之餘,輸家更要留低乒乓波或乒乓球板,玩好大;再來「離枱三呎」就是怕旁觀者影響球賽,請離開球枱三呎;最後「滴滴仔」即是初學者滴一下打一下;「滴死」即是乒乓波踩界Ace球;「打新舊例」我聽得多,但亦不太明白,好像是有些球例的不同,現在已無從稽考。

前港隊球員高禮澤,得過2004年雅典奧運會男雙銀牌、2006年多哈亞運會男雙金牌、2009年東亞運動會混雙冠軍,現在已經退役,成為乒乓球學園教練,雖然高教練2000年才來港,但也見證了潮流轉變,「當年我剛來港時,港隊內只得一個球員打全職,現在港隊男、女球員總共約20人。」所以香港的乒乓球熱潮其實一直熾熱,「尤其近年,香港乒乓球運動嘅發展係我來港之後最好嘅,好似黃鎮廷、杜凱琹都已經係世界排名前十嘅球手。而且?家乒乓球有好多訓練班,仲有乒乓球總會都會幫手推,由五歲開始訓練,有潛質嘅一直至入港隊都有一個梯隊,好多機會畀有潛質嘅小朋友受正規訓練,甚至為成為全職運動員鋪路。」

「可能因為香港空間有限,打乒乓波用嘅地方唔多,好似呢度咁,一間大房都可以放四、五張波枱,所以喺香港要打乒乓波好似比其他運動更容易,自然多人打。」電影中新垣結衣三歲受訓,高教練說如果有興趣,五歲左右來參加訓練會比較好,「其實打乒乓波可以磨練到一個人嘅意志、反應同思維,因為唔同對手要諗唔同戰術,專注力亦都好緊要,有家長話小朋友嚟打乒乓波之後,讀書時專注力好咗。」 


高教練的乒乓學園學員,年紀細細已經好抽得。(左起)方心愉、方心愛、許宸溢。


乒乓姊妹花,姐姐方心愉(左)希望可以做到職業球員,或者開球會做到教練。


香港比賽用乒乓球。波及配套都完善好多。




紅雙喜、雙魚、Butterfly這些品牌名是否似曾相識?原來現在也仍然大熱。

「比賽贏波最開心」
由我講好像不公平,都係訪問學員,這裏有兩個乒乓姊妹,11歲的姐姐方心愉說:「打乒乓波最開心,因為識到好多朋友。」而且打得叻所以有成功感?「其實係兩年前爸爸問我有冇興趣,我又想試吓就開始打,之後爸爸見我打得幾好,就畀我繼續打。」八歲的妹妹方心愛就明顯跟姐姐一齊玩啦?「最鍾意計分。」妹妹話,姐姐說:「即係鍾意比賽。贏咗就係最開心嘅時候。」妹妹補充:「最唔開心係比賽輸咗,姐姐都係,佢上次比賽輸咗喊。」香港傳統,「球」學求分數,不過如果你有做運動,你應該明白贏了比賽時的喜悅,很正常。問到有甚麼目標,另一個小球員11歲的許宸溢被教練點名打得好,很努力訓練,「周末會同朋友仔去打乒乓波,不過都會打吓籃球嘅,目標係……想入港隊,做全職運動員。」方姐姐呢?「都希望可以做到職業球員,或者開球會做到教練。」即是想學高教練?妹妹呢?竟然答:「我想做醫生!」好好,好生性。

其實只要有結衣BB,已經可以吸到大量fans,而且這套《乒乓情人夢》(原名《MIX!》)更是講兩個失敗者在人生低潮遇上,重新努力練習,雖然最後未知成不成功,但都努力過,出過身汗,熱血加愛情,這類劇情應該無得輸。再簡單講講故事,結衣BB演出的富田多滿子,自三歲已開始受訓,阿媽催谷日練夜練谷出反效果,最後放棄乒乓球。長大後乒乓球手男友出軌斷正,結衣回鄉療傷重拾乒乓球,遇上失意前拳手瑛太,加上看到前男友和小三打混雙越看越嬲,決定自組混雙組合打低仇人。就是這樣的劇情,宣傳還落足力,最深刻是找來經典乒乓球漫畫《去吧!稻中乒團》作者古谷實畫了一張海報,主角新垣結衣、瑛太換成前野和井澤,超正!而上月尾在日本上映時,亦得到每星期票房冠軍。

最後,和高教練談到這套電影,他說當然捧場,因為有這類電影應該可以令更多人對乒乓球運動有興趣,是好事。而說到混合雙打,曾得過金牌的他亦說:「如果拍檔係情侶應該有一定幫助,因為默契一定好好多,兩個互相了解對方性格,知道對方幾時會比較急,幾時會比較穩定,對比賽時配合有好大幫助。不過香港暫時未有情侶檔,如果有一定要撮合佢哋打混雙啦!」


今次電影主角是人見人愛的新垣結衣和瑛太。


有說新垣結衣在戲中的童年造型是參考日本球員福原愛,角色由童星平澤宏宏路主演。


平澤宏宏路跟6歲時的福原愛真的很相似。


2002年的電影《乒乓》,當年香港也有上映,你記得嗎?

採訪:陳孝義
攝影:鄧鴻欣
編輯:陳慧玲
場地提供:旋風乒乓球學院

source : https://hk.lifestyle.appledaily.com/lifestyle/wellbeing/daily/article/20171101/20200268
+++++++++++++++++++++++++++++++++++++++++++++++++++++++++++++++++
原來咁快
Good0Bad02017/11/01, 12:02:12 中午
本貼文共有 0 個回覆
此貼文已鎖,將不接受回覆
本貼文共有 0 個回覆
回覆體育臺