http://video.appledaily.com.hk/mcp/encode/2017/07/15/3394156/20170716_sub170newAD_clean_w.mp4
業餘菲林攝影師Dickey平日在運輸公司打工，假日帶着自行改裝的即影即有相機在旺角擺檔，一嘗「做老闆」滋味，也認識了來自五湖四海的朋友。
那些上個年代只在歌廳出現的場面，如今每周也在旺角街頭上演。西洋菜南街成為行人專用區至今約17年，先後數次被縮短開放時間和日數，但依然人來人往。近年周末假日總是滿街賣藝表演，來演唱的、捧場尋歡的，幾乎清一色中老年人或大媽。昔日潮童勝地，今日成了新興平民夜總會，很多年輕人都避之則吉。或者你也覺得西洋菜南街人多嘈吵，但又可有想過這長街原來盛載着許多故事？
西洋菜南街，為步伐急速的香港人帶來歡樂，也造就了機會。業餘菲林攝影師Dickey約五、六年前開始在街頭幫人拍即影即有，是現存唯一堅持用菲林的攝影檔，「旺角多姿多采，喺?度影相，我認識咗五湖四海嘅朋友，最滿足係將靚相遞畀客人嗰一刻。」平日，Dickey在運輸公司工作，他笑說自己與大部份香港人一樣，是受盡上司氣的打工仔，到街頭擺檔可以一嘗「做老闆」滋味。「我都要受老闆氣同OT，生活冇得自主。放假過嚟影相，好天開檔落雨收檔，如果啲客冇禮貌，我就唔做佢生意！真係好爽！」除了想過「老闆癮」，他更是為了與好友相聚，「人越大朋友越難約，加上有啲住得遠，唯一途徑唔使約又一定搵到我，就係嚟旺角。」原來，擺檔為的不是賺錢？他冷笑一下，「喺?度影相點會賺到錢，最多都係幫補吓買菲林。」
自覺幸運 見證情侶求婚
訪問當日，Dickey多次指六點半後有事要辦，原來是一對拍拖四年半的情侶，男朋友阿延早與他夾好，要向女朋友阿汶求婚，他更拍心口答應，說：「就算落大雨，都會扮開檔嚟幫佢達成心願！」阿延特意選旺角求婚，也因為有紀念價值，「四年半以嚟，我哋行過?條街千幾次，一齊影過即影即有，所以請Dickey幫手記錄求婚一刻。」
結果天公造美，阿延求婚時突然停雨，圍觀的群眾全都拍手恭喜；快門聲此起彼落，Dickey用菲林為情侶凝住快樂一刻，過程中他有時甚至比情侶笑得更燦爛，「有能力幫人影低獨一無二嘅感人時刻，其實係一種幸福。」有人諷刺他，說他不好好當個全職婚禮攝影師，偏偏在街頭拍攝不太盛行的菲林相，他一概懶理，更自覺是幸運兒，「求婚嗰一剎那，可能好多攝影師都冇乜機會影得到，而好難得地，我見證咗唔只一次，?啲都係西洋菜街帶畀我嘅經歷。」難怪Dickey形容旺角多姿多采，「就算?度多咗大媽檔、古怪人，始終都係好多人嘅珍貴回憶。」
阿延（左）和阿汶拍拖四年半，他們笑說年輕人無錢，惟有來旺角這個低消費的地方行街。
這是Dickey為情侶拍下的菲林照，他笑說相片半賣半送，「只要佢哋鍾意，我又維到皮就可以，唔使賺到盡嘅！」
他用菲林為客人留住回憶，不少明星也找他拍照，「最滿足係將靚相遞畀客人嗰一刻。」
旺角西洋菜南街夜夜笙歌，近年更有「新平民夜總會」之稱，長街內不只賣藝表演者，還有許多百姓故事。
想霸位表演要點做？
霸位可以用橫額和腳架，但開檔卻用上不少人力，令新「職業」應運而生。在西洋菜南街，不時看到舉着發泡膠牌派傳單的嬸嬸，原來她們還有另一個身份，就是幫不同街頭藝人開檔的幕後功臣。她們推着放滿音響和帳篷的手推車，來回不同檔口，據悉每次有一百至三百元不等的報酬，也算是派傳單以外的副業吧！
記者：李煒汯、黃凱婷
攝影：張志孟、周芝瑩
編輯：梁浩維
美術：孔文彬
source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
咁都得  |  0 02017/07/16, 12:05:14 中午 |
|
