顯示圖片
【殯儀玩具】手提紙紮男女燈籠售罄「畀小朋友開party」


上星期一張「紙紮燈籠」照片於網上瘋傳,傳統紙紮妹娣(靈堂祭台兩側的紙紮公仔,一女一男婢僕),變身手提式燈籠,將鬼節同中秋節兩個傳統節日溝埋,心寒得嚟又幾搞鬼,非常吸睛。事後網上有殯儀業專頁立刻舉辦團購,有人話百無禁忌創意行先,亦有人話大吉利是唔好侮辱傳統。

有冇負評都好,「紙紮燈籠」團購開賣一日,一百對極速沽清,非常渴市。雖然好賣,但專頁表示唔會再搞第二團,想擁有就要搵原創者。而「紙紮燈籠」呢個概念,其實嚟自一位紋身師Noop Parker。

「本身造呢隻燈籠係just for fun,諗住自己玩。」Parker喜歡創作,話諗起最舊款、最原始嘅燈籠都係由紙及蠟燭組成,於是試吓紙紮加燈籠「mix& match」。對於作品「一炮而紅」,佢覺得好過癮,「作為一個設計師,可以製造一個話題,影響到香港,感覺唔錯。我覺得香港人太悶,要有啲新衝擊。」


上星期一張「紙紮燈籠」照片於網上瘋傳。受訪者提供


原創者Noop Parker本身是一位紋身師,圖右為他的作品。受訪者提供


紙紮燈籠$250一對,你敢唔敢買?受訪者提供

殯儀業專頁搞的團購,其實與Parker無直接關係。當日Parker的設計面世後不久,有朋友話佢知,專頁「偷咗佢橋」,Parker就話其實冇諗係唔係偷,「有人抄其實會有少少暗喜,冇話介唔介意,始終我都唔係紙紮公仔嘅原作者,紙紮公仔係歷史流傳下來嘅傳統,我都係拎咗人哋嘅嘢嚟DIY,重新包裝。」事後該專頁主動肯定Parker的創作身份,向Parker提出以$1,500買佢一百套紙紮燈籠,不過Parker並無答允,「呢個價錢其實冇得做,所以我有冇接。」

Parker在自己facebook開放畀有興趣嘅朋友購買,有客人話要買番屋企嚇自己嘅囝囝、有人話朋友生日近中秋,所以買畀朋友做禮物、有一個媽媽仲話買定等中秋節,畀小朋友帶番幼稚園開party。買嘅人形形色色盡不相同,Parker就最開心,「見到大家唔係一成不變」。

Parker手上還有小量紙紮燈籠,大家有興趣可以透過他的facebook向他洽購,現貨售罄,就未必會再做。但佢透露,嚟緊聖誕節會同樣諗諗如何利用傳統媒介去「搞串呢個節日」,想一齊玩就要follow佢facebook咁話。

Facebook:Noop Parker

記者:李珮禎

2017果籽繼續認真知味。識買惜用。行以求知。好事多為。重修舊好。
緊貼果籽報道,即like:http://fb.me/AS.AppleDaily

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
咁大膽
Good1Bad12017/09/15, 11:26:12 上午
本貼文共有 0 個回覆
此貼文已鎖,將不接受回覆
本貼文共有 0 個回覆
回覆玩具臺