顯示圖片
Sweet夫妻出食譜 跨上跨媒體變小說再拍電視劇



http://video.appledaily.com.hk/mcp/encode/2017/07/14/3393489/20170715_sub143newnewnewAD_clean_w.mp4


二人經營專頁越玩越開心,認為有人讚好只是額外獎勵。能否利用專頁賺錢,根本不是他們考慮範圍。

煮餸煮到出食譜,我明;食譜化身做小說,真係腦筋轉彎轉到入地心都諗唔通。前無古人喎,唔通出版界依家興玩transformer?市道不景,新書銷量過千已經要開香檳,版稅奇少,出版社幫作者諗其他出路與可能性,係好正常嘅。

創造館呢間出版社上上下下一定係約埋食咗豹子膽,首先搵like數得幾百嘅「榮式住家飯」專頁主理夫婦波屎(李崇德)同楚榮(姚楚穎)出食譜,已經係逾越了理性,超過自然嘅決定。不過佢哋又好彩,小兩口幾得讀者鍾意,兩本食譜《男人都愛住家飯》都幾受歡迎。記者親身接觸,佢兩個係sweet嘅,係幸福嘅,係笑聲笑聲滿載溫馨嘅。

兩人閒時煮吓家常菜,畫插畫、影相、拍片放到facebook專頁,純為高興,like數於佢哋如浮雲。得知開專頁原因,真係笑到肚腩細咗,因為出自搞笑老公波屎把口。佢指住老婆話:「佢無乜興趣,無乜朋友,乜都無,個人好悶。我想佢學番細個想學嘅嘢,佢以前想學芭蕾舞,結果學咗跆拳道。但有啲嘢過咗就過咗,佢啲筋好硬,學唔到芭蕾舞啦!偶爾發現佢鍾意煮嘢食,我就幫佢開個page同人分享,等佢個人開朗啲。」喂,咁高調話老婆係獨家村都有嘅?老婆笑謂:「傾得埋嘅朋友的確五隻手指數得晒,我又真係可以無所事事過一日,所以佢無誣蔑我嘅,佢幫我發展咗煮食興趣,我真係開心咗好多。」


食譜化為小說《男人都愛住家飯》,真可謂香港首次。小說售價:$108


書內有個故事是毒男作者陳四月(陳修文)的真實經歷,故事有個小團圓,可惜現實不是。


火腩經過熊熊烈火、百度高溫及漫長嘅試煉,「豆腐火腩飯」在書中是個追夢故事。

自從煮食成癮,佢哋屋企成間私房菜館咁,經常大宴親朋。如果喺現實中經營,有趣確係有趣,但太多制肘,也可能違背「好玩」原則。傾吓傾吓就演變成《男人都愛住家飯》小說版,一於用故事實現開舖計劃。出版社果真勇者無懼,竟然搵咗自稱「零人氣毒L寫古佬」陳四月執筆。佢寫開網絡連載小說,風格題材又魔幻又異能又吸血鬼又前世今生咁,總之就同溫情小品大纜都扯唔埋!陳四月笑謂:「我都覺得好神奇。」小說中的情味,佢又寫得唔錯,起碼睇落唔矯情,唔會打冷震先。小說講夫婦二人經營私房菜館,因為性格八卦,不斷介入客人私生活。楚榮說:「你都可以說我們八卦嘅。」波屎搶答:「我會話係關心。」小說九個故事,每個都用一道菜式串連。咦……咦,是咪抄《深夜食堂》先?陳四月說:「都估有人會比較。我從漫畫開始睇《深夜食堂》,正因為我睇過,我知道點樣可以寫出唔一樣嘅故事。故事好貼近香港人,例如喺街頭演唱嘅追夢青年、做嘢做到好夜無生活嘅上班族。」豆腐火腩飯、梅子排骨、花雕醉雞,一道道菜,帶出一個個缺失的故事。


「梅子蒸排骨」既酸又甜,談的是友達以上,戀人未滿的關係。


榮式住家飯專頁版主波屎(李崇德)與楚榮(姚楚穎)在家中拍攝煮食短片及相片,並把食譜放到專頁。

食譜變小說已夠創新,奇妙電視買咗小說版權改編為劇集,更為奇妙也。劇集中扮演楚榮嘅係《點五步》女主角談善言,男主角係鄒文正。波屎:「真係無諗過喺電視睇到有人飾演自己,感覺應該幾有趣。」一餐飯可以係簡單一餐飯,加兩茶匙回憶同埋感情少許,又可以係唔簡單嘅一餐飯。波屎說:「用故事形式推廣住家飯係開心嘅,有意義嘅。」劇組願意採用本地作家作品,點計都好過大台電視劇左抄韓劇,右抄美劇,再炒埋一碟當原創嘅!

Facebook:榮式住家飯

記者:葉青霞
攝影:潘志恆

2017果籽繼續認真知味。識買惜用。行以求知。好事多為。重修舊好。
緊貼果籽報道,即like:http://fb.me/AS.AppleDaily

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
咁冇謂
Good0Bad12017/07/15, 1:00:25 下午
本貼文共有 0 個回覆
此貼文已鎖,將不接受回覆
本貼文共有 0 個回覆
回覆影視臺