http://video.appledaily.com.hk/mcp/encode/2017/07/18/3396270/20170719_sub220NEWAD_w.mp4
（左起）龍仔、Dino及阿K今年會於動漫節Cos《銀魂》角色，當然是fans。
動漫改編真人電影，我們都中過唔少伏，伏中之伏非洋人版《龍珠》莫屬，日本製作《進擊的巨人》、《火星異種》都令人有?凳衝動，不過亦偶有佳作，令人懷念有《死亡筆記》系列。近一、兩年日本動漫改編電影熱潮更勁，今年下半年主力也有幾套，當中《銀魂》香港8月上映，月尾動漫節會Cos「真選組」角色的三位Coser兼fans話又驚原著崩壞，但又期待神級還原。
要找fans做訪問，第一個諗起本地好資深的Coser阿K，原來佢同「Cosplay Team Fruit Punch」，加埋其他人氣Coser如女神級雨晞，一早已計劃於今個月尾動漫節出《銀魂》Cos，而且陣容超鼎盛，合共有10人。不過今次精選全男班，Cos「真選組」近藤勛、土方十四郎、沖田總悟的Dino、阿K、龍仔到場，變身動漫人物談電影角色。
除了服裝道具，男Coser還常常要戴假髮及化妝。
阿K說今次的道具比較簡單，他只有一把刀和一支煙。
橋本環奈演神樂 太過美少女
先談三位主要角色，小栗旬演阿銀可以霸氣可以搞笑，大家都話應該很稱職，還有菅田將暉演的志村新八都有先天外形極神似的優勢，至於出道時被稱為「千年一遇」的女神橋本環奈呢？「神樂呢個角色本身都好細個嘅，咁橋本環奈又得18歲，都好啱做。不過橋本佢個形象太過美少女，神樂喺動漫入面就唔係咁。」阿K話不過橋本今次似乎演得好放要加分：「但睇番預告片，見到佢挖鼻反眼嗰場戲，似乎佢都拋開咗美少女呢個包袱，所以都期待嘅。」Dino就講自己Cos嘅角色近藤勛，「唔係話中村勘九郎唔似，但感覺好似阿叔咗少少，喺動漫入面近藤勛都係28、29歲，但中村勘九郎已經35歲，而且佢一向都係走老成啲嘅路線。」還有最重要的一身肌肉，Dino有佢冇。而Cos沖田總悟的龍仔稱：「我覺得入面嘅角色造型都好似，沖田總悟最鍾意整蠱土方十四郎，期待佢喺電影入面點演繹。」
電影版的「真選組」，造型上比較唔似嘅係中村勘九郎（中）演的近藤勛。柳樂優彌（右）演的土方十四郎及吉沢亮演的沖田總悟都很神似。
《紅櫻篇》劇情 期待還原名場面
電影在日本剛剛上映幾日，但香港要等到8月10日先上，電影劇情簡介係江戶時代末期，日本鎖國政策逐漸解放，這時候從天而降一艘黑船，其實是宇宙船，被稱為「天人」的宇宙人大舉入侵，幕府見識到天人的強大實力後立即低頭，不但與天人簽訂不平等條約，甚至頒發「廢刀令」禁止武士們再拿起武器。當幕府變成傀儡政權之時，落難武士們組成攘夷志士與幕府抗衡。在這個戰爭一觸即發的時代，一個擁有一流劍術的男人，就是主角坂田銀時卻跟同伴志村新八、神樂過着異想天開的生活。可是，這個仍堅信武士道的男人，在吊兒郎當的背後，好像有甚麼陰謀……和動漫設定相同，不過講到電影，為遷就暫時只宣佈拍一集的內容限制，劇情似乎也有不少改動。「睇過幾條預告片，見到今次應該係拍漫畫入面嘅《紅櫻篇》，不過其實喺《紅櫻篇》入面係冇我哋呢三個『真選組』角色，但今次就加埋入去，我就想知佢點令呢件事順暢啲。」阿K說到時入場要看看有幾多名場面被還原，除了神樂嘔吐和挖鼻，還有近藤勛全身搽蜜糖引甲蟲一幕，更即時叫Dino除衫做一次那動作。
千年女神橋本環奈挖鼻喎！仲要反眼喎！這就是專業啦。
小栗旬（中）、菅田將暉、橋本環奈三位主要演員，對fans來說還原度都可接受。
這電影陣容超強勁，演員還有長澤正美。
導演福田雄一曾拍《變態超人》真人電影，還有ACG迷超愛的日劇《勇者義彥》，惡搞有一手。
為Cosplay爆肌 買假眼睫毛尷尬
趁當日全男班，又趁Dino除咗衫，應該順便要講講男Coser的辛酸。有15年Cosplay經驗，現在也負責統籌Cosplay活動及製作衣裝的阿K說：「其實近年多傳媒報道，玩Cosplay都再冇乜負面感覺喇，不過Cosplay始終多女仔玩，男仔係有些少唔方便嘅，例如活動中畀男仔換衫嘅地方會少啲。同埋好多時女Coser啲打扮好性感，我哋同佢合照時都要小心啲避忌吓。」
玩咗幾年嘅Dino就話雖然現在好多人玩Cosplay，大家都好接受呢樣嘢，但有時其他人唔知你係Coser嘛，「有時我哋都要去買啲化妝品嚟化妝，有次我去買假眼睫毛，想問吓幾隻牌子嘅分別時，我從女店員嘅眼神中知道，佢以為我唔知有乜嘢特殊癖好，如易服癖之類啦。」
再加上大大隻的身形，更加恐怖，「我唔係為Cosplay而練嘅，其實我有參加啲健身比賽，不過之後發現原來有肌肉對Cosplay都有幫助。」就像當日，可以除衫爆肌。「係呀，咁我Cos個角色本身設定又真係大隻嘅。」說到Cosplay，經驗很重要，但年輕也是本錢，只Cos了5年，還是學生的龍仔，仲試過扮女仔，「之前都會諗，唔知自己Cos女性角色會點？於是有次就試吓化個女仔妝睇吓，點知其他女性朋友見到張相，個個都話我扮女仔幾靚，好適合……不過我暫時未有打算出女角色住。」電影下個月才有得看，想見見真人版角色，今個月尾7月28日至8月1日可以去動漫節，看看能否遇到這三位「真選組」。
要看到全組《銀魂》角色，還有雨晞Cos的神樂，就要去動漫節現場。
Dino一身爆肌，原來還會參加健身比賽。
《銀魂》真人版電影
上映日期：8月10日
原作：空知英秋
導演：福田雄一
演員：小栗旬、堂本剛、菅田將暉、橋本環奈、長澤正美、岡田將生、柳樂優彌、中村勘九郎、菜菜緒、早見朱莉
片長：131分鐘
語言：日語（中文字幕）
採訪：陳孝義
攝影：蕭志南
（部份圖片為電影劇照）
編輯：馮秀珍
美術：利英豪
source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
咁勁  |  0 02017/07/19, 11:35:16 中午 |
|
