http://video.appledaily.com.hk/mcp/encode/2017/07/15/3394160/20170716_sub172NEWAD_w.mp4
每逢楊廣明（中）開檔，母親洪姐（左）都會捧場，他更因唱歌而結識到女朋友（右），親情愛情兩得意。
「望着你講，也許更易，濃於水的三個字……」假日走在西洋菜南街，不時聽到有把讓人雞皮疙瘩的女聲，唱着容祖兒、吳若希等女歌手的歌曲。四處張望，想找出聲音的來源，卻不見附近有女性街頭藝人，因為這把奇特的聲線，竟來自身穿史迪仔T恤、踢着拖，還油頭垢面的楊廣明。
自認智障男 菜街開咪六年母親撐
今年31歲的阿明以這種打扮和聲線演出，少不免惹來途人的奇異目光，除了問「究竟係男定女」，有人甚至會拋下一句「佢儍㗎？」阿明對此卻大方承認：「其實我係有少少，不過係智障嗰隻。」選擇以女聲唱歌，純粹為了吸引途人，「我唔係鍾意扮女仔，細個演話劇都冇做公主，而係做小矮人。」跟阿明做訪問，就像跟朋友聊天一樣舒服，對答如流，從沒察覺他有智力障礙，「我係讀書學嘢慢少少，你叫我計數我真係計唔掂，哈哈！」眼前的阿明常開懷大笑，很難想像他是在一般人眼中既悲又慘的破碎家庭中成長。
努力打散工 非遊手好閒
阿明自出娘胎便有兔唇，「佢老竇一見到阿明咁樣就唔開心，想叫啲姑娘打死佢。」他的母親洪姐淡然地說。後來阿明做過三、四次手術，解決了兔唇問題，還可以唱起歌來，不過父親早已離開他們一家，留下洪姐獨力照顧有智力問題的阿明三姊弟，可幸三人都能長大成人，讓她倍感欣慰，「?家佢哋開心，我咪開心囉！」平日在快餐店工作、患有高血壓的洪姐，一到假日就會到旺角支持阿明，他在西洋菜南街唱歌六年，洪姐就跟足六年。阿明最初沒有自己的檔口，只能待別人有空檔時唱兩嘴，要付出時間，還要付出勞力。「初初同人夾份嗰陣，啲人叫佢搬嘢，搞到佢病咗又冇人同情佢同可憐佢，係得我哋可憐佢。」洪姐說。後來，阿明決心要做個台主，要有自己的檔口，洪姐見證着他因辛勤而流的汗水，便一口答應，「買咗個組合櫃畀佢，有時佢肚餓又買嘢過佢食，總之樣樣嘢都幫佢買埋。」器材、貨倉租金等開支都由她一手包辦，以為阿明終日遊手好閒？其實不然。阿明曾在大型餐飲集團包糭、做月餅，但都是季節性的散工，「佢都生性㗎，不過佢想搵份可以星期六、日休息嘅工，咁就可以出嚟唱歌。」
以歌會友 抱得美人歸
除了阿明和洪姐，阿明的檔口還不時聚集一群男女，他們都是阿明「以歌會友」結識而來，常在阿明唱歌時跳舞助興，有時還會高歌一曲。其中有位常抱着芝娃娃小狗、架着黑色粗框眼鏡的女孩，與阿明特別親暱，她正是阿明在西洋菜南街唱歌的艷遇。「有次我喺十字路口嗰邊唱緊歌，跟住佢哋成班人走過嚟。我鍾意史迪仔，佢又鍾意史迪仔，聽聽吓歌、玩玩吓就開始識咗，之後有一段時間，我喺facebook同佢傾偈，慢慢就熟咗，哈哈！」阿明憶起與女友結識的經過，流露出滿足又甜絲絲的笑容，「西洋菜南街，呢度畀到愛同幸福我，可以喺度識到一個女朋友都算榮幸。講真嗰句，好難做到㗎！」
開檔逾六小時，收到的打賞只有十元八塊，阿明獨特的聲線似乎未能獲途人賞識。
左手推喇叭，右手推發電機，阿明每逢開檔都要這樣子穿插於人群之中。
阿明靠獨特的歌聲和短訊中的噓寒問暖，抱得美人歸。
與其他街頭藝人夾租的單位約一百平方呎，放滿兩隊藝人的器材。
穿着史迪仔T恤以女聲唱歌，惹來不少奇異目光。
記者：李煒汯、黃凱婷
攝影：張志孟、周芝瑩
編輯：梁浩維
美術：孔文彬
source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
原來重有人唱  |  0 02017/07/16, 11:41:14 中午 |
|
